• Son das Ideas fíxose co galardón de Canle grazas aos seus recursos e a súa creatividade

• Tamén foron recoñecidos Neeumatiko, Pablo Rodríguez Vila, Toxío, AstroXabi, Cousas RarismASMR, Cousxs, Xacobo de Toro, Recuncho Gamer e Orgullo Galego

• O servizo de normalización lingüística do Concello da Baña é un dos organizadores

Olaxonmario, que se impuxo nas categorías de Youtubeiro e Vídeo, converteuse no gran triunfador da última edicion dos Premios Youtubeiras, mentres que o outro gran galardón, o de Canle, recaeu no Son das Ideas. As persoas gañadoras deéronse a coñecer nunha gala que tivo lugar o pasado 26 de novembro na Casa de Cultura de Bertamiráns e que estivo conducida polo grupo Tanxugueiras.

O xurado, composto por Noemí García Rodríguez, Fernando Ramallo, Adrián Lede, Sonia Méndez, Esther Estévez e Conchi Cochón Rodríguez en calidade de secretaria, destacou a capacidade de Olaxsonmario para “conectar con moita xente dentro e fóra das nosas fronteiras”. Do seu vídeo galardoado, Por que é que non entendo o Portugués? Co @Portuguese With Leo, sinalou que se trata dun “dos vídeos en galego non musicais que está a ter maior repercusión dende o seu lanzamento en Youtube”. En canto a O Son das Ideas, o xurado incidiu en que “o seu contido triunfa por todos os recursos que emprega nos vídeos, pola súa facilidade de explicar temas complexos e a súa creatividade plasmada a través das animacións”. Esta tres categorías -Youtubeiro, Vídeo e Canle- son as de maior dotación económica con mil euros cada unha.

Polo que atinxe ao resto das categorías, o premio á Calidade Lingüística recoñeceu neste 2021 a Neeumatiko, de quen o xurado puxo en valor o seu “dominio formal tanto na dimensión gramatical coma léxica e fonética”. Pola súa banda, Toxío recolleu o galardón no apartado de Calidade Técnica polo seu coidado uso dos recursos audiovisuais e Pablo Rodríguez Vila levou o Premio Impacto, xa que a súa canle conta cunha media de 2.000 reproducións por vídeo.

O Premio Comunicación recaeu en AstroXabi, xa que en moi pouco tempo conseguiu facerse un oco e xerar unha comunidade arredor dunha temática especializada. A canle Cousas RarismASMR converteuse na gañadora do Premio Creatividade, mentres que a gañadora do galardón musical foi para Cousxs. 

“Un referente indiscutible na divulgación didáctica de contidos”. Así definiu o xurado a Xacobo de Toro, quen se alzou co Premio Didáctico, mentres que Recuncho Gamer acadou o Premio Pioneiro. Por último, a canle Orgullo Galego conquistou o Premio do Público con Conversas con Anselmo López Carreira: O reino medieval de Galicia. Cada un destes nove premiados levaron 500 euros.

Os Premios Youtubeiras, que chegaron á súa quinta edición, están organizados polos servizos de Normalización Lingüística dos concellos da Baña, Ames, O Grove, Moaña, Negreira, Pontevedra, Ribadeo, Rianxo, Santiago de Compostela e Teo, das universidades da Coruña, Santiago e Vigo e da Deputación da Coruña. Carme Pereiro, normalizadora da Baña e coordinadora dos galardóns, destacou en nome da organización que este ano se procurou a consolidación das canles. “Non se permitiu que se presentasen vídeos illados coa intención de fomentar a creación e o mantemento de canles en galego, queriamos así valorar aínda máis a figura youtubeira que xurdiu arredor desta iniciativa”, subliñou. Destacou ademais a “calidade dos vídeos” e para concluír, animou “a continuar proxectando o galego como lingua viva e con capacidades magnéticas”, facendo así referencia ao lema que acompañou a esta quinta edición dos Premios Youtubeiras: Magnetismo en liña.

Entre os representantes institucionais que participaron na entrega de premios atopábase a concelleira de Política Social, Emprego, Educación e Cultura da Baña, Mónica González. 

Relación completa de premiados e finalistas

1. PREMIO CANLE

Canle gañadora: O Son das Ideas

https://www.youtube.com/c/OSondasIdeas

Finalistas: Olaxonmario e Neeumátiko.

2 PREMIO YOUTUBEIRA

O gañador: Olaxonmario.

https://www.youtube.com/c/olaxonmario

Finalistas: Neeumátiko, e Cousxs.

3 PREMIO VÍDEO

Vídeo gañador: Por que é que non entendo o portugués? Co @Portuguese With Leo (vídeo de Olaxonmario).

https://www.youtube.com/watch?v=eTgMtKL6xjU

Vídeos finalistas: A nova bomba das Tanxugueiras (vídeo de Cousxs) e Educación franquista (vídeo de Pradorua)

4 PREMIO CALIDADE LINGÜÍSTICA

Canle gañadora: Neeumátiko

https://www.youtube.com/c/neeumatiko

Canles finalistas: Cousxs e Esbardalhando.

5 PREMIO IMPACTO

Canle gañadora: Pablo Rodríguez Vila

https://www.youtube.com/c/PabloRodr%C3%ADguezvila

Canles finalistas: Olaxonmario e Neeumátiko.

6 PREMIO CALIDADE TÉCNICA

Canle gañadora: Toxío

https://www.youtube.com/c/TOX%C3%8DO

Canles finalistas: O Son das Ideas e Xacobo de Toro.

7 PREMIO COMUNICACIÓN

Canle gañadora: AstroXabi.

https://www.youtube.com/channel/UCUXcwKz8lfP9HCmLLS0Jp9A

Canles finalistas: Pablo Rodríguez Vila e Un rapá TRANSquilo.

8 PREMIO CREATIVIDADE

Canle gañadora: Cousas RarísimASMR.

https://www.youtube.com/channel/UC59LurczeXkyHRdBkkAePTg

Canles finalistas: O Son das Ideas e Olaxonmario.

9 PREMIO MUSICAL

Canle gañadora: Cousxs

https://www.youtube.com/watch?v=vUjuYUMCXks

Canles finalistas: FØ Records.

10 PREMIO DIDÁCTICO

Canle gañadora: Xacobo de Toro.

https://www.youtube.com/c/XacobodeToroCacharr%C3%B3n

Canles finalistas: O Son das Ideas e Neeumátiko.

11 PREMIO PIONEIRO

Canle gañadora: Recuncho Gamer

https://www.youtube.com/channel/UCqbohZKRrOTtvsR2H1Qjwig

Canles finalistas: Pingando e Astroxabi.

12 PREMIO DO PÚBLICO

Vídeo gañador: Conversas con Anselmo López Carreira: O reino medieval de Galicia, da canle Orgullo Galego. https://www.youtube.com/watch?v=cn5u-Hqbbac

Vídeos finalistas: Amemos o noso (da canle Xabi Gómez e Sara Sánchez) e “El cuarteto de IBAI” - Lucas Requena (PARODIA / VERSIÓN GALEGA) | Feat. Dani Piñeiro (da canle Fica coa Bola).