- Detalles
- Escrito por Alicentis
- Categoría: Cultura e educación
- Visitas: 1012
A veciñanza da Baña respondeu onte a iniciativa do Concello, Comisión de Festas da Baña e Asociación de Mulleres Alborada e acudiu á praza do Concello para gozar dunha ampla oferta lúdico gastronómica que tivo ás castañas e a música como principais protagonistas. Durante a xornada, os asistentes foron quen de degustar máis de 70 quilos de castañas e 570 racións de polbo e churrasco que se ofreceron durante todo o día. As Pandeireteiras e gaititeiros da Baña, o dúo Ramón Leis & Moco Ces, o grupo Ciclón e o DJ puxeron a boa música, que animou a moitos a bailar.
Representantes da comisión de festas da Baña mostraban a súa satisfacción pola tarde, mentres asaban as castañas. Era a primeira vez que, xunto con Concello e a Asociación de Mulleres Alborada, organizaban un magosto popular e ninguén tiña moi claro cal ía ser a respostas da veciñanza. As previsións iniciais para o xantar popular quedaron amplamente superadas pola resposta veciñal, e consumíronse cinco veces máis racións dos cálculos iniciais. Ata 570 racións, entre polbo e churrasco, despachou a polbeira que montou a carpa na Praza do Concello. Algúns veciños optaron por xantar na propia carpa, e outros moitos ían buscar a comida para degustala na casa.
Algo parecido pasou coas castañas, que se asaron xunto ás escolas vellas. Máis de 70 quilos deste produto típico do outono galego se asaron nunhas boas brasas. O propio alcalde, José Antonio Pereira, e a concelleira de Cultura, Mónica González, con outros membros da organización as trasladaron en sacos ata a carpa da praza onde agardaban moitas persoas que estiveron gozando e bailando coa boa música. Pouco a pouco, as castañas ían desaparecendo das mesas, mentres o grupo Ciclón empezaba a animar a verbena.
Pola tarde, o dúo formado polos profesores da Escola Municipal de Música, Ramón Leis & Moncho Ces, as Pandeireteiras da Baña e os Gaiteiros da Baña puxeron as notas musicais. Mentres os primeiros ofrecían o seu concerto no local social e da terceira idade, pandeireteiras e gaiteiros tocaron baixo da carpa da praza do Concello, atentamente observados pola cativada. Os maiores enseguida se animaron a botar unhas bailas para gozar dunha xornada que reuniu centos de persoas na Praza do Concello e que apunta a ter continuidade en anos vindeiros.
Álbum de fotos no Facebook do Concello da Baña (neste enlace).
- Detalles
- Escrito por Alicentis
- Categoría: Cultura e educación
- Visitas: 474
- Detalles
- Escrito por Alicentis
- Categoría: Cultura e educación
- Visitas: 1998
O Concello da Baña, en colaboración coa comisión de festas da Baña e a Asociación de Mulleres Alborada, está a organizar un gran magosto para o día 26 de outubro que inclúe sesión vermú, xantar popular a base de polbo, actuacións de músicos da Baña e o gran magosto, a partir das 19.00 horas. O grupo Ciclón e unha sesión DJ animarán a verbena.
Potenciar unha das grandes tradicións galegas do outono, a celebración do magosto, é o obxectivo que persegue o Concello da Baña coa organización dunha festa popular arredor da castaña. A comisión de festas da Baña e a Asociación de Mulleres Alborada colaboran na organización duns actos que se van celebrar na Praza do Concello dende o mediodía.
O grupo Ciclón animará a sesión vermú e unha polbeira encargarase de dar de comer a quen se anime a participar no xantar popular. Pola tarde continuará a música, con concertos dos mestres da Escola Municipal de Música, Ramón Leis e Moncho Ces (16.30 horas), e a actuación dos gaiteiros e das Pendeireteiras da Baña (18.15 horas).
Ás sete da tarde as persoas asistentes poderán degustar as castañas que se prepararán no magosto, antes de que o grupo Ciclón e una sesión de DJ animen a verbena dende ás 19.30 horas.
A veciñanza que queira colaborar con esta festa pode levar castañas á tenda Sinala Tecnoloxía Visual de San Vicenzo, en horario comercial.
Pavís Pavós representará os seus 'Contos que veñen e van' na casa da cultura da Baña o 25 de outubro
- Detalles
- Escrito por Alicentis
- Categoría: Cultura e educación
- Visitas: 707
O 25 de outubro, ás 18.15 horas chegará á casa de cultura da Baña o espectáculo Contos que veñen e van de Pavís Pavós, cheo de historias de medo, amor, sorpresa, de xigantes e de ananos, bruxas e trasnos, apócemas máxicas, viaxes marabillosas, princesas e dragóns que veñen voando, que se pousan nas orellas e que entran para, logo, seguir o seu camiño.
O espectáculo está dirixido a maiores de 4 anos, mais todos os membros da familia están convidados a pasalo en grande cos relatos de Pavís Pavós.
- Detalles
- Escrito por Alicentis
- Categoría: Cultura e educación
- Visitas: 896
O proxecto “A Baña dixital” organiza un concurso de fotografía e vídeo dirixido a persoas de entre 14 e 30 anos. Cada participante poderá presentar un máximo de 3 imaxes e un vídeo de 30 segundos, que teñen como requisitos fundamentais que sexan orixinais, tomadas en calquera punto do Concello da Baña e relacionadas co seu patrimonio cultural, ou paisaxístico. Os materiais que se presenten deben ser entregados no correo electrónico Este enderezo de correo está a ser protexido dos robots de correo lixo. Precisa activar o JavaScript para velo. ata o 14 de outubro.
O material audiovisual que se presente pode obterse a través de calquera dispositivo (móbil, cámara...), debe ser tomado nalgún lugar da Baña e estar relacionado co seu patrimonio cultural, ou paisaxístico. Un grupo de profesionais de recoñecido prestixio escollerán un único gañador/a entre todas a fotos e vídeos, quen recibirá 100 euros en calidade de premio. Para o dito galardón poderase ter en conta tanto imaxes individuais coma series.
As imaxes e vídeos deben ser enviados por mail antes das 12.00 horas do día 14 de outubro de 2019 ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. Os vídeos e fotografías remitidos deberán incluír nome completo, lugar de residencia, teléfono e copia do DNI. No caso dos menores de idade deberá achegarse tamén a autorización e DNI da nai, pai ou titor/a legal.
Para máis información, as persoas interesadas poden chamar ao 981 886 501.
As bases do concurso atópanse no arquivo adxunto.
 201909024_Bases_Concurso_Fotografía_Vídeo_A_Baña_Dixital.pdf | [ ] | 373 kB |