- Detalles
- Escrito por Alicentis
- Categoría: Cultura e educación
- Visto: 1829
O pleno da Corporación da Baña aprobou esta mañá por unanimidade solicitar a implantación do ciclo medio de Atención a Persoas con Dependencia no IES Xulián Magariños de Negreira. Deste xeito, a Corporación apoia a iniciativa presentada polo director do instituto, Adelino Pose, para ampliar a oferta educativa no instituto, que xa foi secundada tamén polo Concello de Negreira e outras entidades.
Adelino Pose, que asistiu ao pleno desta mañá, considera que hai demanda suficiente para poñer en marcha este ciclo de grao medio xa no vindeiro mes de setembro. Nestes momentos non hai na contorna ningún ciclo medio para formar a mozos e mozas na atención á persoas en situación de dependencia. “Serían trinta prazas e penso que se cubrirían sen ningún problema”, explicou o director do centro, que engadiu que este ciclo tería unha duración de dous cursos, cunhas dúas mil horas de formación.
O departamento de Servizos Sociais da Baña emitiu un informe favorable a esta iniciativa, porque contribuirá a “mellorar a atención ás persoas en situación de dependencia e porque supón unha oportunidade de saída laboral para a xuventude”. Os tres grupos municipais votaron a favor desta iniciativa.
Cos votos do equipo de goberno (PP) e PSdeG aprobouse unha moción que solicita a equiparación salarial entre guardias civís, policías nacionais, mozos de escuadra (policía catalana) e ertzainas (policía vasca), que foi presentada no concello pola Asociación de Justicia Salarial de la Guardia Civil. O concelleiro de Compromiso por Galicia abstívose.
Á moción de CxG para subir as pensións engadíuselle unha emenda do PP, apoiada polo PSdeG, na que se lle pide a todos os partidos políticos que cheguen a acordos no Pacto de Toledo para garantir o sistema público de pensións.
Tamén foi aprobada por unanimidade a moción do PSdeG reclamándolle a Correos que amplíe o horario de atención ao público na oficina da Baña, xa que agora mesmo é de só unha hora a o día, de luns a venres (de 09.00 a 10.00 horas).
- Detalles
- Escrito por Alicentis
- Categoría: Cultura e educación
- Visto: 1384
O prazo de solicitude de admisión e de renovación de praza no Punto de Atención á Infancia (PAI) do Concello da Baña abrirá proximamente.
Con capacidade para 20 nenos e nenas de entre 3 meses e 3 anos, o PAI está situado en San Mamede de Monte. O horario de apertura é de 7.45 a 15.45 horas, de luns a venres, agás o mes de agosto, no que permanece pechado.
As persoas interesadas poden informarse no servizo de Educación Familiar do Concello da Baña ou nos teléfonos 981 817 605 - 608 819 741.
- Detalles
- Escrito por Alicentis
- Categoría: Cultura e educación
- Visto: 1809
A Biblioteca Escolar do CPI San Vicente, en colaboración co Concello da Baña, organiza unha saída fotográfica o sábado 24 de febreiro para aprender nocións básicas de técnicas da imaxe. O evento forma parte dun concurso fotográfico organizado polo centro escolar para conmemorar o Día da Auga. A participación está aberta a todas aquelas persoas, maiores e pequenos, interesadas en pasar unha mañá de sábado de natureza e fotografía.
As persoas participantes daranse cita na Casa da Cultura ás dez da mañá para, desde alí, dirixirse camiñando ata o río Albariña. O tema central do concurso de fotografía Auga é o líquido elemento, polo que este debe ser o protagonista das imaxes: ríos, saltos, regatos, muíños, pontes, fontes, pozas, lavadoiros...
O prazo de presentación de fotografías para este concurso remata o venres 16 de marzo. Haberá tres categorías, cada unha con tres premios: Educación Primaria, ESO e adultos. As imaxes que participen no certame serán expostas nos corredores do CPI San Vicente e aquelas que sexan seleccionadas ilustrarán o libro Auga, que recollerá tamén unha escolma de literatura oral da contorna relacionada coa auga.
Máis información: Facebook da Biblioteca Escolar CPI San Vicente.
- Detalles
- Escrito por Alicentis
- Categoría: Cultura e educación
- Visto: 3299
Duascentas persoas participaron esta mañá na homenaxe que a Asociación de Veciños Nosos Aires lles rendeu aos músicos da parroquia bañesa da Riva. No campo de Carballeira reunironse nenos e nenas, mozos e mozas e persoas maiores para gozar dun día de festa no que a música foi a protagonista. Entre os homenaxeados nesta iniciativa chamada “100 anos de música en A Riva” atopábanse Eduardo Recarey, que aos seus 84 anos segue tocando na Banda de Negreira, e Inés e Silvia Capelo, de 27 e 32 anos, que formaron parte da Banda de Música da Baña.
“Os músicos, tanto os compositores como os intérpretes, son uns artistas que logran, a través dos seus compases, dar o mellor de sí mesmos, e transmitir todo un sentimento e emoción que sólo se consegue facer a través da música”, indicou José Manuel Ramos Freita, presidente da asociación de veciños e promotor desta iniciativa, que contou coa colaboración do Concello da Baña.
No campo da festa de Carballeira, na parroquia da Riva, deronse cita esta mañá Constantino, Daniel, Manolo Daniel, Ramón C., José García, Sarito, Secundino R., Pepe Cabreso, J.M. Pereira Silva ou José Agustín. Todos eles músicos, algúns aínda en activo, aos que a organización lles entregou unha placa conmemorativa da iniciativa.
Como recordaba o propio Ramos Freita, este acto “é emocionante para todos, porque puidemos revivir a importancia que esta parroquia tivo no seu día, precisamente nun lugar, o Campo de Carballeira, no que os veciños máis vellos recordan que se celebraba unha das feiras máis grandes da comarca de Barcala”.
Os actos comenzaron cunha misa cantada e a sesión vermú animada por Os Campantes da Baña. Despois da comida que ofreceu pulpería Veloso (empanada, polbo a feira e carne ao caldeiro) a Charanga Os Celtas e o dúo Amenal amenizaron a tarde con boa música. Algúns dos homenaxeados tamén se animaron a amosar as súas habilidades.
Na parroquia de A Riva naceron instrumentistas que fixeron carreira en formacións clásicas de música galega coma Los Españoles, Xuntanza, Compostela, Oriente, Dinámicos ou a desaparecida Banda Municipal da Baña. Pianistas, saxofonistas, guitarristas e cantantes, desta localidade barcalesa de pouco máis de cen habitantes partiron multitude de talentos que fixeron carreira tanto en orquestras coma en conxuntos de música moderna, galegos e do estranxeiro.
Ramos Freita non descarta repetir o ano que ven unha iniciativa similar, incluso ampliandoa a toda a comarca da Barcala.
Máis fotos deste evento na páxina de Facebook do Concello da Baña (preme neste enlace)
- Detalles
- Escrito por Alicentis
- Categoría: Cultura e educación
- Visto: 2601
O concurso de Entroido organizado polo Concello da Baña reuniu o Sábado de Piñata na Praza do Concello, en San Vicenzo, a multitude de persoas. A vistosa comparsa dos Xigantes venecianos foi a gañadora en dúas categorías, comparsa e carroza, mentres que os galardóns individuais recaeron na Pequena domadora e o leonciño, en infantil, e no Carro romano, en adulto. En total, o Concello da Baña repartiu preto de 1.700 euros en premios.
O desfile concentrouse nas rúas Xacinto Rodríguez, Praza do Concello e rúa Tedelle. Xa no polideportivo, houbo animación para os máis pequenos mentres o público agardaba polo veredicto do xurado, que lle outorgou o galardón principal das categorías de comparsa e carroza a Os xigantes venecianos. Os segundos clasificados na modalidade de comparsas foron Os habitantes das fragas, mentres que Os robotitos acadaron a terceira posición, e Os xubilados pola Baña foron cuartos. Na categoría de carrozas, A Baña en obras quedou en segundo lugar, seguidos por Canta Landeira e Os esquimós. Finalmente, os premiados polo mellor disfrace individual foron A Pequena domadora e o leonciño, en infantil, e O carro romano, en adulto.
Podes ver unha ampla selección de fotos do desfile na páxina oficial do Concello da Baña en Facebook (preme aquí)
