- Detalles
- Escrito por Alicentis
- Categoría: Cultura e educación
- Visitas: 1256
O cine ao aire libre volve esta fin de semana á Baña coa proxección da película de Oliver Laxe ‘O que arde, que se proxectará o sábado, día 18, a partir das 22.30 horas na finca da rúa Tedelle.
A fita O que arde, dirixida e coescrita polo galego Oliver Laxe, é un relato sobre a culpa, a dor e a soidade que narra a historia dun pirómano saído do cárcere que volve á casa xunta á súa nai. Este filme recibiu o Premio do Xurado na sección Unha certa mirada do Festival de Cannes 2019 e o Goya á mellor dirección de fotografía. A autenticidade da debutante Benedicta Sánchez foi recoñecida co Goya á mellor actriz revelación en 2020. Aínda que estaba previsto proxectala o venres, a emisión trasladouse para o sábado, día 18 de xullo, a petición da empresa que se encarga da proxección.
En colaboración coa Deputación da Coruña, o Concello proxecta esta película e tamén Maimiño e o espello máxico, que a veciñanza poderá visionar o 22 de agosto.
Maimiño e o espello máxico é a primeira película galego-cubana de animación, unha adaptación do conto infantil Polgariño. Narra a historia dun pequeno labrego que quere sacar á súa familia da pobreza. Unha praga de insectos que lle estragan a colleita e o encontro co espello máxico da media laranxa son os sucesos que o conducirán á aventura.
O acceso para ver as dúas películas é gratuíto ata completar o aforo dispoñible. O Concello instalará cadeiras e establecerá as medidas necesarias para respectar as medidas de seguridade e o distanciamento social para evitar a propagación da covid-19. Se algunha persoa prefire levar unha toalla ou cadeira da casa tamén pode facelo.
- Detalles
- Escrito por Alicentis
- Categoría: Cultura e educación
- Visitas: 576
Crear un espazo para que as mulleres da Baña poidan compartir experiencias de vida, sentirse parte dun grupo de iguais, socializar entre elas e afianzar alianzas de amizade é un dos obxectivos que persegue Tempos de Mulleres, unha iniciativa promovida polo Concello e que arrancou esta mañá coa participación dunha ducia de veciñas.
Durante sete sesións, que se impartirán os martes e venres de 09.30 a 13.30 horas nos locais da escola de música, a pedagoga e educadora social Ana María García, tamén veciña da Baña, explicará diferentes técnicas e porá en marcha actividades para axudarlles ás participantes a aprender a ver e experimentar as conexións entre o corpo físico, a mente e as emocións.
Con estas técnicas preténdese mellorar a propia imaxe e a autoestima das participantes, establecendo grupos de apoio e mellorando as habilidades de relación e de comunicación, fomentando a confianza en si mesmas e nas demais. Coa finalidade de fomentar o benestar e o autocoñecemento, realizaranse actividades de xogo, movemento, animación, expresión libre, creatividade, música e relaxación.
Tempos de mulleres está organizado polo Concello da Baña, no marco do Pacto de Estado contra a violencia de xénero, do Ministerio de Igualdade.
- Detalles
- Escrito por Alicentis
- Categoría: Cultura e educación
- Visitas: 1415
A Concellería de Cultura da Baña leva o cinema á rúa este verán cun programa de películas ao aire libre. A veciñanza poderá ver en pantalla grande dous filmes dirixidos ao público infantil e outros dous para público adulto, en tres sesións gratuítas programadas para os días 26 de xuño, 17 de xullo e 22 de agosto.
A rúa Tedelle será o escenario o venres, 26 de xuño, das dúas primeiras proxeccións, organizadas polo Concello da Baña en colaboración coa empresa local Sinala Tecnoloxía Visual, que cede os equipos. Ás 18.00 h poderase ver Abominable, un filme de animación que narra as historias dun yeti que logra fuxir dos humanos que o capturaron e da súa amiga Yi, a rapaza que o atopa na azotea do seu edificio e tenta axudalo a volver á casa. Máis tarde, ás 20.30 h, proxectarase a película Mientras dure la guerra, na que o director Alejandro Amenábar conta a historia de como en 1936 o escritor Miguel de Unamuno apoiou a rebelión contra unha República pola que el mesmo loitou pero que o defraudara.
Para o venres 17 de xullo está prevista a proxección de O que arde, mentres que o sábado 22 de agosto o público infantil volverá ser protagonista con Maimiño e o espello máxico. Estas dúas sesións forman parte da Rede Cultural da Deputación da Coruña.
A fita O que arde, dirixida e coescrita polo galego Oliver Laxe, é un relato sobre a culpa, a dor e a soidade, que narra a historia dun pirómano saído do cárcere que volve á casa xunta a súa nai. Este filme recibiu o Premio do Xurado na sección Unha certa mirada do Festival de Cannes 2019 e o Goya á mellor dirección de fotografía. A autenticidade da debutante Benedicta Sánchez foi recoñecida co Goya á mellor actriz revelación en 2020.
Por último, Maimiño e o espello máxico é a primeira película galego-cubana de animación, unha adaptación do conto infantil Polgariño. Narra a historia dun pequeno labrego que quere sacar a súa familia da pobreza. Unha praga de insectos que lle estragan a colleita e o encontro co espello máxico da media laranxa son os sucesos que o conducirán á aventura.
- Detalles
- Escrito por Alicentis
- Categoría: Cultura e educación
- Visitas: 625
O Concello da Baña pon a disposición dos rapaces e rapazas que vaian cursar bacharelato ou algún ciclo de formación profesional nos institutos e Negreira ou Santa Comba durante o curso 2020-2021 un servizo de transporte a estes centros educativos.
As familias bañesas que desexen utilizar este servizo deberán anotarse na concellaría de Cultura, para facilitar a organización do transporte para todas as persoas interesadas. O prazo remata a finais do mes de xullo.
- Detalles
- Escrito por Alicentis
- Categoría: Cultura e educación
- Visitas: 981
A Axencia de Informática do Concello da Baña comparte estas ligazóns para pasar un intre divertido, destinadas a persoas de todas as idades.
- Para practicar co rato:
https://www.vedoque.com/juegos/muevelamano.html
http://www.pbclibrary.org/raton/mousercise.htm
Para todos aqueles que queredes iniciarvos na informática, aquí tedes dúas ligazóns para practicar co rato.
- Xogos de memoria:
Xogos de memoria para todas as idades
https://vedoque.com/juegos/atento-juego.html
Xogo para traballar a atención, a percepción e a memoria
- Xogos de mesa para os máis maiores:
https://www.juegosdiarios.com/juegos-de-mesa.html
Xogos de mesa como dominó, parchís, billar..
https://www.paisdelosjuegos.es/juegos/ingenio
Xogos de mesa para poñer a proba as túas capacidades
- Quebracabezas para maiores:
https://www.gamesforthebrain.com/spanish/dragger/
Unha forma de realizar quebracabezas arrastrando as pezas
Quebracabezas para resolver co nivel de dificultade que elixa cada un
- Quebracabezas para pequenos:
https://www.mundoprimaria.com/juegos-educativos/juegos-puzzles-gratis
http://www.primeraescuela.com/rompecabezas-en-linea/
De animais ou obxectos que empezan polo a, polo b...