Detalles

Escrito por Alicentis

Categoría: novas

Published: 04 Abril 2024

Visitas: 122

• O municipio fai parte do proxecto provincial Concello Dixital para impulsar a dixitalización das entidades locais

• A Baña avanza tamén na mellora da seguridade das telecomunicacións

O Concello da Baña segue avanzando con éxito no seu proceso de transformación dixital, unha iniciativa que busca modernizar a administración municipal e mellorar a atención á cidadanía. Os cambios realizados ao abeiro do proxecto provincial Concello Dixital buscan facer máis eficiente a xestión dos servizos públicos.

Neste sentido, activáronse novos procedementos de tramitación en liña e ampliouse o catálogo da Sede Electrónica, facilitando así o acceso aos servizos municipais por parte dos veciños e veciñas. Ademais, este proceso de transformación conta coa colaboración directa dos traballadores e traballadoras municipais, implicándoos activamente na implementación das novas ferramentas e procedementos.

Por outra banda, o Concello da Baña está a dar pasos importantes para mellorar a seguridade das súas telecomunicacións. Tralo acordo do Pleno celebrado en febreiro, o Concello adheriuse á Oficina Técnica de Ciberseguridade Provincial da Deputación da Coruña, transferindo á entidade provincial a seguridade das infraestruturas de telecomunicacións locais. A nova política de seguridade ten como obxectivo reforzar a protección dos sistemas e redes do concello ante posibles ciberataques.

Estas accións enmárcanse no proxecto Concello Dixital impulsado pola Deputación da Coruña, que ten como obxectivo acompañar as entidades locais no proceso de transformación cara á plena dixitalización. O Concello da Baña, a través da concellería de Contas, comunicación e novas tecnoloxías, reafirma así o seu compromiso coa modernización e a seguridade dixital, sumándose ás iniciativas da Deputación para fortalecer a dixitalización e a ciberseguridade nos concellos da provincia.

Detalles

Escrito por Alicentis

Categoría: novas

Published: 28 Febreiro 2024

Visitas: 627

• O pregón correrá a cargo da artesá zoqueira Elena Ferro

• Agrupacións de música tradicional e charangas animarán a xornada

• Haberá mercado de artesanía, espazo infantil e postos de comida

A Baña acollerá o domingo 17 de marzo a vixésima edición da Festa da Filloa da Pedra, un evento organizado polo Concello da Baña que terá como pregoeira á zoqueira Elena Ferro. O pavillón de San Vicenzo será o escenario principal desta celebración, que ofrecerá un variado programa de actividades para todas as idades, incluíndo música tradicional, exhibicións e mercado de artesanía e, por suposto, a degustación das deliciosas filloas da pedra típicas do municipio.

O pavillón de San Vicenzo abrirá as súas portas ás 9.30h para acoller un encontro anual que pon en valor un dos elementos máis representativos da gastronomía bañense: a filloa da pedra. Organizado pola Concellería de Acción Social, Cultural e Servizos á Cidadanía, este ano contará cun pregón moi especial a cargo de Elena Ferro, unha destacada artesá dos zocos galegos, que compartirá a súa paixón polo oficio tradicional e a súa visión innovadora.

O programa está repleto de actividades para todas as idades e gustos. Desde a apertura de portas ás 9.30h, os asistentes poderán desfrutar da música tradicional coas actuacións dos Gaiteiros e Pandereteiras da Baña e coa charanga Os Celtas. Ás 12.00h, o grupo Río de Anxo deleitará ao público con ritmos galegos en San Vicenzo. A acción volverá ao pavillón ás 13.30h, co pregón de Elena Ferro.

A partir das 16.00h, a foliada continuará con máis música, incluíndo a actuación de CantoenCanto e os Gaiteiros da Baña, Cé Orquestra Pantasma, os ritmos contaxiosos dos Tabernícolas do Leiradal e a enerxía de Mekánika Rolling Band.

Ao longo do día, os asistentes poderán gozar dunha mostra de artesanía en vivo, actividades infantís, mercadiño de artesanía, exhibición do Club Petanca Negreira e, por suposto, a degustación das deliciosas filloas da pedra, que poderán acompañarse de racións de orella e chourizos, e que fan desta festa un evento único na nosa contorna. Haberá tamén polbeiro.

Detalles

Escrito por Alicentis

Categoría: novas

Published: 21 Marzo 2024

Visitas: 256

• A Corporación aproba tamén un convenio de colaboración con Negreira para a contratación de persoal de orientación laboral

• O alcalde, José Antonio Pereira, subliña que “a alianza entre concellos é fundamental para impulsar proxectos de interese común”

• O Pleno comeza cun minuto de silencio en repulsa polo asasinato machista dunha moza de Ribeira

• Os tres grupos políticos consensúan unha declaración institucional polo Día da Muller

O Concello da Baña solicitará xunto con outros catro municipios a subvención do Instituto Enerxético de Galicia para contratar unha asistencia técnica na licitación do alumeado público. No pleno ordinario celebrado este mércores 20 de marzo, que comezou cun minuto de silencio en memoria da moza de Ribeira Andrea Yturry e como repulsa deste asasinato machista, tamén se aprobou a declaración institucional do Día da Muller e déuselle luz verde ao convenio con Negreira para a contratación de persoal de orientación laboral.

Os membros da Corporación bañense aprobaron por unanimidade a adhesión ao convenio de colaboración para tramitar de forma conxunta unha solicitude de axuda para a planificación enerxética de entidades locais. Este acordo implica unha colaboración estreita entre os municipios da Baña, Negreira, Val do Dubra, Brión e Paderne e ten como obxectivo facilitar a contratación dos servizos xurídicos e técnicos para mellorar a planificación enerxética e a contratación das subministracións así como promover o aforro enerxético. O alcalde, José Antonio Pereira, destacou a importancia da colaboración interinstitucional para obter recursos e financiamento, subliñando que “esta alianza entre concellos é fundamental para impulsar proxectos de interese común”.

Na sesión de onte tamén se aprobou o convenio de colaboración entre os concellos de Negreira e A Baña para a contratación de persoal técnico de orientación laboral, co obxectivo de promover a inserción laboral e a orientación profesional na comarca. Este convenio permitirá que a persoa contratada preste servizo un día á semana na Baña, o que “redundará na calidade dos servizos ofrecidos á veciñanza, evitando desprazamentos a Negreira”, incidiu José Antonio Pereira.

O convenio implica a solicitude dunha subvención á Consellería de Promoción do Emprego e Igualdade da Xunta de Galicia, cun montante de 28.000 €, que representa o 71% do custo total do servizo. Dos 11.441 € restantes, o Concello de Negreira contribuirá cun 80% da achega, mentres que o Concello da Baña contribuirá co 20% restante, que supón 2.288 €.

Ademais, aprobouse unha declaración institucional polo Día Internacional da Muller, 8 de marzo, que foi consensuada polos tres grupos políticos e lida no pleno polo concelleiro Alberto Blanco. A declaración destaca o compromiso do Concello en promover a igualdade de xénero, loitar contra a violencia e crear unha sociedade máis inclusiva. Entre os compromisos asumidos resalta a promoción de plans de conciliación, modelos alternativos de coidados e a inserción laboral das mulleres no tecido económico local. Tamén incrementar a colaboración coas asociacións de mulleres do municipio para promocionar a igualdade en todos os ámbitos e promover a adhesión dos negocios locais ao Protocolo de actuación contra as violencias sexuais e LGTBIfóbicas.

A moción presentada polo Partido Popular sobre a normativa dos galiñeiros de autoconsumo foi aprobada cos votos a favor dos 5 edís do PP e a abstención de PSdeG e BNG. A moción insta ao Goberno a modificar o decreto que establece as normas básicas de ordenación das granxas avícolas, co obxectivo de suprimir a obrigatoriedade de rexistro das explotacións avícolas para autoconsumo. O PSdeG abstívose por considerar que está "fóra de tempo". A este respecto, José Antonio Pereira aclarou que "dende o Concello estamos colaborando cos veciños para axudarlles a facer ese trámite de inscrición no rexistro de explotacións ". Mónica González (BNG) tamén se abstivo argumentando que "chega tarde", ao tempo que recordou que é "unha norma que invade competencias galegas e non se axusta á nosa realidade ".

A moción do PP sobre o apoio ao sector gandeiro foi aprobada por unanimidade. Na mesma, denúnciase o aumento da carga burocrática para o sector e esíxese unha moratoria da normativa europea.

Na parte de rogos e preguntas tratáronse diversos temas de interese para a veciñanza, como os labores de mantemento e limpeza de camiños e zonas do concello, así como a axilización dos trámites de dependencia en Servizos Sociais.

Detalles

Escrito por Alicentis

Categoría: novas

Published: 08 Febreiro 2024

Visitas: 142

• O alcalde José Antonio Pereira Gil, xunto á subdelegada do Goberno na Coruña, María Rivas, e a concelleira Mónica González, presentaron o proxecto na Biblioteca Municipal 

• O obxectivo e promover a reflexión, a sensibilización e a concienciación sobre as situacións de vulnerabilidade das propias mulleres

O alcalde da Baña, José Antonio Pereira Gil, xunto á subdelegada do Goberno na Coruña, María Rivas, e a concelleira de Acción social, cultural e servizos a cidadanía, Mónica González, presentaron hoxe na Biblioteca Municipal Mavi: a maleta viaxeira contra a violencia de xénero.

A iniciativa promovida pola Subdelegación do Goberno achega á veciñanza libros de diferentes temáticas relacionadas co feminismo, a igualdade, o empoderamento, a autoestima ou a violencia machista.

A maleta conta con catorce libros coa idea de que todas as mulleres, independentemente da franxa de idade, poidan formar parte do proxecto.

O obxectivo e promover a reflexión, a sensibilización e a concienciación sobre as situacións de vulnerabilidade das propias mulleres así como o intercambio de ideas sobre as lecturas e experiencias neste tema.

Entre as obras que garda a maleta atópanse títulos como A historia dos bonobos con lentes, Cuentos de buenas noches para niñas rebeldes ou Las chicas son guerreras: 26 rebeldes que cambiaron el mundo.