20190606 ALI3961

O ‘Obradoiro sobre empoderamento e benestar para mulleres’ impulsado polo Servizo de Educación Familiar da Baña contou coa presenza de quince mulleres. Durante os tres días que durou o curso, que conclúe hoxe, as participantes afondaron en temas como o autocoñecemento, o reforzo da autoestima e a xestión das emocións mediante dinámicas e xogos que fomentaron a participación das mulleres.

No grupo formado para o curso hai mulleres de todas as idades e oficios, que se amosaron moi interesadas dende o primeiro momento nas materias de intelixencia emocional, empoderamento e autoestima. “As máis xoves xa estaban bastante informadas e cunha base teórica avanzada e están reafirmando os conceptos de autoestima e empoderamento. Moitas das maiores están moi concienciadas coa violencia de xénero”, destacou Diana Muñoz, docente do curso xunto a Sara Vierna. Muñoz tamén salientou a creación dunha rede de apoio entre as participantes do taller, pois “as veces vivimos na casa moi entregadas á familia e os seus coidados, así podemos ver que hai outras que nos poden botar unha man”.

20190606 ALI3956

Nos talleres buscouse fomentar a participación das mulleres mediante dinámicas, xogos, traballos en grupo e debates, sempre de forma lúdica para manter a atención e a motivación das participantes. No primeiro día de obradoiro traballáronse os conceptos de autoimaxe, autoconcepto e autoestima; para a segunda xornada a materia centrouse en igualdade e violencia de xénero; e para o último día quedou a temática de como xestionar as emocións.

Grazas ao curso as mulleres puideron “identificar as súas fortalezas, mellorar a súa autoestima, ser capaces de detectar que é violencia de xénero ou estar preparadas para identificar o machismo que hai na sociedade”, sinalou Diana Muñoz. A fin de contas, estratexias que lles  proverán máis benestar e oportunidades de conseguir os seus obxectivos na vida. Ademais, tralas sesións grupais houbo outras individuais nas que as mulleres puideron tratar coas docentes situacións que non queren contar en público.

O ‘Obradoiro sobre empoderamento e benestar para mulleres’ estivo financiado polo pacto de estado contra a Violencia de Xénero da Secretaría de Estado de Igualdade e realizouse en tódolos concellos de España que o solicitaron, aínda que as asistentes coinciden na brevidade do taller, que se levou a cabo no centro social e da terceira idade da Baña: “Dinnos que se lles fai moi curto e que lles gustaría que durase máis tempo. Está claro que hai interese na temática e é un curso moi necesario e que vén moi ben”, sentenciou  a mestra Diana Muñoz.

20190606 ALI3957

20190605 ALI3988

A conselleira de Educación, Carmen Pomar, e o de Medio Rural, José González, confirmaron esta mañá na súa visita á Baña que a escola de educación infantil de Lañas incorpórase aos colexios rurais agrupados coa súa inclusión no CRA de Coristanco e Santa Comba.A asociación destas tres institucións supón a súa dirección e coordinación de maneira conxunta, o que permitirá a rotación de docentes entre os centros, proporcionando un maior número de especialistas en cada área de estudo. O alcalde da Baña, Andrés García Cardeso, destacou a importancia de manter a educación de calidade no rural, nun acto no que se deron cita representantes dos 27 CRAs que hai en Galicia.

O acordo representouse cunha recepción na escola de Lañas, na que se deron cita, ademais de Carmen Pomar, José González e Andrés García Cardeso, as alcaldesas da Santa Comba, María Pose, e a rexedora en funcións de Coristanco, Clarisa Couto, así como representantes e mestres dos CRAs de Galicia.

Emilio Lois foi o encargado de dar a benvida con música galega aos conselleiros, que despois visitaron ás distintas aulas da escola de Lañas, durante a cal Carmen Pomar compartiu un momento ca cativada do centro educativo. Andres García destacou a relevancia de manter as instalacións educativas do rural, destacando que son “o seu “futuro”. A voz do claustro púxoa a directora do CRA de Tui e Premio Nacional de Educación no 2017, Teresa Domínguez, que recitou un poema dedicado á ensinanza rural, “Debullando sentimentos de CRA”, que os dous conselleiros levaron enmarcado como agasallo.

20190605 ALI3995

A conselleira de Educación, Carmen Pomar, salientou a importancia desta fusión na medida en que permite aproveitar sinerxías en canto á planificación da actividade educativa e organización de recursos que redundan nun servizo educativo de máis calidade. Así mesmo, fixo fincapé no papel dinamizador e de cohesión do territorio que exercen as escolas de Educación Infantil e os Colexios Rurais Agrupados nas zonas onde se insiren, así como no excelente labor que están desenvolvendo os docentes que traballan nestes centros dispersos por aldeas e parroquias de toda Galicia.  

Pola súa parte, o conselleiro do Medio Rural, José González, resaltou a importancia da formación, non só na etapa infantil, senón tamén a nivel profesional. Neste sentido, José González lembrou que na última década un total de 1.220 persoas cursaron diferentes ciclos formativos ordinarios da familia profesional agraria nos distintos centros de formación e experimentación agroforestal que ten a Consellería do Medio Rural. 

Os CRAs son centros educativos onde, principalmente, se imparte educación infantil e que se reparten entre varias parroquias, aínda que contan cunha dirección central, normalmente a do centro de maior relevancia do concello ou concellos. Neste caso, o CRA estará formado por oito escolas: catro en Coristanco, tres en Santa Comba e a de Lañas na Baña, aos que asisten 80 nenos e nenas. O acto rematou con todos os asistentes compartindo uns petiscos con produtos galegos que trouxeron os profesores e representantes de todos os CRAs presentes.

Esta fusión lévase a cabo atendendo á petición expresa das direccións de ambos CRAs, así como da escola infantil de Lañas, que foi referendada polos claustros dos tres entes, polos seus respectivos consellos escolares (onde están representadas as familias) e co apoio dos concellos de Santa Comba, Coristanco e A Baña. 

Actualmente en Galicia existen un total de 27 CRAs (incluído o resultante desta fusión) que aglutinan a preto de 2.200 alumnos e alumnas, aos que hai que engadir unhas 88 escolas unitarias que suman uns 1.000 máis. 

Máis fotografías do acto no Facebook do Concello da Baña (neste enlace).

20190605 ALI4043

20190524 132157 ok

 

20190524 111917 okUnha visita ao invernadoiro de caraveis de Ferreiros e aos covos das abellas en Trece foron algunhas das actividades programadas durante o encontro de escolas de educación infantil de Barcala, na que participou alumnado das escolas de Aro (Negreira), Lañas e San Vicenzo (A Baña) e tamén de 1º e 2º de Primaria do CPI San Vicente. En total foron máis de 70 nenos e nenas, que estiveron acompañados polo profesorado de cada centro, normalizadora lingüística e a concelleira de Cultura da Baña.

As actividades programadas para este encontro de escolas infantís partiu do CPI San Vicente a primeira hora.  A comitiva partiu andando cara Ferreiros, onde fixeron unha parada para visitar o invernadoiro de caraveis (o primeiro da Baña) que rexentan Carmen Fernández e Miguel Quintela, que lles explicaron polo miudo á cativada como hai que facer para recoller os fermosos caraveis que saen de Ferreiros para toda España. Despois de escoitar atentamente todas as explicacións, nenos, nenas e mestres estiveron aprendendo como se fai para plantar unha maceta, con aprendizaxe práctico incluído.

Dende Ferreiros a numerosa comitiva camiñou ata o local social da Carballeira, onde nenos e nenas puideron merendar e xogar xuntos no parque e no terreo que arrodea ao local. E mentres os máis novos se relaxaban e fomentaban as relacións sociais cos compañeiros, os mestres tamén aproveitaron para conversar e repoñer forzas.

A mañá, e a camiñada, rematou en Trece, onde a comitiva visitou a produción caseira de mel de Rosa Ramos e Pepe, e puideron ver os covos das abellas. Pepe fíxolles unha explicación polo miúdo do proceso que ten que seguir para conseguir a mel.

Un ano máis, o alumnado das escolas de educación infantil puideron coñecer outra zona do noso concello e aprender de primeira man e coñecer novos oficios que favorecen o desenvolvemento da economía local, grazas a colaboración desinteresada de veciñas e veciños como Carmen, Miguel, Rosa ou Pepe.

Podes ver o álbum de fotos da xornada no Facebook do Concello da Baña (neste enlace).

 

20190524 130118

Youtubeiros conexion

 

O Proxecto Youtubeir@s, organizado polos servizos de normalización lingüística dos concellos da Baña, Ames, Carballo, Cedeira, A Coruña, O Grove, Moaña, Ourense, Ribadeo, Pontevedra, Rianxo, Santiago e Teo, das universidades da Coruña, Santiago e Vigo e da Deputación da Coruña co obxectivo de fomentar a creación de contidos na Rede na nosa lingua, celebra neste 2019 a súa terceira edición baixo o lema Conéctate á comunidade e multiplícate. Con esta máxima, o Proxecto Youtubeir@s busca para este ano non só aumentar o número e a calidade de vídeos e persoas creadoras en galego, senón tamén fortalecer as conexións e as interrelacións da comunidade que producen contido en Youtube. Así, o Proxecto Youtubeir@s organiza por vez primeira dous grandes encontros de intercambio entre persoas xeradoras de contidos dixitais no Youtube, coa meta de motivar a súa vinculación e de crear redes conxuntas de traballo. 

O primeiro deles, Youtubeir@s en conexión, terá lugar o vindeiro 8 de xuño na Coruña, estará aberto á participación de todas as persoas que no panorama galego creen vídeos no Youtube e buscará achegar un espazo para reflexionar sobre o panorama creativo nesta plataforma dende varios ámbitos, a cuestión lingüística na Rede, a perspectiva temática ou o eido de fomento de públicos. Esta xornada de convivencia, dinamizada por Ben Curiosa (equipo de profesionais ao servizo do coñecemento e a creatividade en común) celebrarase o 8 de xuño entre as 10.30 e as 13.30 horas no Centro Cívico Cidade Vella da Coruña (Rúa da Veeduría, 2). As prazas para participar son limitadas e cómpre inscribirse a través de Este enderezo de correo está a ser protexido dos robots de correo lixo. Precisa activar o JavaScript para velo.

O segundo evento, Lista de reprodución ao vivo, será o 28 de xuño entre ás 18.00 e ás 20.00 horas no edificio CEA (Centro de Estudos Avanzados) da USC (Finca de Vista Alegre, Santiago de Compostela). Consistente nun encontro directo entre youtubeir@s e público, o acto emula en certo xeito as bibliotecas viventes ou mesmo as partidas de xadrez simultáneas, de xeito que as persoas creadoras agardarán no seu posto as visitas dos/as “espectadores/as”. Así, cada youtubeir@ levará temas preparados para analizar e o público, que irá rotando entre os diferentes postos, poderá realizar preguntas e interactuar cos "vídeos vivos". Cada un destes encontros durará un máximo de 20 minutos. Ao final desta rolda individual, abrirase a todo o público para poñer en común e compartir experiencias. O acto estará dinamizado por Xandobela (profesionais da educación e da dinamización sociocultural). O público que desexe participar deberá inscribirse antes do 26 de xuño a través do correo formacioEste enderezo de correo está a ser protexido dos robots de correo lixo. Precisa activar o JavaScript para velo..

Premios Youtubeir@s 

Os Premios Youtubeir@s, outra das grandes liñas de acción do proxecto Youtubeir@s, mantén até o vindeiro 27 de setembro o prazo de inscrición para todas as persoas creadoras de contidos en Youtube na nosa lingua. Cómpre que os vídeos estean publicados con data posterior ao 15 de marzo de 2019, sen restricións de privacidade e cos cancelos #youtubeiras #youtubeiros na descrición. Establécense un total de catro categorías: vídeo-facermos (vídeos que mostran saberes e procesos de elaboración a través de titoriais), vídeo-opinarmos (exposición de opinións e valoracións sobre un tema de interese), vídeo-cantarmos (vídeos musicais con versións, composicións orixinais, adaptacións ou coreografías) e canles.

Ademais destas catro categorías, recoñeceranse premios á creatividade, á eficiencia comunicativa, á calidade técnica e á calidade lingüística, decididos todos por un xurado de recoñecido prestixio que outorgará o premio durante a gala dos Premios Youtubeir@s, no mes de novembro. Por último, o certame conta cun premio do público que se entrega baixo o nome de #propostayoutubeira. En conxunto, Youtubeir@s repartirá un total de 6500 euros en galardóns. As bases completas pódense consultar na web www.youtubeiras.gal.

20190517 Portada Video

A Escola de Música Tradicional da Baña e as Pandeireteiras da Baña quixeron celebrar este ano o Día das Letras Galegas gravando en vídeo co ritmo da ‘Muiñeira de Sabaxáns’, unha peza na que se recollen coplas recuperadas por Antonio Fraguas e publicadas no libro ‘Cantigueiro de Cotobade’. Dirixidos polo mestre Emilio Lois, na gravación realizada na área recreativa Agra de Chans participaron nenas, nenos e adultos do grupo de gaitas e tamén as pandeireteiras.

A Concellaría de Cultura da Baña quixo conmemorar deste xeito especial o Día das Letras Galegas, que este ano se dedica a Antonio Fraguas, escritor, historiador e galeguista nado en Cotobade (Pontevedra).

A ‘Muiñeira de Cotobade’ inclúe coplas de Antonio Fraguas que se cantaban nas ruadas de Loureiro (Cotobade) e que foron recollidas polo ilustre galeguista para manter a tradición oral desta zona, como tamén fixo en moitas outras de Galicia. A música foi recollida en Sabaxáns, segundo explica o director da Escola de Música Tradicional da Baña, Emilio Lois.