Detalles

Escrito por Alicentis

Categoría: Cultura e educación

Published: 21 Setembro 2019

Visitas: 1008

• Youtubeir@s é unha iniciativa organizada polos concellos da Baña, Ames, Carballo, Cedeira, A Coruña, Moaña, O Grove, Ourense, Ribadeo, Pontevedra, Rianxo, Santiago e Teo, as universidades da Coruña, Santiago e Vigo e a Deputación da Coruña

• O prazo para participar no Proxecto Youtubeir@s 2019 está aberto ata o día 27 de setembro.  

O alcalde da Baña recolleu hoxe en Pontevedra, en representación do Proxecto Youtubeir@s, o Premio Mil Primaveras que lle foi concedido na categoría máis innovadora ao proxecto organizado polos concellos da Baña, Ames, Carballo, Cedeira, A Coruña, O Grove, Moaña, Ourense, Ribadeo, Pontevedra, Rianxo, Santiago e Teo, as universidades da Coruña, Santiago e Vigo e a Deputación da Coruña co obxectivo de fomentar a creación de contidos na Rede na nosa lingua. O acto celebrouse esta mañá no Pazo da Cultura de Pontevedra, conducido pola regueifeira Lupe Blanco e Luís O Caruncho. 

Cando se deu a coñecer o fallo, o xurado destacou que o Proxecto Youtubeir@s “favorece que as persoas que transmiten a través de Youtube o fagan en galego e que as que comunican en galego o fagan en Youtube”.  Nesta edición, entre os 47 proxectos presentados, tamén foron premiados  o Modelo Burela, do IES Perdouro (premio ao mellor proxecto estabilizado); Falemos de ti e min, do IES de Soutomaior (premio ao mellor proxecto novo); Desafío 48 h, do IES María Casares de Oleiros (premio á mellor comunicación e impacto); Eu presumo de galego, do IES de Melide (premio ao mellor proxecto destinado á mocidade); e GCiencia (premio ao mellor proxecto dun ámbito sectorial).

Os Premios Mil Primaveras, creados neste 2019 pola Coordinadora de Traballadoras e Traballadores de Normalización da Lingua (CTNL) coa colaboración da Deputación de Pontevedra, teñen como obxectivo valorar, recoñecer e difundir accións, campañas e programas que serven para fomentar a lingua e para incrementar tanto o seu uso coma o seu prestixio. A organización de Youtubeir@s, que neste 2019 acada a súa terceira edición, amosou a súa gratitude por este galardón. 

Os premios Mil Primaveras non teñen dotación económica. Consisten no recoñecemento e na ampla difusión das accións, programas ou proxectos escollidos polo xurado. Foron avaliados de acordo coas bases por un xurado formado por persoal técnico do ámbito da normalización lingüística, da comunicación e da investigación sociolingüística, composto por Daniel Romero Rodríguez, técnico de normalización lingüística do Concello de Fene, Rosario Pérez Magdalena, técnica do Centro de Documentación Sociolingüística de Galicia, Ana Iglesias Álvarez, investigadora e docente na Universidade de Vigo, María Yáñez Anllo, xornalista e directora da revista dixital Vinte, e Anxos Sobriño Pérez, presidenta da CTNL.

Premios Youtubeir@s>

Os Premios Youtubeir@s, unhas das grandes liñas de acción do proxecto Youtubeir@s, mantén até o vindeiro 27 de setembro o prazo de inscrición para todas as persoas creadoras de contidos en Youtube na nosa lingua. Cómpre que os vídeos estean publicados con data posterior ao 15 de marzo de 2018, sen restricións de privacidade e cos cancelos #youtubeiras #youtubeiros na descrición. Establécense un total de catro categorías: vídeo-facermos (vídeos que mostran saberes e procesos de elaboración a través de titoriais), vídeo-opinarmos (exposición de opinións e valoracións sobre un tema de interese), vídeo-cantarmos (vídeos musicais con versións, composicións orixinais, adaptacións ou coreografías) e canles.

 Ademais destas catro categorías, recoñeceranse premios á creatividade, á eficiencia comunicativa, á calidade técnica e á calidade lingüística, decididos todos por un xurado de recoñecido prestixio que outorgará o premio durante a gala dos Premios Youtubeir@s, no mes de novembro. Por último, o certame conta cun premio do público que se entrega baixo o nome de #propostayoutubeira. En conxunto, Youtubeir@s repartirá un total de 6500 euros en galardóns. As bases completas pódense consultar na web www.youtubeiras.gal.

Detalles

Escrito por Alicentis

Categoría: Cultura e educación

Published: 17 Setembro 2019

Visitas: 2128

• Martín Pose Pérez dirixe un equipo de seis profesores dos que só repiten dous do equipo anterior

• “Queremos ganarnos a confianza do alumnado, para que aprendan divertíndose”, asegura

• O prazo de matrícula estará aberto esta semana e o vindeiro luns comezan as clases, que se impartirán luns, mércores e venres

Recuperar a Banda de Música da Baña xa este ano, dotándoa dunha canteira con xente moza e “gañar a confianza do alumnado para que aprendan divertíndose” son dous dos obxectivos do novo director da Escola Municipal de Música da Baña, Martín Pose Pérez, que onte presentou ao novo equipo docente e o programa de actividades ás familias nunha reunión das instalacións do centro. O prazo de matrícula permanecerá aberto esta semana e o vindeiro luns, día 23, comezan as clases.

“Nesta primeira etapa queremos enfocar a Escola de Música máis a formar unha canteira de xente moza para a banda, dándolle máis importancia aos instrumentos de vento que a música moderna”, sinala Martín Pose. Hai veteranos que formaron parte da desaparecida Banda de Música da Baña que xa “manifestaron a súa intención de apostar por este proxecto” e están dispostos a incorporarse a banda, aportando experiencia, engade Marcos Cernadas, un mozo da Baña que vai ser profesor de vento madeira nesta nova etapa.

Martín Pose vai dirixir un equipo de seis profesores, dos que catro son novos. Ademais de Marcos Cernadas, incorpóranse á Escola Municipal de Música da Baña Pablo Terraga, que será o mestre de guitarra; Rubén Salvande (impartirá vento madeira e música e movemento) e Sergio Suárez (percusión). Xunto a eles continúan Moncho Ces (linguaxe musical e vento metal) e Ramón Leis, anterior director e que seguirá como profesor de piano e acordeón.

Nesta primeira fase, Martín Pose centrarase en tarefas de coordinación e organización, e en poñer en marcha banda. A súa intención e “facer xa os primeiros ensaios antes de que remate este ano” para, coincidindo coa celebración do Día das Letras Galegas “ser quen de tocar o himno galego”, e ofrecer un festival no mes de xuño que sirva de presentación pública da Banda de Música da Baña. Unha agrupación que estivo en activo vinte a cinco anos e que desapareceu a principios deste século.

Tanto Marcos Cernadas como Rubén Salvande, ambos da Baña, están convencidos de que moitas das persoas que formaron parte da banda están dispostos a incorporarse ao novo proxecto, aportando a súa experiencia á nova agrupación.

Con este obxectivo prioritario, o novo director da Escola Municipal de Música quere darlle máis prioridade aos instrumentos de vento (para facer canteira para a banda) que a música moderna. “Cando haxa canteira para a banda abriremos a oferta a materias como canto ou violín pensando en poder montar un grupo de música de cámara, e, máis a longo prazo, un combo de música moderna”.

Na Escola Municipal de Música da Baña “seguiremos formando aos alumnos que queiran acceder ao conservatorio cunha preparación específica, para que poidan continuar cos seus estudos musicais e superar os exames de acceso”. Co resto de alumnado seguiráselles a ofrecer unha ampla formación musical “e gañando a súa confianza para que se divirtan coa música e sigan aprendendo”, sinala o novo director.

Clases tres días a semana

Martín Pose Pérez, que actualmente é o responsable das escolas de música de Val do Dubra e Santa Comba, conta con sete anos de experiencia docente en escolas de música.

O novo equipo de profesorado e a concelleira de Cultura, Mónica González, mantiveron onte pola tarde unha reunión informativa coas familias para explicarlles os novos obxectivos da Escola Municipal de Música e empezar a escoller horarios.

Unha das novidades é que este ano as clases impartiranse durante tres días a semana, luns, mércores e venres, en función das disciplinas e instrumentos elixidos polo alumnado. Tras a primeira toma de contacto e coñecer aos novos profesores, moitas das familias xa comezaron a escoller os horarios para o presente curso escolar.

Inscrición ata o día 23

Durante toda esta semana estará aberto o prazo de matrícula para a Escola Municipal de Música da Baña, que comezará as clases o vindeiro luns, días 23.

Os formularios de inscrición pódense descargar na web do Concello da Baña (inscrición adultos aquí, inscrición infantil aquí, e domiciliación bancaria aquí).Unha vez cubertos, hai que entregalos nas oficinas municipais ou na sede electrónica do concello (neste enlace).

Na escola de música poden matricularse todas as persoas interesadas maiores de 3 anos de idade (tamén os adultos) en algunha das seguintes especialidades: percusión, saxofón, frauta, clarinete, trombón, trompeta, tuba, bombardino, piano, guitarra, acordeón e música e movemento.

Os prezos establecidos son de 10 euros/mes para música en movemento (nenos de 3 a 6 anos) e de 20 euros mensuais para o resto de especialidades. En todos os casos, para o segundo e seguintes membros dunha mesma unidade familiar haberá un desconto do 50%.

Detalles

Escrito por Alicentis

Categoría: Cultura e educación

Published: 17 Setembro 2019

Visitas: 1196

O Concello da Baña tamén ofértalle este ano ao alumnado do CPI San Vicente un curso de robótica, que se impartirá nas instalacións do propio colexio os venres de 15.30 a 16.30 horas.

Este curso está destinado a nenos e nenas de 5 a 16 anos e as prazas están limitadas. Requírese un mínimo de oito persoas interesadas para poñer en marcha o curso, e só se admitirán ata un máximo de 12.

O prezo do curso é de 25 euros mensuais e as clases comezarán o 4 de outubro.

As persoas interesadas deberán cubrir a ficha de inscrición e o documento de domiciliación bancaria e, despois, entregalo na Concellería de Educación ou remitilo a través da sede electrónica do Concello da Baña (preme aquí)

A ficha de inscrición e o documento para a domiciliación bancaria pódense descargar nos arquivos adxuntos.

Attachments:

Domiciliación.pdf	[ ]	120 kB
FICHA DE INSCRICIÓN ROBÓTICA-1.pdf	[ ]	345 kB

Detalles

Escrito por Alicentis

Categoría: Cultura e educación

Published: 16 Setembro 2019

Visitas: 426

A Escola de Música Tradicional da Baña está a piques de iniciar un novo curso impartindo as modalidades de pandeireta e gaita, tanto para nenos maiores de 6 anos como para adultos. O vindeiro 1 de outubro, día de comezo das clases, está convocada unha reunión informativa nas instalacións da escola municipal de música, a partir das 17.30 horas, para dar información pormenorizada do que se vai facer este ano.

Dirixida por Emilio Lois, a Escola de Música Tradicional da Baña ofrecerá este ano clases os martes. A de pandeireta será de 19.00 a 20.00 horas para os adultos  que están empezando e de 20.00 a 21.00 horas as clases de perfeccionamento.

Polo que respecta á gaita, as clases serán de 17.30 a 18.30 para o grupo infantil, e de 21.00 a 22.00 para os adultos. En todos os casos, a formación impartirase nas dependencias da escola municipal de música.

Os interesados en acudir á Escola de Música Tradicional da Baña deberán aboar unha inscrición de 30 euros para todo o curso. As inscricións deberán formalizarse nas dependencias municipais ou nas da propia escola.

A ficha de inscrición e o formulario de pago pódese descargar nos documentos adxuntos.

Attachments:

20190916_Inscricion_clases_gaita_adultos	[20190916_Inscricion_clases_gaita_adultos]	162 kB
20190916_Inscricion_clases_gaita_infantil	[20190916_Inscricion_clases_gaita_infantil]	154 kB
20190916_Inscricion_clases_pandeireta_adultos	[20190916_Inscricion_clases_pandeireta_adultos]	103 kB