- Detalles
- Escrito por Alicentis
- Categoría: novas
- Visitas: 495
-
As parroquias de Marcelle e de Suevos disporán desta rede a partir do 10 de agosto, segundo lle informaron ao Concello //
Telefónica vén de confirmarlle ao Concello da Baña que a parroquia do Barro conta xa con cobertura de fibra óptica o que lle permitirá dispoñer dun bo acceso a internet e dunha mellor cobertura móbil. Ademais, e segundo comunicáronlle ao alcalde, Andrés García Cardeso, dende a dirección xeral de Telefónica en Galicia, as parroquias de Marcelle e de Suevos disporán da rede ultrarrápida de fibra óptica a partir do 10 de agosto.
Con estas actuacións, consideradas prioritarias por parte do Concello, preténdese dotar a todo o rural bañense das ferramentas necesarias para que toda a veciñanza dispoña en igualdade de condicións ca das zonas urbanas de acceso á internet e de cobertura 4G, eliminando deste xeito as barreiras dixitais.
A pretensión do Concello da Baña é cubrir todos os puntos do municipio e neste obxectivo levan xa traballando meses. Lembrar que o pasado mes de febreiro, o Concello asinaba un convenio de colaboración co teleoperador neutro de comunicacións Rede Aberta para despregar no municipio unha rede ultrarrápida de fibra óptica ao obxecto de dotar á Baña de infraestruturas precisas para que calquera compañía puidese logo prestar o servizo coa maior calidade. Estableceuse así un mapa de áreas prioritarias de actuación para cubrir as zonas brancas, ás que non chega a fibra nin entran nos plans de execución.
- Detalles
- Escrito por Alicentis
- Categoría: novas
- Visitas: 469
O Pleno da Corporación da Baña aprobou onte de maneira definitiva a ordenanza reguladora do Punto de Atención á Infancia (PAI), ao atender dúas das reclamacións presentadas para que se lle dea tamén prioridade no momento da matrícula aos fillos e fillas das persoas que traballan no Concello da Baña. A ordenanza foi aprobada cos votos a favor do equipo de goberno (6) e a abstención do grupo socialista (4).
Por unanimidade da Corporación aprobouse autorizar a un traballador municipal para que poida dar clases nun máster da USC no último trimestre deste ano.
No capítulo de rogos e preguntas, entre outros temas, o portavoz socialista, José Antonio Pereira, preguntou por unhas facturas da Universidade de Santiago sobre a minoración da pobreza enerxética. O alcalde, Andrés García Cardeso, respondeulle que se corresponde co asesoramento e a tramitación do nono eléctrico que están a facer coa veciñanza da baña. “A solicitude do bono eléctrico aumentou un 300% grazas a este asesoramento, e moitos veciños viron rebaixada a factura da luz”, engadiu o alcalde.
Pereira Gil tamén preguntou porqué se lle cobra 30 euros mensuais ás familias polos cursos de natación, cando noutros concellos son máis baratos. García Cardeso respondeulle que o goberno está a “aplicar a ordenanza municipal que foi aprobada polo goberno socialista, que establece 30 euros polos cursos de natación e 100 euros mensuais polos campamentos”.
- Detalles
- Escrito por Alicentis
- Categoría: novas
- Visitas: 317
-
O alcalde da Baña, Andrés García Cardeso, recibiu ao delegado da Xunta na Coruña //
-
Estes programas contaron cun apoio da Xunta de 376.000 euros financiados pola Consellería de Promoción do Emprego e Igualdade //
-
Os/as alumnos/as da Baña realizaron actuacións na escola de Corneira, crearon un parque micolóxico na finca Pedra Miñata, melloras nas áreas recreativas de Fiopáns, Chousa e Chans e o mantemento da vía Mariana //
O alcalde da Baña, Andrés García Cardeso, recibiu este mércores, 20 de xullo, ao delegado da Xunta na Coruña, Gonzalo Trenor e o acompañou na súa visita aos alumnos e ás alumnas do obradoiro de Promoción 2021 centrado en Actividades Auxiliares en Conservación e Mellora de Monte e en Operacións Auxiliares de Revestimentos Continuos en Construcións. Este programas contaron cun apoio da Xunta de 376.000 euros, financiados pola Consellería de Promoción do Emprego e Igualdade.
Na visita tamén participaron a alcaldesa de Santa Comba, María Josefa Pose Rodríguez; o alcalde de Val do Dubra, José Manuel Varela Ferreiro; a primeira tenente de alcaldesa de Negreira; María del Mar García Vidal; así como membros da Corporación da Baña, entre outros.
O delegado da Xunta na Coruña destacou o compromiso dos concellos da Baña, Val do Dubra, Negreira e Santa Comba, asociados para sacar adiante este taller coa empregabilidade porque levan anos de traxectoria de formación contrastada nesta materia e conseguen importantes niveis de éxito nos diferentes programas de formación que afrontan.
Tenor explicou a gran utilidade deste tipo de formación, que está a piques de rematar, porque mellora as capacidades para que as persoas sen emprego atopen un traballo, xa que inclúe tarefas nos concellos e prácticas nas empresas da contorna. Concretamente, no Concello da Baña os/as alumnos/as realizaron actuacións na escola de Corneira, crearon un parque micolóxico na finca Pedra Miñata, realizaron o mantemento da vía Mariana e levaron a cabo actuacións de mellora nas áreas recreativas de Fiopáns, Chousa e Chans.
O delegado da Xunta apuntou que o Goberno galego “seguirá a apostar por estes programas nunha nova convocatoria para o 2023, xa que estes obradoiros son un dos mellores e máis efectivos instrumentos para axudar ás persoas sen emprego a atopar un traballo na súa contorna e en áreas con alta demanda de profesionais”. Tamén indicou que na comarca de Santiago estanse a desenvolver 10 obradoiros de emprego, para os que a Xunta reserva 3,5 millóns de euros para mellorar a formación de 184 desempregados.
- Detalles
- Escrito por Alicentis
- Categoría: novas
- Visitas: 439
-
Os afectados reafirmaron ante o conselleiro de Industria, Francisco Conde, o rexeitamento á declaración de utilidade pública do parque de Troitomil
-
O vicepresidente primeiro do Goberno galego comprométese a estudar as alegacións e a revisar o proxecto
O alcalde da Baña, Andrés García Cardeso, o seu homólogo de Val do Dubra, Juan Manuel Varela Ferreiro, así como representantes das asociacións veciñais O Outeiro, de San Mamede de Monte; A Fonte Seca e Ventolibre, de San Román mantiveron este mércores unha xuntanza co vicepresidente primeiro da Xunta e conselleiro de Economía, Industria e Innovación, Francisco Conde, ao obxecto de trasladarlle a necesidade de paralizar a tramitación do parque eólico de Troitomil e dos demais parques que se queren implantar na comarca, ata que se “adapte a lei á situación actual”.
Na reunión tamén estiveron presentes a secretaria xeral de Industria, Paula Uría Traba; o director xeral de Planificación Enerxética e Recursos Naturais, Pablo Fernández Vila, e o delegado da Xunta na Coruña, Gonzalo Trenor.
Os afectados reafirmaron ante o vicepresidente primeiro da Xunta o rexeitamento unánime da veciñanza e das forzas políticas da Baña contra a declaración de utilidade pública do parque eólico de Troitomil, publicada o pasado 16 de xuño, así como contra todos os procesos que están en marcha e que afectan ao municipio da Baña.
O conselleiro de Industria escoitou as demandas presentadas e todas as sensibilidades. Segundo trasladou o alcalde da Baña, Conde comprometeuse a estudar todas as alegacións e a dar resposta a cada unha delas, así como a revisar e estudar con detemento o proxecto. “O conselleiro comprometeuse a mirar con lupa todo o proceso e as alegacións”, recalcou o rexedor da Baña.
“Valoramos positivamente esta xuntanza xa que é un problema serio e de vital importancia porque compromete ó noso concello, á nosa veciñanza e á toda a contorna” subliñou Andrés García Cardeso, que lembra o proceso está na fase inicial e que o prazo para presentar alegacións á declaración de utilidade pública do parque eólico remata o 1 de agosto.
O alcalde da Baña indicou que entre os principais argumentos expostos contra a tramitación da declaración de utilidade pública do parque eólico de Troitomiil e todos os que se están a tramitar ou solicitar no municipio atópanse que o proxecto afecta a unha ampla zona arqueolóxica, á mananciais e que altera substancialmente a modificación do solo nunha ampla zona devastada polos incendios en 2006 e unha alteración significativa sobre o PXOM, xa que supón un cambio total sobre boa parte dos terreos e das construcións xa existentes. Cómpre lembrar que o Concello da Baña está pendente dos informes que solicitou á Consellería de Medio Ambiente e a unha arqueóloga.
Presentación de alegacións
Tal e como se acordou no pleno do 30 de xuño, o Concello da Baña mantén a disposición da veciñanza un equipo técnico para axudarlles a presentar e tramitar as alegacións pertinentes contra a declaración de utilidade pública do parque eólico de Troitomil. Tamén está posta a disposición de toda a veciñanza un modelo tipo de alegación (que pode descargarse da páxina web).
Ademais de no rexistro ou na sede electrónica da Xunta de Galicia, as reclamacións pódense presentar tamén no rexistro do Concello da Baña. O equipo de goberno recomenda á cidadanía que non agarde ao último día, o 1 de agosto, para presentar ditas alegacións e que poden acudir aos técnicos municipais para facer os trámites necesarios para presentalas.
- Detalles
- Escrito por Alicentis
- Categoría: novas
- Visitas: 423
-
O conselleiro de Industria, Francisco Conde, escoitará de primeira man o rexeitamento a declaración de utilidade pública do parque de Troitomil
-
O prazo para presentar alegacións remata o 1 de agosto
-
O Concello pon a disposición da veciñanza un modelo tipo de alegacións, que se pode descargar dende a páxina web
-
Haberá xuntanzas informativas en Lañas, o día 12; San Mamede de Monte, o 13, e en Fiopáns, o día 14
-
A veciñanza poderá consultar dúbidas por correo electrónico ao avogado Borxa Colmenero, de Acouga
En dúas semanas o vicepresidente primeiro da Xunta e conselleiro de Industria coñecerá de primeira man o rexeitamento unánime da veciñanza e das forzas políticas da Baña contra a tramitación de parques eólicos no municipio. O Concello pon a disposición das persoas afectadas un modelo tipo de alegación para presentar contra a declaración de utilidade pública do parque eólico de Troitomil (o prazo para reclamar remata o 1 de agosto). Ademais de solicitar informes a Consellería de Medio Ambiente e a unha arqueóloga, dende o goberno municipal chegaron a un acordo do avogado de Acouga, Borxa Colmenero, para que atenda por correo electrónico as dúbidas dos e das bañenses.
O mércores día 20, pola tarde, o conselleiro de Industria, Francisco Conde, recibirá ao alcalde da Baña e a representantes das asociacións de veciños O Outeiro, de San Mamede de Monte, e A Fonte Seca. Na xuntanza o conselleiro coñecerá de primeira man cales son os argumentos do Concello da Baña e da veciñanza contra a tramitación da declaración de utilidade pública do parque eólico de Troitomil e de todos os que se están a tramitar ou solicitar no municipio da Baña. Como quedou ratificado no último pleno, a Corporación da Baña e os representantes sociais pediranlle ao vicepresidente da Xunta que paralice todos os procesos que están en marcha.
Dende o Concello tamén se solicitou unha entrevista co presidente da Deputación, Valentín González Formoso, para solicitar o apoio do organismo provincial, pero de momento non se obtivo resposta.
Charlas informativas polas parroquias
Ademais de solicitar estas entrevistas, que figuraban na declaración institucional aprobada por unanimidade no pleno do pasado 30 de xuño, dende o goberno municipal organizáronse tres charlas para informar á veciñanza das medidas adoptadas, cales son os dereitos que os asisten, como presentar alegacións e o asesoramento que o Concello pon a súa disposición.
A primeira destas xuntanzas celebrarase o vindeiro martes, día 12, no local social de Lañas, a partir das 20.00 horas. O mércores 13 a reunión será en San Mamede de Monte (19.00 horas tamén no local social). O xoves, día 14, a xuntanza vaise celebrar no local social de Fiopáns ás 20.00 horas.
De xeito paralelo, o equipo de goberno chegou a un acordo con Borxa Colmenero, avogado e membro da asesoría xurídica da Asociación Galega de Consumidores e Usuarios (Acouga), que asesorá a todos os veciños e veciñas da Baña que teñan dúbidas de cales son os seus dereitos e de como presentar alegacións. As persoas interesadas deberán enviarlle un correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. Invitado pola Asociación O Outeiro, Borxa Colmenero ofreceu o pasado 7 de abril na Baña unha charla sobre os dereitos da veciñanza diante da implantación de parques eólicos no municipio (ver vídeo neste enlace).
O Concello xa solicitou tamén á Consellería de Medio Rural un informe que acredite todos os incendios acontecidos no municipio nos últimos 35 anos nos terreos afectados. Por outra banda, unha arqueóloga está elaborando un informe sobre o impacto dos parques eólicos nas parroquias que están dentro da poligonal do parque eólico de Troitomil.
O obxectivo destes informes, e dos que están a preparar os técnicos municipais, e demostrar que a autorización do parques eólico en Troitomil incumpriría a lexislación vixente e alteraría o Plan Xeral de Ordenación Municipal (PXOM).
Alegación tipo a disposición da veciñanza
O equipo xurídico municipal está preparando as alegacións do Concello para recorrer a declaración de utilidade pública. Ao mesmo tempo, o equipo municipal de urbanismo asesorará a aquelas persoas que precisen axuda para tramitar as alegacións que estimen oportunas. Para falar cos técnicos recoméndase solicitar cita previa no 981 88 65 01.
Xunto a estas medidas, que dan cumprimento ao acordo adoptado no pleno do pasado día 30 de xuño, o equipo de goberno pon a disposición de toda a veciñanza un modelo tipo de alegación contra a declaración de utilidade pública do parque eólico de Troitomil (o modelo pódese descargar na páxina web do Concello da Baña).
O prazo para presentar as alegacións remata o vindeiro 1 de agosto. Ademais de no rexistro ou na sede electrónica da Xunta de Galicia, as reclamacións pódense presentar tamén no rexistro do Concello da Baña. Dende o goberno local recomendan á veciñanza que non agarde ao último día para presentar ditas alegacións, e ofrecen a axuda dos técnicos municipais para facer os trámites necesarios para presentalas.
 Modelo_alegacion_contra_parque_eolico_Troitomil | [ ] | 67 kB |