- Detalles
- Escrito por Alicentis
- Categoría: Emprego e Desenvolvemento INICIO
- Visto: 633
24 de xuño de 2024
Publícase o decreto coa proposta de contratación das persoas integrantes da brigada de prevención contra os incendios forestais do Concello da Baña para o ano 2024: un/ha xefe/a de brigada, un/ha peón/a condutor/a e tres peóns/as de brigada. Así mesmo, apróbase e publícase a listaxe de persoas coas que se formará unha bolsa de traballo para cubrir as vacantes que eventualmente puideran xurdir, ou para atender necesidades de emerxencia e imprevistos en xeral.
O decreto pode consultarse en arquivo adxunto ou premendo nesta ligazón.
21 de xuño de 2024
Faise pública a resolución da Alcaldía coa listaxe definitiva de persoas admitidas para participar no proceso de actualización das bolsas de traballo temporal para as prazas de xefe/a de brigada, peón/peoa condutor/a e peóns/peoas de brigada de incendios ao abeiro do convenio entre a Consellería de Medio Rural e o Concello da Baña para a prevención e defensa de incendios forestais no ano 2024.
Así mesmo, dase a coñecer a composición do tribunal e a convocatoria dos exames para o luns 24 de xuño: proba práctica ás 9.00 horas na nave municipal (rúa Tedelle, s/n), entrevista persoal ás 10.30 horas no salón de plenos do Concello, 12.00 horas para a proba física de aptitude na nave municipal e 14.00 horas para o exame de galego no salón de plenos do Concello.
A resolución pode consultarse en arquivo adxunto ou premendo nesta ligazón.
13 de xuño de 2024
Publícanse no Boletín Oficial da Provincia as bases reguladoras e convocatoria do proceso selectivo para novas inclusións e actualización de méritos na bolsa para a provisión temporal de contratación dunha brigada para a prevención e defensa contra incendios forestais do Concello da Baña.
Esta convocatoria de ampliación e actualización da bolsa de emprego terá por obxecto a contratación como persoal laboral temporal dunha brigada de 5 operarios (1 xefe de brigada; 1 peón condutor; 3 peóns de brigada) e a creación dunha bolsa de emprego de entre as persoas aspirantes que cumpran os requisitos establecidos nas bases para a súa provisión con carácter temporal.
O proceso selectivo é o concurso oposición e o prazo de presentación de instancias ou de actualización de méritos é de cinco días hábiles, a contar desde o día seguinte ao da publicación do anuncio no BOP.
As bases e convocatoria poden consultarse no arquivo adxunto ou premendo nesta ligazón.
- Detalles
- Escrito por Alicentis
- Categoría: Emprego e Desenvolvemento INICIO
- Visto: 369
A iniciativa do goberno municipal viuse apoiada pola presenza de moitas persoas durante toda a mañá, que acudiron a mercar e a tomar o polbo
Por comprar superiores a 15 euros nos postos ou no comercio e hostalería local, o Concello regala vales de 2 € de desconto na polbeira
A iniciativa do Goberno da Baña para impulsar e dinamizar a feira mensual viuse apoiada coa presenza dunha trintena de postos no mercadiño ambulante e de moitos veciños e veciñas que se achegaron ata San Vicenzo para mercar e comer polbo.
Dende primeira hora da mañá foise achegando a xente ata San Vicenzo para pasear polo mercadiño e ver as ofertas da trintena de postos que se instalaron este primeiro luns de xuño: roupa, bixutería, prantas, calzado, pan, churros, entre outros. A partir de mediodía incrementouse a fluencia ao mercado e a polbeira, que xa comezou a servir as primeiras racións de polbo pouco despois da doce.
Precisamente, a presenza da polbeira na feira da Baña é unha das novidades desta iniciativa do goberno local para dinamizala. Por este motivo, o Concello ofrece un vale desconto de dous euros para comer o polbo a todas as persoas que fagan compras por importe superior aos 15 euros tanto nos postos do mercadiño como no comercio e hostalería da Baña. Esta promoción estará vixente tamén na feira do mes de xullo (que se celebrará o día 1) e cada persoa pode trocar un máximo de dous vales cada día.
- Detalles
- Escrito por Alicentis
- Categoría: Emprego e Desenvolvemento INICIO
- Visto: 224
O equipo de goberno do Concello da Baña está a elaborar unha ordenanza para regular a concesión de subvencións municipais, feito que pon en coñecemento da veciñanza para que cidadáns e asociacións aporten as achegas que consideren oportunas. Estas aportacións deberán facerse por escrito a través da sede electrónica do Concello da Baña, no formulario de achega de documentación complementaria co seguinte código de expediente: 2024/G013/000001.
No documento adxunto poderá descargarse o anuncio municipal do procedemento de participación pública previa á aprobación da ordenanza municipal.
 27-5-2024. Anuncio de consulta previa á aprobación da ordenanza de subvencións | [ ] | 80 kB |
- Detalles
- Escrito por Alicentis
- Categoría: Emprego e Desenvolvemento INICIO
- Visto: 219
O Concello da Baña participa no programa Campus Rural de prácticas universitarias no medio rural, unha iniciativa do Ministerio para a Transición Ecolóxica e o Reto Demográfico, en colaboración co Ministerio de Universidades e as universidades públicas españolas.
Este programa permite que os universitarios poidan levar a cabo prácticas académicas, curriculares e extracurriculares en entornos rurais. Deste xeito, contribúese ao reequilibrio territorial atraendo talento novo nos espazos máis despoboados para dinamizar o seu tecido produtivo, social e institucional.
O Concello da Baña asinou un convenio de colaboración coa Universidade de Vigo para a realización destas prácticas. As titulacións ás que se dirixe a oferta son catro: Dirección e Xestión Pública, Administración e Dirección de Empresas, Dereito e Relacións Laborais e Recursos Humanos. No que atinxe ás tarefas a realizar, estas son o apoio na xestión de subvencións, relacións coa Deputación e Consellería de Emprego, apoio ao secretario interventor e tarefas administrativas propias das áreas municipais.
O prazo de presentación de solicitudes remata o 30 de maio de 2024 ás 23:59 horas.
Para ampliar información, consulta esta ligazón da sede electrónica da Universidade de Vigo.
Na ficha de adhesión, adxunta a esta nova, figuran os graos solicitados polo Concello da Baña e outra información de utilidade.
| Ficha de adhesión do Concello da Baña a Campus Rural | [ ] | 572 kB |
- Detalles
- Escrito por Alicentis
- Categoría: Emprego e Desenvolvemento INICIO
- Visto: 370
-
O mercado dos luns amplía a oferta de postos e produtos
-
O Concello regala descontos na polbeira por compras superiores a 15 euros nos postos da feira e no comercio local
O Concello da Baña impulsa a renovación da súa Feira mensual, que se celebra o primeiro luns de cada mes, e pon en marcha unha campaña de promoción deste mercado. A partir do vindeiro luns 3 de xuño, a Feira presentará un maior número de postos, produtos máis variados e vantaxes para todos os visitantes.
Unha das novidades máis destacadas é a volta da polbeira, que non participaba na Feira desde había un ano. Ademais, para fomentar a participación e recompensar ás persoas asistentes, o Concello da Baña introducirá unha serie de vantaxes. Por cada gasto de 15 euros nos postos do mercado ou nos establecementos comerciais, farmacias e de hostalería da Baña, os visitantes recibirán un vale desconto de 2 euros para cambiar na polbeira. Recentemente, o Concello envioulle unha carta á veciñanza para informar desta campaña na que se incluía un vale de 2 euros, que tamén poderá ser utilizado na Pulpería Rois o luns 3 de xuño e o luns 1 de xullo.
O servizo de autobús polas parroquias continuará como de costume, con saída ás 9.00 horas de Fiopáns. O percorrido abrangue toda a zona que vai dende Fiopáns, pasando por Troitosende, Menlle, Lañas, Cabanas, O Barro e rematando na Baña. O regreso está previsto para as 13.00 horas.
O Concello tamén fai un chamamento a todas as persoas interesadas en montar o seu propio posto no mercado. “Esta é unha actividade gratuíta e a disposición de todos os veciños”, indícase na carta asinada polo alcalde da Baña, José Antonio Pereira. Para máis información sobre como participar na Feira ou obter un posto no mercado, as persoas interesadas poden poñerse en contacto coa Axencia de Desenvolvemento Local do Concello da Baña.
"Cremos firmemente no espírito de colaboración e no fomento de iniciativas locais que contribúan ao desenvolvemento do noso municipio”, afirma na misiva Pereira. O alcalde remarca o compromiso do Concello coa “promoción da actividade económica na nosa comunidade ofrecendo novas oportunidades tanto aos comerciantes habituais como aos novos emprendedores locais”. O rexedor ve na Feira unha oportunidade de “fortalecer o tecido económico e social da nosa comunidade”.