- Detalles
- Escrito por Alicentis
- Categoría: novas
- Visitas: 193
-
A competición celebrarase o 31 de maio no Polideportivo Municipal de San Vicenzo e repartirá 800 euros en premios
-
A cita contará con categorías xerais, locais e especiais para xogadores de distintas idades e niveis
O Polideportivo Municipal de San Vicenzo será escenario o próximo domingo 31 de maio da celebración do V Torneo Concello da Baña, unha cita incluída no X Circuito Intercomarcal de Xadrez Deputación da Coruña 2026.
A competición reunirá xogadores e xogadoras de diferentes categorías nun torneo valedoiro para ELO FIDE de xadrez rápido, consolidando esta proba como unha das citas destacadas do calendario provincial.
O torneo desenvolverase mediante sistema suízo a 7 ou 8 roldas, dependendo do número de participantes, cun ritmo de xogo de 10 minutos máis 3 segundos de incremento por movemento. A presentación dos xogadores terá lugar ás 15.45 horas e a primeira rolda comezará ás 16.00 horas, estando prevista a clausura e entrega de premios arredor das 21.00 horas.
A competición contará con premios nas categorías xeral, local e especiais. Haberá recoñecementos para xogadores sub-2000, sub-1700, veteranos maiores de 55 anos, mellor xogadora feminina e categorías base sub-18, sub-16, sub-14, sub-12, sub-10 e sub-8.
En total repartiranse 800 euros en premios, ademais de trofeos para os mellores clasificados. O primeiro posto da clasificación xeral recibirá 130 euros e trofeo.
O torneo tamén inclúe premios para os mellores xogadores locais e o sorteo dun cheque regalo de Gadis e dunha cesta de Frutas Fondo, ademais dun libro entre os participantes non premiados.
Inscricións
As persoas interesadas poderán formalizar a súa inscrición ata o venres 29 de maio a través do correo electrónico Este enderezo de correo está a ser protexido dos robots de correo lixo. Precisa activar o JavaScript para velo. ou no teléfono 617 234 393. O custe da inscrición é de 10 € (xeral), 7 € (sub-16) e 5 € (persoas empadroadas na Baña). Os pagamentos deben facerse de forma anticipada por transferencia (Caixabank ES15 2100 5097 2002 0012 6301) ou Bizum (617234393) indicando nome e apelidos e o epígrafe ‘inscrición torneo’. Os pagamentos efectuados o propio día do torneo levarán un recargo de 2€.
Desde o Concello da Baña animamos á veciñanza e ás persoas afeccionadas ao xadrez a achegarse ao Polideportivo Municipal de San Vicenzo para desfrutar dunha xornada deportiva que combinará competición e promoción do deporte.
As persoas que se acheguen ao municipio o día do torneo poderán tamén gozar da oferta hostaleira local, con opcións de xantar en distintos establecementos da zona, como Restaurante O Arranca; Parrillada Begomar; Casa Salvador; Parrillada O Val de Barcala; Parrillada O Barro; Café–Bar Restaurante O Muíño e Taberna O Barro.
 Bases V Torneo Concello de A Baña.pdf | [ ] | 411 kB |
- Detalles
- Escrito por Alicentis
- Categoría: novas
- Visitas: 203
-
A xornada desenvolveuse ao longo de todo o día cun programa que combinou tradición, convivencia e actividades culturais
-
Familias enteiras participaron xunto ao artista Oli Xiráldez na confección dun fermoso Maio que logo levaron en procesión ata a Praza do Concello
A Baña foi escenario este domingo, 10 de maio, dunha celebración que uniu xeracións arredor dunha das tradicións máis ancentrais da cultura galega, os Maios. A segunda edición desta festa popular serviu para darlle a benvida á primavera nun ambiente marcado pola participación veciñal e a posta en valor das tradicións.
A celebración arrancou ás 10.00 horas cunha intensa mañá de traballo colectivo arredor da creación do Maio. Malia que pola mañá a choiva obrigou a trasladar a xornada á Escola de Música Municipal Emilio Andújar, logo esta deu unha tregua e familias enteiras desfrutaron ao aire libre creando co artista Oli Xiráldez un fermoso Maio.
Foi o resultado de moitas horas de traballo en equipo, que incluíu desde a recollida de fiúncho, flores e demais elementos naturais, ata a confección de estruturas florais e adornos. Baixo a dirección de Xiráldez, todas as persoas asistentes, tanto grandes como pequenas, participaron no laborioso proceso de montaxe do Maio, recuperando así unha expresión artística tradicional moi vencellada á identidade cultural galega.
Un xantar veciñal, no que entre outras viandas non faltaron as famosas filloas á pedra da Baña, serviu para repoñer forzas ao mediodía, tras o que o traballo e o bo ambiente continuaron pola tarde.
Lupe Blanco e Nuria Penas animaron a xornada coas súas regueifas e bailes, mentres que o espectáculo infantil de K’Paparota Teatro completou a programación da festa.
O broche final chegou coa procesión do Maio ata a Praza do Concello, acompañado pola música tradicional dun gaiteiro. Diante da casa consistorial, e tamén previamente no exterior da Escola de Música, a música, os bailes e as coplas satíricas arredor do Maio converteron a festa nunha auténtica homenaxe viva á cultura popular galega.
A iniciativa foi organizada pola Concellería de Acción Social, Cultural e Servizos á Cidadanía que dirixe Mónica González, quen participou activamente na celebración xunto á veciñanza e destacou a boa acollida dunha iniciativa que, un ano máis, “cumpriu co obxectivo de promover a identidade local e o encontro interxeracional”.
- Detalles
- Escrito por Alicentis
- Categoría: novas
- Visitas: 141
-
A xornada desenvolverase o 10 de maio cun programa que combina tradición, participación veciñal e actividades culturais
-
A programación prevé un xantar veciñal pensado como punto de encontro ao longo da xornada
O Concello da Baña organiza o domingo 10 de maio unha nova edición dos Maios, unha iniciativa que xa se levou a cabo o pasado ano e que busca recuperar e poñer en valor tradicións propias de Galicia vinculadas á chegada da primavera. A actividade desenvolverase entre as 10.00 e as 20.00 horas na Praza do Concello.
A programación comezará cun obradoiro de elaboración de maios impartido por Oli Xiráldez, no que as persoas participantes aprenderán a construír estas estruturas tradicionais a partir de materiais naturais. O proceso inclúe a recollida de fiúncho e doutros elementos vexetais, así como o seu ensamblaxe e tecido sobre unha estrutura interna, seguindo as técnicas tradicionais.
Ao longo da xornada está previsto tamén un espazo para o encontro veciñal arredor dun xantar compartido, no que cada persoa deberá levar a súa propia comida. No caso de que o tempo acompañe, esta actividade realizarase ao aire libre na área recreativa do río Albariña, mentres que en caso de choiva ou baixas temperaturas trasladarase a unha instalación municipal.
A programación da tarde inclúe unha sesión de regueifas a cargo de Lupe Blanco e Josinho da Teixeira, que ademais de amosar esta expresión da tradición oral galega, ofrecerán nocións básicas para facilitar a participación do público. A xornada rematará cun espectáculo de monicreques para público familiar, Latexos. As lendas do Castro, a cargo de K'Paparota Teatro.
Todas as actividades están previstas inicialmente na Praza do Concello, aínda que, en función da climatoloxía, poderán trasladarse ao centro sociocultural. A iniciativa está organizada pola Concellería de Acción Social, Cultural e Servizos á Cidadanía.
- Detalles
- Escrito por Alicentis
- Categoría: novas
- Visitas: 325
-
A distinción recoñece o labor deste colectivo do CPI San Vicente na promoción da lectura e da lingua galega
-
A xornada completarase cun espectáculo da Maga Fani arredor do uso do galego
O Concello da Baña celebrará o domingo 17 de maio o Día das Letras Galegas cun acto no que a entrega do V Premio Daniel García Ramos será o eixo central da programación. O galardón recae nesta edición no Club de lectura Ars Legendi, que desde o ano 2007 promove encontros para toda a veciñanza da Baña arredor da lectura compartida, convertendo a biblioteca do CPI San Vicente nun espazo de intercambio de ideas.
A concelleira de Acción social, cultural e servizos á cidadanía, Mónica González, sinala que o premio Daniel García Ramos “busca poñer en valor o compromiso de persoas e colectivos que, desde ámbitos moi diversos, contribúen a manter viva a nosa lingua”, e destaca o papel do Club Ars Legendi como exemplo de participación cultural a través da lectura.
A programación do Día das Letras Glegas desenvolverase na Escola Municipal de Música Emilio Andújar e dará comezo ás 11.00 horas co espectáculo As nosas ancestras anóxanse. Que acontece coa nosa lingua?, a cargo da Maga Fani. A proposta combina maxia e reflexión arredor da situación do galego mediante unha viaxe escénica na que se poñen de relevo tanto as dificultades no seu uso como o valor de contar cunha lingua propia.
A entrega do premio terá lugar ás 12.00 horas no mesmo espazo. A actividade está organizada pola Concellería de Acción social, cultural e servizos á cidadanía, coa colaboración da Rede Cultural da Deputación da Coruña.
Historia e palmarés do Premio Daniel García Ramos
O Premio Daniel García Ramos foi instituído polo Concello co gallo do Día das Letras para recoñecer o traballo en favor da lingua e da cultura galegas. A distinción homenaxea a figura de Daniel García Ramos, maxistrado do Tribunal Superior de Xustiza de Galicia e fillo predilecto da Baña, quen destacou polo emprego do galego nos procedementos xudiciais e pola defensa do rural.
Nas edicións anteriores, o Premio Daniel García Ramos foi concedido ás Pandeireteiras da Baña e CantoEncanto no ano 2025, agrupacións nadas ao abeiro da Escola de Música Tradicional; a Mª Jesús Álvarez Ramos en 2024, mestra e xefa de estudos durante dúas décadas no CPI San Vicente; a Emilio Lois en 2023, profesor na Escola de Música Tradicional e impulsor de diversos grupos musicais locais; e ao mestre e músico Alonso Barreiro Caxade na súa primeira edición, en 2022, pola súa traxectoria vinculada ao ensino e á música.
- Detalles
- Escrito por Alicentis
- Categoría: novas
- Visitas: 852
- Fabio Couceiro, Jacobo Olveira e Raúl López foron os primeiros campións desta cita
O pavillón municipal de San Vicenzo acolleu este sábado, 4 de abril, o I Torneo de Tenis de Mesa da Baña, unha iniciativa que reuniu a máis de 40 participantes e que puxo de manifesto o crecente interese por esta disciplina deportiva no municipio.
A competición desenvolveuse nun ambiente marcado polo compañeirismo e o bo nivel de xogo, con participantes de diferentes idades que amosaron o seu talento nas categorías benxamín, infantil e absoluta. O torneo foi organizado por Miguel Rey, profesor das escolas deportivas municipais, contribuíndo a consolidar o tenis de mesa como unha actividade en expansión dentro da oferta deportiva local.
A entrega de premios contou coa presenza da concelleira de Deportes, Ana Pensado Louzao, quen destacou a importancia de promover o deporte base e fomentar hábitos de vida saudables a través de propostas que favorezan a participación e a convivencia.
Clasificación final:
- Categoría benxamín: 1º Fabio Couceiro; 2º Brais Mallón.
- Categoría infantil: 1º Jacobo Olveira; 2º Manuel Casal.
- Categoría absoluta: 1º Raúl López; 2º Anxo Castro.
O Concello da Baña continúa a traballar para impulsar o deporte como un espazo de encontro, participación e benestar, favorecendo a práctica de actividade física entre a veciñanza de todas as idades.
Esta primeira edición do torneo nace coa vocación de continuidade dentro do calendario deportivo municipal, reforzando o compromiso do Concello coa promoción do deporte e os hábitos saudables.