- Detalles
- Escrito por Alicentis
- Categoría: Cultura e educación
- Visitas: 850
- Representantes de todos os grupos políticos municipais e da asociación Afonso Eanes descobren unha placa conmemorativa na casa da cultura
- “Honra a memoria colectiva dos veciños da Baña e da comarca de Barcala”, sinala o alcalde, José Antonio Pereira
- Ata finais de setembro permanecerá aberta a exposición ‘80 anos. Santiago de Compostela 1936’
Coincidindo coa celebración do Día da Galicia Mártir, representantes de todos os grupos políticos municipais e da asociación cultural Afonso Eanes homenaxearon esta mañá na Baña a veciñanza vítima da violencia do golpe de Estado de 1936 e da ditadura franquista.
O acto, promovido pola Asociación Cultural Afonso Eanes, celebrouse na casa da cultura e comezou cunha pequena presentación e o recordo das persoas represaliadas, para continuar co descubrimento dunha placa conmemorativa, a interpretación do himno galego e a inauguración da exposición 80 anos. Santiago de Compostela 1936, que permanecerá aberta ata finais de setembro.
“Trátase dun acto que honra a memoria colectiva dos veciños e veciñas da Baña e tamén da comarca de Barcala”, subliñou o alcalde, José Antonio Pereira, na apertura do acto. Tamén Bruno Esperante, da asociación cultural Afonso Eanes, incidiu en que “este 17 de agosto de 2020 recuperamos unha memoria esquecida, da que non se podía falar nada máis que en familia”. “Serve para fechar as feridas”, afirmou.
A continuación, os distintos grupos políticos con representación municipal lembraron os dezanove veciños e veciñas da Baña que foron vítimas da ditadura franquista. Leron os seus nomes os concelleiros Ana Páramos, polo PSdeG; Andrés García, polo PP; e César Ramos, por Compromiso por Galicia. Pechou a lista Olalla Liñares, presidenta da asociación cultural Afonso Eanes, co recordo de varias persoas da comarca que foron asasinadas no cemiterio compostelán de Boisaca, entre eles os veciños da Baña Manuel Fagín Páramos e Juan Antonio Barros Manteiga. Así mesmo, un veciño pediu que fose incluído na lista o seu pai, Baldomero Manteiga Casais, preso durante catro anos e medio en Cantabria.
Exposición na Casa da Cultura
Despois da escoitar o himno galego e do descubrimento dunha placa de homenaxe ás vítimas na fachada da casa da cultura, os asistentes puideron coñecer por quendas a exposición 80 anos. Santiago de Compostela 1936, que mostra dun xeito gráfico cal era a situación social e política que se vivía na capital galega no ano 1936 e tamén as consecuencias que tivo o golpe de estado. Os primeiros visitantes contaron coas explicacións de Rafael García Ferreira, pertencente ao grupo de investigación Histagra da Universidade de Santiago. A mostra permanecerá aberta para toda a veciñanza ata finais de setembro na casa da cultura.
Fotos da homenaxe publicadas no Facebook do Concello da Baña.
- Detalles
- Escrito por Alicentis
- Categoría: Cultura e educación
- Visitas: 748
O Concello da Baña elabora unha enquisa sobre o servizo de madrugadores no CEPI San Vicente de cara ao vindeiro curso 2020/2021. O obxectivo é coñecer as necesidades reais de conciliación das familias para valorar a conveniencia de seguir mantendo este servizo, tendo en conta o número de nenos e nenas que farían uso do mesmo e en que condicions: con ou sen almorzo, horarios ou días de asistencia.
As persoas interesadas poden cubrir a seguinte enquisa:
- Detalles
- Escrito por Alicentis
- Categoría: Cultura e educación
- Visitas: 853
O campamento urbano da Baña, que promove o Concello para facilitar a conciliación familiar e laboral durante as vacacións, está dedicado este ano a coñecer a evolución da humanidade. Durante as dúas últimas semanas, os 40 nenos e nenas que acoden as actividades puideron aprender como vestían, comían e vivían os homes e mulleres da Prehistoria e tamén da época dos faraóns de Exipto.
Mediante xogos, pinturas e moitas máis actividades, e divididos en grupos reducidos segundo a idade para respectar as medidas de seguridade pola covid-19, nenos e nenas pasan mañás divertidas na área recreativa Agra de Chans e tamén no centro social e da terceira idade, a onde acoden o inscritos no campamento de máis idade.
Dentro destes campamentos temáticos, nenos e nenas comezaron a coñecer un pouco a Prehistoria da humanidade, e acabaron disfrazándose de neandertales. Estes últimos días estiveron coñecendo a historia de Exipto, coñecendo onde vivían, como vestían e como se alimentaban. E claro, a semana rematou coa gran maioría disfrazados de faraóns e faraoas.
Ademais destas actividades lúdico formativas, o deporte tamén ten cabida no campamento urbano. A piscina municipal é unha das preferidas da rapazada. Alí acoden aos cursos de natación e a mergullarse para refrescarse do intenso calor dos últimos días.
Album de fotos na páxina de Facebook do Concello da Baña (neste enlace)
- Detalles
- Escrito por Alicentis
- Categoría: Cultura e educación
- Visitas: 891
O Concello da Baña abriu un prazo extraordinario de matrícula para cubrir unha vancante de novo ingreso no Punto de Atención á Infancia (PAI) da Baña, dirixida a nenos ou nenas de entre 3 meses e 3 anos. As familias interesadas teñen ata o día 31 de xullo para presentar a documentación e solicitar a praza.
A presentación de solicitudes e documentación complementaria realizarase preferentemente a través da sede electrónica do Concello da Baña (preme aquí). Os modelos de solicitude que hai que cubrir achéganse nos arquivos adxuntos, así como un titorial de como facer esta tramitación na sede electrónica municipal. En caso de dúbidas ou dificultades para seguir o proceso en liña, poden dirixirse á educadora familiar concertando unha cita previa no número de teléfono 981 817 605, en horario de 9.00 a 14.00 horas.
Cun total de 20 prazas, o PAI da Baña ofrece atención educativa e atención ás necesidades básicas da infancia, á vez que favorece a conciliación da vida laboral e familiar. As familias poden optar por utilizar o servizo en réxime de media xornada (ata 4 horas) ou de xornada completa (de 4 a 8 horas). Cómpre salientar que non se fai discriminación de tarifa por horas, senón por tipo de xornada.
O centro ten un horario que vai das 7.45 ás 15.45 horas de luns a venres, se ben este horario está suxeito a modificacións en función das necesidades das familias. Canto aos horarios das crianzas, os nenos e nenas poden entrar no centro ata as 10.00 horas; aqueles que non comen no PAI teñen que saír antes das 13.00 horas; e, finalmente, a hora de recollida dos que si comen no centro é a partir das 15.00 horas.
Para máis información, contactar co departamento de Educación e Cultura ou coa educadora familiar.
Nos arquivos adxuntos figuran os anexos que se deben cubrir e a ordenanza reguladora do PAI da Baña. No anexo II aparece a documentación complementaria a presentar en función das circunstancias sociofamiliares concretas. Para a baremación teranse en conta o IRPF do exercicio 2018.
Poden presentar as solicitudes a través da sede electrónica do concello.
 20200722_AnexoI_solicitude | [20200722_AnexoI_solicitude] | 141 kB |
| 20200722_Anexo2_situacion_sociofamiliar | [20200722_Anexo2_situacion_sociofamiliar] | 281 kB |
| 20200722_manual_sede_electronica | [20200722_manual_sede_electronica] | 470 kB |
- Detalles
- Escrito por Alicentis
- Categoría: Cultura e educación
- Visitas: 1043
-
Actuarán este domingo pola mañá nos lugares de Guimaráns, A Igrexa, O Pazo e Cabanas
-
O ciclo inclúe música, teatro, monólogos e maxia, entre outros espectáculos
-
O 5 de agosto actuará a compañía Apatacón na Ermida; o 10, Paula Carballeira no Barro e o día 22 FaniTriana levará a súa maxia a Corneira
O grupo Brassica Rapa, formado por mulleres que tocan instrumentos de vento e percusión, levarán o seu espectáculo de rúa mesturando música instrumental e vocal con multipercusión, polos lugares de Cabana. Con esta fanfarra galega dá comezo un ciclo de espectáculos culturais que o Concello da Baña levará por diferentes parroquias do municipio para promover a igualdade, e que inclúen actuacións musicais, monólogos, teatro e maxia, entre outros.
Financiado pola Secretaría Xeral de Igualdade e o Pacto contra a Violencia de Xénero do Ministerio de Igualdade, dende a Concellaría de Cultura da Baña quérese apoiar as asociacións parroquiais para ofrecer espectáculos que axuden a espallar a cultura e fomentar a igualdade nun verán marcado pola pandemia da covid-19. Seguindo as recomendacións da Xunta de Galicia, o alcalde acaba de asinar un bando recomendando suspender as verbenas parroquiais para evitar a propagación do coronavirus.
A veciñanza de Cabanas será a primeira que poderá gozar deste programa. O domingo 19 de xullo, dende as 10.00 horas, este grupo integrado por mulleres e que inclúen no seu repertorio grandes éxitos do pop e da música tradicional galega, ademais de jazz e música reivindicativa, percorrerán os lugares de Guimaráns, A Igrexa e O Pazo. Despois dun pequeno descanso para repoñer forzas, irán ata Cabanas para continuar entretendo a veciñanza coa súa boa música.
Aínda que está pendente de pechar o programa, a seguinte actuación confirmada será o 5 de agosto na Ermida. Ata alí achegarase a compañía de teatroApatacónFaria Díaz e Vero Rilo para rerpesentar a obra ‘Por unha peseta’.
O 10 de agosto, no Barro, Paula Carballeira representará o seu espectáculo dirixido para nenos de máis de 4 anos titulado ‘Elas tres (a nai, a nena, a bruxa) e moitas outras’. O día 22 agosto, en Corneira, FaniTriana levará o seu espectáculo de maxia ‘Igualdade, onde estás?.
Son algúns dos espectáculos xa confirmados dun programa que se estenderá ata o mes de novembro con espectáculos para todos os públicos.