A Baña celebrará o seu sétimo Mercadiño de Nadal o domingo 11 de decembro no pavillón de San Vicenzo
- Detalles
- Escrito por Alicentis
- Categoría: Turismo
- Visto: 847
-
Os visitantes poderán gozar con postos de artesanía, lambonadas, actuacións musicais, xogos e a visita de Papá Noel //
-
As persoas máis novas poderán aprender das maiores cancións ou labores tradicionais nos talleres da Feira de Voluntariado Interxeracional //
-
Haberá polbeira con carpa e varias pedras para facer filloas //
Xa hai data para a celebración da sétima edición do Mercadiño de Nadal da Baña. Será o domingo 11 de decembro cando o pavillón municipal de San Vicenzo volva encherse ao longo de todo o día con postos de artesanía, delicias gastronómicas e actividades de lecer, ademais de recibir a visita de Papá Noel.
As portas do polideportivo permanecerán abertas entre as 12 do mediodía e as oito da tarde para que todos os visitantes poidan sorprenderse con numerosas propostas de artesanía e adiantar as compras dos agasallos de Nadal. Tamén durante toda a xornada, se desenvolverá a Feira de Voluntariado Interxeracional que, por medio de diversos talleres, permitirá que as persoas maiores lle aprendan ás máis novas cancións, lerias ou traballos tradicionais como o de debullar o millo.
Para gozar da xornada, hai programadas diversas actuacións musicais e xogos para a cativada. A música comezará a soar xa ao mediodía cos Campantes da Baña e, tamén pola mañá, poderemos escoitar aos Gaiteiros Pequenos. Xa pola tarde, serán o alumnado da Escola de Música da Baña e o grupo de pandeireteiras As Maianas os encargados de amenizar o mercadiño.
O público máis novo conta cun programa propio, no que se inclúe unha sesión de contacontos con Cris de Caldas (contra as 12.30 horas), unha exhibición de ximnasia rítmica da AFA do CEIP San Vicente (ao redor das 16.15 horas) ou os xogos tradicionais que, da man de Paporrubio, tanto éxito tiveron no Feirón da Re-Volta. Todo iso para entrar en calor e recibir como se merece a Papá Noel, que anunciou a súa visita dende o Polo Norte disposto a tomar nota dos seus desexos para este Nadal e que ten previsto chegar a San Vicenzo sobre as 18.15 horas.
E, para quen queira quedar a comer, ademais de lambonadas e varias pedras para facer filloas, non faltará no exterior do pavillón a carpa dunha polbeira.
- Detalles
- Escrito por Alicentis
- Categoría: Turismo
- Visto: 873
-
Estes apartamentos rurais veñen de acreditarse no sistema de calidade turística en destino SICTED //
-
Acompañouno na visita o alcalde da Baña, Andrés García //
-
O bono poderá empregarse ata o 31 de decembro nos establecementos adheridos á campaña da Xunta //
O alcalde da Baña, Andrés García, visitou hoxe na compaña do delegado da Xunta na provincia da Coruña, Gonzalo Trenor, os apartamentos rurais A Carballeira do Tambre, un dos establecementos aos que se pode acudir empregando o bono turístico Quedamos en Galicia.
O bono turístico é unha iniciativa da Xunta estreada o ano pasado para incentivar o turismo na nosa comunidade. Nesta edición, e coa idea de promocionar as visitas fóra da temporada alta para contribuír á desestacionalización, activouse o pasado 15 de setembro e permanecerá en vigor ata que acabe o ano o 31 de decembro. Na área de Santiago hai 114 establecementos adheridos.
A Xunta subvenciona o importe do bono cun 60% do custo, mentres que a persoa usuaria aporta o 40% restante. Unha vez concedido o bono, o beneficiario recibe no seu domicilio unha tarxeta co importe total para gastalo nos establecementos adheridos da súa preferencia. Na Baña, o único dispoñible é A Carballeira do Tambre, apartamentos que veñen de recoller recentemente o diploma SICTED que acredita a calidade turística en destino, un sistema polo que está a apostar o GDR Terras de Compostela coa idea de buscar a máxima satisfacción da clientela e ofrecer un servizo de excelencia e homoxéneo nos nove concellos rurais dos arredores de Santiago nos que traballa.
- Detalles
- Escrito por Alicentis
- Categoría: Turismo
- Visto: 939
-
A marcha, na que participou unha ducia de bañenses, coincidiu coa segunda etapa da ruta posxacobea organizada polo Concello de Zas
-
Os camiñantes percorreron algo máis de 25 quilómetros en 5 horas
O Concello da Baña organizou o pasado sábado, 28 de maio, unha andaina que tivo por obxecto potenciar e reivindicar o Camiño de Santiago a Muxía por Brandomil ao seu paso polo municipio bañense. É fíxoa coincidir precisamente coa 2ª etapa da andaina do Camiño de Santiago a Muxía por Brandomil, organizada polo Concello de Zas; etapa que, partindo de Negreira, transcorreu un bo tramo polo municipio da Baña ata a súa chegada á ponte de Brandomil, xa no concello de Zas. En concreto, os lugares bañenses polos que transita esta antiga ruta peregrina son San Cibrán, Barcala, Ordoeste, Corneira e A Riba.
Ao redor dunha ducia de bañenses sumáronse á veciñanza de Zas que está a percorrer as catro etapas desta ruta (de 86 quilómetros en total) ao obxecto de apoiar e reivindicar a oficialidade deste Camiño como ruta posxacobea. Unha ruta histórica, que cómpre subliñar, foi escollida antigamente por milleiros de peregrinos como un dos camiños máis directos entre Compostela e Muxía.
Así, os camiñantes percorreron un total de 25,4 quilómetros a máis de 30 grados de temperatura e en pouco máis de cinco horas.
O Concello da Baña quere agradecer ao Concello de Zas, á Fundación Brandomil e a Protección Civil de Zas a súa colaboración e a súa implicación. Tamén fai extensivo o seu agradecemento ao supermercado Claudio da Baña que contribuíu ao avituallamento dos participantes bañense na andaina.
- Detalles
- Escrito por Alicentis
- Categoría: Turismo
- Visto: 4881
-
Senda circular á beira do río Faílde de 7,5 quilómetros e dificultade moderada
En Galicia, a terra dos mil ríos, a auga moldea as súas verdes paisaxes e está intimamente vencellada ao seu desenvolvemento social e económico. Os cursos fluviais permitiron regar os cultivos, darlle de beber aos animais e aportaron tamén a forza para mover as rodas dos muíños ou alimentar ás chamadas fábricas de luz. A Ruta dos muíños da Baña convídanos a viaxar ao pasado para coñecer a Galicia máis tradicional percorrendo paraxes de gran beleza natural á vez que nos mergullamos na historia e na etnografía do municipio.
Facendo esta ruta circular de 7,5 quilómetros e de dificultade moderada, a persoa camiñante percorrerá unha zona chea de natureza e un anaco de historia do Concello da Baña. Percorrendo o río Faílde visitará un conxunto de 9 muíños tradicionais galegos, fervenzas, montes, escaleiras de pedra, un lavadoiro, e a vella central hidroeléctrica que subministrou luz á capital bañense e ás aldeas próximas a principios do século XX. Unha mestura de arte, historia, natureza e tradición que de seguro será un pracer para os sentidos e unha oportunidade para visitar recunchos de singular beleza próximos á vila da Baña.
O punto de chegada e saída da Ruta dos muíños da Baña é á praza do Concello, fronte a casa consistorial. Dende aquí baixaremos pola rúa Castelao ata a entrada de San Vicenzo, cruzamos o paseo de peóns que está situado sobre a ponte e chegamos ao lugar de Vilariño, onde empezaremos a gozar dos primeiros soutos e carballeiras ata chegar á central hidroeléctrica. As 79 escadas de pedra forman o conxunto máis coñecido do lugar. Continuamos río arriba ata O Barro e, pouco depois, veremos os muíños de Marcelle e cruzamos a primeira das pontellas de madeira sobre unha fervenza singular. Baixamos de novo, agora pola marxe dereita do regato, ata volver á ponte do Barro para dirixirnos de volta a San Vicenzo.
A uns 250 metros atoparemos os dous primeiros muíños. O río tórnase alegre, ruidoso, con distintos saltos de auga e no percorrido da senda poderemos descubrir algunha “bañeira” artificial. Imos xa por enriba dunha antiga levada que abastecía de auga os muíños. Veremos un pequeno bosque de abeneiros no que as cores pardas e a sombra predominan sobre o resto. O río tamén troca e volvese mudo, xerando una zona calma e pacífica. En breves chegaremos á caseta de captación de auga do Concello e xa empezaremos a gozar das fervenzas e saltos de auga que nos levaran ata a antiga minicentral. Zona para gozar dos sentidos e percibir cal sería o seu funcionamento e a importancia na vida da veciñanza do Concello da Baña.
Seguimos o curso do río e comeza unha zona un pouco máis complicada para camiñar, pero apta para todos os públicos, que nos levará a ver unha cascada e o columpio que descobre a gran fervenza do río Faílde. Continuamos gozando das diferentes cores e sons que nos brindan as paisaxes desta ruta, con zonas de fortes correntes, zonas calmas con area, bosques frondosos, pero neste intre son protagonistas os catro muíños que nos quedan por visitar, cada un coa súas particularidades e coa súa pegada na historia deste municipio. O remate deste sendeiro condúcenos xa ata o final desta ruta.
Podes facer a ruta seguindo o track GPX que se descarga no arquivo adxunto.
Historia da minicentral hidroeléctrica situada na Ruta dos muíños da Baña
En 1906 Manuel Gómez Barbeira funda Electra de La Baña S.A. E inmediatamente constrúe a planta a carón do rego do Failde.
Dende esta minicentral subministra luz a capital bañense (San Vicenzo) as aldeas próximas da capital e chagando incluso a zonas do Concello de Negreira.
Funcionou ata o 13 de novembro do 1951, implantando o servizo a Sociedade Xeral de Galicia da recente presa construiía no Tambre e xestionada por Fillos de Plácido Fabeiro S.A.
Na planta bañense traballaba a familia Proupín que era a encargada do correcto funcionamento. Vivían nela e incluso a familia aumentou nela nacendo José Proupin. No parón de produción da enerxía emigraron a Venezuela.
Como dato, en 1933 o kilowatio rondaba as 33 pesetas sen impostos. A xefatura de Industria era a que verificaba e inspeccionaba os contadores e o tendido eléctrico. O tendido eléctrico de Electra La Baña S.A seguía en funcionamento en aluguer á Sociedade Xeral de Galicia.
 Track Ruta dos muíños da Baña (GPX) | [ ] | 25 kB |
- Detalles
- Escrito por Alicentis
- Categoría: Turismo
- Visto: 1015
- O Concello e a asociación de empresarios A Baña Emprende buscan poñer en valor a importancia histórica e turística do castro da Baña
- Un total de seis grupos participaron no Concurso de Clans
- Xogos populares, mercado de artesanía, unha batalla castrexo-romana ou espectáculos de maxia e musicais completaron o programa
A Baña regresou aos tempos anteriores aos romanos con motivo da primeira edición da Festa Castrexa. Centos de persoas reuníronse durante toda a xornada de hoxe, sábado 21 de maio, para celebrar o pasado bañense e gozar dunha xornada de actividades festivas e culturais, nunha acción que pretende poñer el valor os atractivos turísticos do municipio e, en especial, o seu castro. O evento, organizado polo Concello da Baña e pola asociación de empresarios A Baña Emprende, coa colaboración da Asociación de Mulleres Alborada e da Deputación da Coruña, continúa esta noite con actuacións musicais de primeiro nivel.
Numeroso público xuntouse xa de mañá no castro, situado no alto da parroquia de San Vicenzo da Baña, para asistir á apertura do mercado de artesanía, no que os máis de corenta expositores presentes puideron demostrar en vivo o seu desempeño en diversos oficios tradicionais. A rapazada coñeceu de primeira man como se realiza un traballo arqueolóxico, e os maiores recordaron o labor de trenzado da palla, en dous obradoiros. Á unha, o colaborador do informativo humorístico da TVG 'Malicia Noticias' Pepe Capelán, encargouse de abrir a programación festiva co pregón, destacando que “esta é a primeira festa castrexa destas características que se celebra en toda a provincia”.
O alcalde da Baña, Andrés García, manifestou que esta iniciativa responde ao desexo de “poñer en valor o noso patrimonio” e agradeceu “o traballo desenvolvido tanto dende o consistorio como dende a asociación A Baña Emprende na organización da festa e na recuperación dun espazo singular como o castro da Baña”. Trátase de aproveitar este elemento patrimonial singular para captar visitantes interesados no pasado e na cultura, engadindo un atractivo máis á oferta natural e gastronómica coa que conta o municipio.
A festa estoupou a mediodía coa celebración da sesión vermú. O grupo Minguante amenizou os instantes previos á comida; a Festa Castrexa contou cunha abondosa oferta gastronómica para que ninguén quedase con fame de cara a afrontar as actividades da tarde, que comezarán coa simulación dunha batalla entre castrexos e romanos.
A tarde proseguirá con xogos populares destinados aos castrexos e castrexas de menor idade. Ademais de gozar con entretementos tradicionais como os zancos ou as carreiras de sacos, puideron organizar partidas arqueolóxicas para descubrir un tesouro ou aprender a fabricar xerros de arxila ou trísceles, o símbolo polo que se coñece mellor a cultura castrexa. A media tarde actuou o mago José Benigno, “o ilusionista xalleiro”, que deu paso a unha sesión de música popular a cargo dos Gaiteiros da Baña.
O concurso de caracterización castrexa foi un dos momentos máis importantes da Festa. Durante toda a xornada puideron verse pola Baña un total de seis clans vestidos con todos os atributos propios da época: personaxes vestidos de época, lanzas e abalorios deron lustre á celebración, transportando a localidade a unha época pasada hai máis de dous mil anos. No certame o clan mellor caracterizado e o máis diverso recibiron un premio de 200€, mentres que o máis numeroso foi agasallado cunha cea no propio recinto da festa.
A festa segue esta noite coa actuación ás 21h. do grupo vocal De Vacas, un dos máis singulares e destacados da música galega actual grazas á súa mestura de folk, pop e jazz. Ás 22h. está previsto un espectáculo do Bruxo Queiman, que dará paso á festa rachada que habitualmente despregan nas súas actuacións os Festicultores.
Podes ver as fotos da xornada en Facebook: (Preme aquí)
