• As escolas vellas, sede da Escola Municipal de Música, levarán dende hoxe o nome do mestre e fundador da Banda Infantil

  • Goberno local e ex alumnos e ex alumnas destacan o labor do músico e da banda que facilitou o acceso a ducias de rapaces e rapazas á música e aos estudos oficiais

20221217 homenaxe Emilio andujar foto familia

As escolas vellas, sede da Escola de Música Municipal da Baña, chamaranse a partir de hoxe Escolas Emilio Andújar, en homenaxe ao que fora fundador nos anos oitenta da Banda Infantil da Baña. Con este acto simbólico e moi emotivo, o Concello da Baña quere lembrar e recoñecer a figura do falecido músico Emilio Constantino Andújar Riveiro, “verdadeiro artífice e impulsor do ensino municipal no noso municipio”, manifestou o alcalde, Andrés García Cardeso. Así o testemuña a placa que o Concello descubriu esta mañá na súa memoria na fachada do inmoble e na que pode lerse a seguinte inscrición: “Emilio Constantino Adújar Riveiro. Exemplar músico, director e precursor da educación musical no Concello da Baña”.

 García Cardeso subliñou que a homenaxe que “hoxe lle rendemos á Emilio Andújar é xusta e merecida”, dixo, o rexedor, quen destacou do falecido músico “tres valores fundamentais da súa persoa: era moi afable, respectuoso e moi responsable”, aseverou García Cardeso. O alcalde tamén recalcou que Andújar Riveiro encarnaba a tradición musical da comarca de Barcala, unha comarca “que deu e segue a dar moi bos músicos”.

Beatriz Cancela, ex alumna da Banda Infantil da Baña, musicóloga, doutora en Música pola Universidade de Oviedo e actualmente profesora de música en Boimorto, foi a encargada de facer unha emotiva lembranza de Emilio Andújar. Na súa intervención fixo un repaso pola biografía, tanto persoal como profesional, do homenaxeado resaltando a súa paixón pola música, polo ensino musical e o seu legado. Cancela fixo fincapé na importancia que tivo a creación da banda de música da Baña e a posterior escola na formación de moitas nenas e nenos do municipio.

 20221217 homenaxe emilio andujar publico

“Máis dun centro de rapaces e rapazas do concello formaron parte desta agrupación; unha agrupación que facilitou a un amplo sector dos integrantes o acceso á música e aos seus estudos oficiais”, dixo Beatriz Cancela. A ex alumna engadiu tamén que a banda permitiu a moitos nenos e nenas “visitar lugares que enriqueceron as súas experiencias vitais, ás veces inaccesibles, á moitos mozos e mozas do rural bañés dos anos 80 e 90”.

Durante o acto tamén falou o ex alcalde da Baña e ex profesor do Colexio de San Vicente, Paco Villaverde, quen tamén recoñeceu a labor de Andújar ao fronte da Banda Infantil da Baña e na aprendizaxe musical dos nenos e nenas do municipio na década dos 80 e 90.

En representación da familia, Antonio Casal Andújar, neto do falecido músico, agradeceu o recoñecemento e a homenaxe do Concello á figura do seu avó.

Homenaxe musical

Tras os discursos, e antes do descubrimento da placa, Rubén, Marcos, Miguel, Esteban, Darío e Gustavo, antigos integrantes da banda de música e ex alumnos do homenaxeado, interpretaron unhas pezas en memoria do mestre.  E a solista Noelia Rodríguez, acompañada ao piano por Ramón Leis, actual profesor na Escola de Música Municipal da Baña, interpretou a Negra sombra e o Himno Galego ante un público emocionado.

20221217 homenaxe emilio andujar ex integrantes banda

Tras o descubrimento da placa, o alcalde, Andrés García, acompañado polo tenente de alcalde, César Ramos Domínguez, e a concelleira de Cultura, Lorena Trillo, agradecéronlle aos fillos e fillas do falecido músico a súa presenza entregándolles uns presentes. Tamén en nome do Concello, Lorena Trillo, entregoulle a Beatriz Cancela outro presente agradecéndolle a súa disertación sobre a figura de Emilio Andújar e o repaso pola historia e importancia da Banda Infantil da Baña.

O acto contou coa presenza de numerosos veciños e veciñas, familiares de Emilio Andújar, antigos alumnos e alumnas da escola de música e da extinta banda, ademais de representantes da Corporación municipal.

20221217 homenaxe emilio andujar hinmo galego

Emilio Andujar Riveiro

Emilio Andújar Riveiro naceu en 1920 na parroquia de Broño, en Negreira. Comezou a súa andaina no mundo da música, aos 14 anos, como músico afeccionado, nun tradicional trío de gaita, bombo e caixa. Logo pasaría a formar parte do Sexteto Bañés, tocando o bombo. O seu paso polo servizo militar permítelle ingresar na Banda Militar do Cuartel de Infantería da Coruña, onde adquire os coñecementos en solfexo, teoría, gaita e clarinete. Tras rematar o servizo, incorpórase ao Sindicato Nacional de Espectáculo e funda no 1949 a Orquestra Andújar en 1949. En 1974 organiza a orquestra Rioverde, que compaxina coa seu labor de taxista. Casa con Magdalena Pose e establece o seu domicilio en Ordoeste (A Baña).

20221217 ramon leis e noelia rodriguez homenaxe emilio andujar

No ano 1981, xa xubilado, Emilio Andújar pasaría a dar clases extraescolares de música no colexio da Baña e, froito dese traballo xurde a Banda Infantil da Baña (activa dende 1982 ata 2009), da que foi director. Froito da agrupación musical crease en 1998 a Escola de Música. Emilio Andújar pasaría a formar parte do cadro docente xunto cos músicos Rafael Arosa e Mario Martínez.

O entrañable músico e impulsor da ensinanza musical na Baña falecería en 2019, na aldea de Rial (Ordoeste) aos 98 anos.

 

  • As escolas vellas, sede da institución musical, recibirán o nome do finado músico

  • O Concello descubrirá unha placa conmemorativa e antigas alumnas e alumnos encargaranse de lembrar ao mestre

O Concello da Baña renderalle este sábado, 17 de decembro, unha homenaxe a Emilio Constantino Andújar Riveiro, músico, fundador da Banda de Infantil da Baña, ex director da Escola de Música e precursor da ensinanza musical, non só no municipio bañense, senón na comarca de Barcala. Como recoñecemento á figura do falecido músico, o Concello decidiu que as escolas vellas, sede do centro de música, leven o seu nome e pasen a denominarse Escolas Emilio Andújar.

O acto, que terá lugar ás 12.00 horas, consistirá no descubrimento dunha placa conmemorativa e nunha lembranza por parte de antigas alumnas e ex alumnos da escola de música á figura de quen fora o seu mestre musical e director. Ademais de membros do goberno municipal, asistirán tamén familiares, ex alumnos e ex alumnas e alumnado actual, entre outros.

Emilio Constantino Andújar Riveiro foi unha persoa moi querida na Baña e un referente musical para a comarca de Barcala. Natural de Negreira amaba a música por riba de todo. Comezou a súa andaina como músico afeccionado xunto ao seu irmán nun trío tradicional de gaita, bombo e caixa, que se convertería deseguido no Sextexto Bañés, no que tocaría o bombo. O seu ingreso no servizo militar na Coruña permitiulle unirse, polos seus coñecementos previos, á Banda de Música Militar de Infantería da Coruña, reforzando os seus coñecementos de solfexo, teoría,  gaita e clarinete.

De volta do servizo militar, Emilio Andújar, que tocaba o saxo como ninguén, incorpórase ao Sindicato Nacional do Espectáculo e funda no ano 1949 a orquestra Andújar e no 1974, a orquestra Río Verde. Emilio Andújar compaxinou ata a súa xubilación a súa paixón como músico e arranxista, tocando nas orquestras, co oficio de taxista.

No ano 1981, xa xubilado, chegaríalle a proposta dun grupo de pais e nais do Colexio de San Vicente e o apoio do centro educativo para dar clases extraescolares de música. Andújar Riveiro non o dubidou e centrou a súa vida dende entón en ensinarlles o que máis amaba, a música, aos cativos e cativas da Baña. O seu labor ao longo deses anos foi vocacional e altruísta. Froito dese traballo crearíase a Banda Infantil da Baña (chamada ata 1985 Banda Infantil do Colexio da Baña, cando se desligou do centro educativo e recibiu apoio institucional). A banda dirixida por Andújar Riveiro debutaría na primavera de 1982 en Ordoeste; con ela chegou a espallar o nome do municipio por toda Galicia, España e o estranxeiro. A banda de música desenvolveu unha intensa actividade cultural e musical ao longo de 25 anos, ata a súa desaparición en 2009.

Na década dos 90, e froito da agrupación musical, crease a Escola de Música, coa incorporación do músico profesional Rafael Arosa que, xunto a Emilio Andújar e Mario Martínez formarían o cadro docente e impartirían solfexo, teoría musical e instrumento ás rapazas e rapaces da Baña.

O maxistral músico e mestre falecía en febreiro de 2019, na aldea de Rial (Ordoeste), aos 98 anos.

O Concello da Baña subliña que a homenaxe que este sábado se lle vai render á figura de Andújar Riveiro é ben merecida e convida a toda a veciñanza a sumarse ao acto.

  • A proposta foi aprobada polo equipo de goberno na sesión desta mañá e comunicado de inmediato a Deputación por ser o último dia de prazo

  • Os concelleiros do PSdeG non asistiron ao pleno

  • Hoxe fíxose efectiva a dimisión de Mónica González como concelleira

  • Aprobada a pavimentación da estrada entre Vilar da Torre e Lañas e pedir unha subvención nominativa de 200.000 euros á Deputación da Coruña

O equipo de goberno da Baña, formada por Partido Popular e Compromiso, aprobou hoxe por unanimidade conxelar o recibo do lixo para o vindeiro ano, polo que o Concello non aplicará o incremento do IPC e a veciñanza pagará as mesmas cantidades que este ano. O acordo tomouse no pleno ordinario de hoxe, ao que non asistiu ningún dos tres concelleiros socialistas. Na sesión ratificouse o convenio de Atención Temperá con Santa Comba e fíxose efectiva a renuncia de Mónica González como concelleira da Corporación, que nos últimos meses formaba parte do grupo de non adscritos, tras abandonar o socialista. O Concello comunicará a decisión á Xunta Electoral Central, que se espera remita as credenciais do seguinte candidato na lista do PSdeG, Álvaro Silva Suárez. (vídeo do pleno neste enlace).

O goberno municipal da Baña tomou a decisión de non aplicarlle a subida do IPC á taxa de actividades e servizos relacionados coa hixiene urbana (o recibo do lixo) para aliviar a economía das familias “nun contexto de forte inflación e cunha subida do IPC de setembro a setembro do 8,9%”, explicou o alcalde. Deste xeito, a veciñanza da Baña pagará en 2023 a mesma cantidade que este ano polo recibo do lixo.

O a cordo tomouse por unanimidade do equipo de goberno nun pleno ao que non asistiu ningún concelleiro do PSdeG. O alcalde, Andrés García Cardeso, xustificou que o pleno ordinario de hoxe se celebrase ás 13.30 en vez de ás 20.00 horas para poder subir o acordo plenario á plataforma Ágora e poder beneficiar así ás familias. “Tras recibir o escrito da Deputación indicando que o 30 de novembro pola tarde se pechaba a plataforma, o pasado día 21 púxenme en contacto cos portavoces dos grupos políticos para celebrar o pleno pola mañá e que puideramos subir o acordo á plataforma pola tarde. O cambio de hora do pleno foi por causa de forma maior e para beneficiar á veciñanza”, afirmou Andrés García Cardeso. 

Rematado o pleno, comunicouse o acordo á Deputación para que entre en vigor de forma inminente.

Na sesión de hoxe tamén se aprobou o proxecto para pavimentar a estrada entre Vilar da Torre e Lañas, cun orzamento de 250.213,99 euros, e  solicitar unha subvención nominativa a Deputación da Coruña por importe de 200.000 euros, polo que o Concello deberá aportar 50.213,99 para executar a obra.

García Cardeso explicou que este expediente modificouse en varias ocasións para actualizar prezos e cumprir requisitos solicitados pola Deputación, e agarda que agora se poida executar. Esta obra vai mellorar a comunicación nun tramo entre Vilar da Torre e Paramos, que é de titularidade municipal (a estrada entre Seilán e Vilar da Torre é de titularidade da Deputación).

Tamén por unanimidade se ratificou o convenio de colaboración entre A Baña e Santa Comba para financiar o servizo de atención temperá. “Houbo que modificar o convenio varias veces”, explicou o alcalde, quen asegurou que, nestes momentos, na Baña non hai ningún neno en lista de agarda que precise deste servizo.

Así mesmo, deuse conta ao pleno da renuncia como membro da Corporación de Mónica González Blanco, que foi concelleira de Cultura co goberno socialista e se pasou ao grupo mixto hai uns meses. O Concello comunicará esta decisión a Xunta Electoral Central, e solicitará as credenciais do seguinte candidato socialista nas últimas municipais, Álvaro Silva Suárez. Cando chegue a documentación, e de aceptar o cargo, Álvaro Silva incorporarase á Corporación no pleno seguinte.

Aínda que non estaba presente ningún concelleiro socialista, o secretario considerou que procedía debater a moción presentada polo PSdeG solicitando que o Concello presente un contencioso administrativo ante o TSXG, no caso de progresar a autorización para a construción do parque eólico de Troitomil, e chegar ás últimas instancias para evitar que se constrúa este parque.

A moción foi rexentada polo equipo de goberno, argumentando o alcalde que “esta moción non se atén a realidade”. García Cardeso sostén que na resolución publicada no Diario Oficial de Galicia do pasado 22 de novembro a “aprobación da declaración de impacto ambiental está condicionada a que a empresa presente documentación complementaria e se cumpran os requerimentos que figuran no documento” (a resolución pódese ler na web do Concello da Baña neste enlace).

O tenente de alcalde, César Ramos, apoiou os argumentos do alcalde e asegurou que “se o grupo socialista non ven defender a moción ao pleno non vale a pena contestarlles”.

A concelleira de Igualdade, Lorena Trillo, informou ao pleno que dende o mes de xaneiro vanse desenvolver talleres de educación emocional e educación sexual dirixidos a familias e para todo o alumnado do CPI San Vicente,  dende educación infantil. “Seguiremos traballando todos os días para fomentar a igualdade e loitar contra a violencia machista”, dixo.

Lorena Trillo fixo este anuncio durante o debate da moción presentada polo PP con motivo do Día Internacional da Eliminación da Violencia contra as Mulleres, na que insta ao Concello da Baña a comprometerse a elaborar un estudo xurídico sobre as reformas que deberán implantarse, no ámbito das ordenanzas municipais, para que teñan perspectiva de xénero e así evitar discriminacións cara as mulleres nas políticas públicas locais e nos orzamentos.

A moción, que foi aprobada por unanimidade, pide no segundo punto que dende o concello se impulse e apoie a creación e continuidade de asociacións de mulleres como espazo de participación e empoderamento feminino e apoio a outras mulleres en risco de vulnerabilidade ou violencia de xénero. A proposta inclúe tamén peticións para o Goberno central e a Xunta de Galicia.

20221130 pleno Bana recibo lixo sen grupo socialista 1

  • O segundo galardón recaeu no ‘cocido en camisa’ do bar O Muíño

  • O xurado decidiu outorgar o premio simpatía á ‘empanada de millo’ de Casa Morena 

  • Elvis Rodríguez Fernández e Sofía Vázquez Mayo foron os gañadores dos sorteos para o público dunha noite de aloxamento nunha casa de turismo rural do municipio 

  • O alcalde, Andrés García, e a concelleira de Cultura, Lorena Trillo, entregarán hoxe os premios 

20221212 xurado ABana Tapas pola esquerda guillermo gomez e Jose manuel Mallon

O primeiro concurso de tapas ABaña Tapas xa ten gañador. A votación do xurado profesional (que valía un 55% da nota) e do público (que representaba o 45% restante) designou como mellor tapa a proposta culinaria presentada pola Taberna do Barro (O Barro) co nome de empanadilla de Marina. O gañador recibirá os 450 euros co que está dotado este primeiro premio. O segundo galardón recaeu no cocido en camisa, do bar O Muíño (San Vicenzo), que percibirá 250 euros.

Segundo explica a concelleira de Cultura, Lorena Trillo, o xurado, tanto o profesional como o do público, tiveron dificultades á hora de elixir a tapa do segundo premio, “dada a calidade das preparacións, polo que o Concello decidiu outorgarlle o premio simpatía á empanada de millo que presentou ao concurso Casa Morena”, subliña a concelleira. Este establecemento hostaleiro recibirá unha peza de artesanía galega.

O Concello da Baña tamén deu a coñecer aos ganadores dos dous sorteos premiados cunha noite de aloxamento para dúas persoas na casa rural A Ribeira do Tambre (Troitosende) e na Casa do Folgo (Ordoeste). As persoas afortunadas foron Elvis Rodríguez Fernández e Sofía Vázquez Mayo. O requisito imprescindible para poder participar neste sorteo, destinado ao público, era ter selado o Pasaporte de tapas en todos os locais que participaron neste primeiro concurso ABaña Tapas.

O alcalde, Andrés García Cardeso, e a concelleira de Cultura, Lorena Trillo, visitarán hoxe os locais gañadores para entregarlles os seus respectivos premios. Tamén obsequiarán cun agasallo ás persoas propietarias das dúas casas de turismo rural que se implicaron no sorteo para o público participante no concurso de tapas, agradecéndolles deste xeito a súa colaboración.

Cómpre subliñar que o xurado profesional contou con recoñecidos expertos como José Manuel Mallón Ardións, cociñeiro do espazo gastronómico Remollo e embaixador de Experiencias de Calidade de Galicia; e Guillermo Gómez Lestón, director de operacións de Oca Hoteles.

ABaña Tapas celebrouse durante as tres primeiras fins de semana de novembro e tiña por obxecto incentivar o produto de tempada e de proximidade, poñer en valor a gastronomía do municipio e revitalizar o turismo.

Nesta primeira edición do concurso gastronómico participaron un total de cinco locais de distintos puntos do municipio. Taberna do Barro (O Barro) ofreceu follado de rinchas e empanadilla de Marina; Casa Morena (Corneira) elaborou follado e empanada de millo; Parrillada O Barro (O Barro) preparou parrilla; O Arranca (Ordoeste) apostou por empanada de millo con xoubas e croquetas de champiñóns con xamón, e O Muíño (San Vicenzo) optou por cocido en camisa e bruschetta.

  • O alcalde  remarca que o informe da Xunta non é unha aprobación, porque está condicionado a que se cumpran os requisitos que figuran no documento publicado no DOG

 20221123 DIA PE Troitomil

 

 

Os técnicos municipais do Concello da Baña está na analizar en profundidade o informe de 30 páxinas coa declaración de impacto ambiental (DIA) formulada pola Dirección Xeral de Calidade Ambiental, Sostibilidade e Cambio Climático da Consellería de Medio Ambiente, Territorio e Vivenda, e que saíu onte publicado no Diario Oficial de Galicia (DOG). O informe íntegro pode descargarse dende a páxina da Consellería (neste enlace) ou dende o arquivo adxunto.

O alcalde, Andrés García Cardeso, remarca que o informe da Xunta non representa unha aprobación formal do mesmo, senón que a súa aprobación está supeditada a que se cumpran os condicionados que figuran ao longo do documento.

Na declaración publicada no DOG, a Dirección Xeral resolve “Formular a declaración de impacto ambiental do parque eólico Troitomil, considerando que o proxecto é ambientalmente viable sempre que se cumpra, ademais do recollido no estudo de impacto ambiental e a restante documentación avaliada, o condicionado que figura ao longo deste documento, tendo en conta que no caso de que exista contradición entre eles, prevalecerá o disposto” nesta declaración de impacto ambientel.

Na mesma resolución, a xunta establece que “ademais do obrigado cumprimento das condicións sinaladas” no documento, “se se manifesta calquera tipo de impacto non considerado ata o momento, este órgano ambiental poderá ditar, do xeito que proceda, os condicionados adicionais que resulten oportunos”.

Andrés García Cardeso pediulle aos técnicos municipais que analicen en profundidade esta declaración de impacto ambiental para poder presentar as reclamacións que sexan necesarias cando sexa o momento oportuno.