• Ábrense catro grupos por idades para rapazada a partir de oito anos e persoas adultas //

  • As inscricións formalizaranse a través da sede electrónica ou enviando un correo a Este enderezo de correo está a ser protexido dos robots de correo lixo. Precisa activar o JavaScript para velo. co formulario debidamente cuberto //

Durante o mes de decembro, cativada de 8 anos en adiante e persoas adultas poderán poñer a proba de xeito gratuíto as súas dotes dramáticas na nova escola de teatro do Concello da Baña, que comezará a andar de xeito oficial a partir de xaneiro baixo a dirección de Xan Martínez.

A Escola municipal de teatro e conciencia corporal quere recuperar, coincidindo co trinta aniversario da súa fundación, a escola de teatro bañense Berenguela, que chegou a ser coñecida en toda Galicia tanto pola formación de intérpretes como pola posta en escena de obras de moi diversa índole.  

Nenas e nenos terán clases nas instalacións do CPI San Vicente. Os luns de 16.30 a 17.30 será a quenda dos que teñen entre 8 e 10 anos; xusto despois, e ata as 18.30 horas, tocaralle ás cativas e cativos de entre 10 anos e 12 anos; e xa os martes, de 15.00 a 16.30 horas, terán aulas mozas e mozos de 12 a 16 anos. As persoas adultas, pola súa parte, acudirán ao local social de San Vicenzo os luns de 18.45 a 20.15.

Logo do periodo de proba en decembro, as persoas interesadas en continuar na Escola de teatro deberán formalizar a inscrición presentando o formulario debidamente cuberto a través da sede electrónica ou envíandoo por correo electrónico a Este enderezo de correo está a ser protexido dos robots de correo lixo. Precisa activar o JavaScript para velo.. O prezo das clases é de 20 euros por trimestre.

O formulario de inscrición pódese descargar no arquivo adxunto. 

 

  • As tres reciben un lote de libros como premio do concurso organizado pola Concellería de Cultura

  • As súas fotos formarán parte do calendario 2023 do Concello da Baña xunto con outras nove seleccionadas polo xurado entre as 22 que participaron no concurso

  • As imaxes poderanse ver esta semana na casa da cultura

20221105 fotos participantes no concurso Elas no Outono A Bana 16

Tres mulleres foron as gañadoras do concurso de fotografía ‘Elas no outono’ que organizou a Concellería de Cultura da Baña para reivindicar o papel da muller e ofrecer unha visión diferente da figura feminina durante o outono. 

As tres gañadores foron Erica Blanco Rey, na categoría de persoa adultas, coa súa obra Aire puro, sacada na planta da antiga minicentral. Na categoría de 12 a 17 anos o premio foi para a única imaxe presentada, Carballeira de Vilacoba con vistas a agra e o río Tambre, de Antía Iglesias Güimil.  Contrastes e o título da imaxe presentada por Iria Paredes Blanco na categoría de 6 a 11 anos. A foto foi sacada en Vilar de Cima, na parroquia de Corneira.

20221105 fotos participantes no concurso Elas no Outono A Bana 11

Estas tres imaxes formarán parte do calendario 2023 do Concello da Baña, xunto a outras nove que participaron no concurso e que foron seleccionadas polo xurado, que estivo composto pola concelleira de Cultura, Lorena Trillo, o fotógrafo bañense Javier Iglesias, e o director da axencia de comunicación Alicentis, Juan Martínez. O tribunal destacou o número de fotografías presentado ao certame, un total de 22 imaxes, e a variedade temática abordada nas mesmas. “É un primeiro paso para por en valor ás mulleres da Baña e todo o bo que temos que ofrecer no noso concello”, dixo Lorena Trillo.

20221105 fotos participantes no concurso Elas no Outono A Bana 6

As fotografías presentadas a esta primeira edición do concurso pódense ver na casa da cultura durante a vindeira semana.

As tres gañadoras recibirán como premio un lote de libros acorde a súa idade. Lorena Trillo e Javier Iglesias xa lle entregaron hoxe o agasallo a nai de Antía Iglesias despois da conferencia do fotógrafo bañense na casa da cultura.

 

  • O certame gastronómico ABaña Tapas 2022 está aberto a todos os locais de hostalaría do municipio e celebrarase durante as tres primeiras fins de semana de novembro

  • O Concello establece dous premios, de 450 € e 250 €, respectivamente, para as dúas mellores propostas culinarias

  • O locais que desexen participar deberán rexistrar a súa inscrición antes do 3 de novembro

  • O público terá a súa disposición un Pasaporte de tapas e quen o complete participará no sorteo dunha noite nunha casa de turismo rural da Baña

 ABana Tapas votacion copia

O Concello da Baña, a través da Concellería de Cultura, organiza o primeiro concurso ABaña Tapas 2022 ao obxecto de promocionar a hostalaría local, incentivar a cultura gastronómica do municipio e o fomento dos produtos autóctonos de tempada e de proximidade. O concurso culinario desenvolverase durante as tres primeiras fins de semana de novembro en todos os locais adheridos, conformando deste xeito unha ruta de tapas. Haberá dous premios para as mellores tapas: un primeiro dotado de 450 euros, e un segundo de 250 euros. 

Todas aquelas persoas que teñan completado e selado o seu Pasaporte de tapas entrarán no sorteo dunha noite nunha das casas rurais do municipio. Cómpre subliñar que a  elección das tapas gañadoras farase mediante a ponderación da valoración do xurado profesional (55%) e a puntuación media obtida dos votos do público (45%). 

O concurso, que busca fomentar o turismo a través das tapas, está aberto a todos os locais de hostalaría do municipio. Os hostaleiros e as hostaleiras interesados en participar deberán rexistrarse antes do 3 de novembro, entregando o formulario de inscrición proporcionado a cada un dos locais e que se pode obter tamén na páxina web municipal (neste enlace).

Para poder celebrar o concurso será imprescindible que haxa un mínimo 5 locais inscritos, polo que o Concello da Baña anima a todo o sector hostaleiro do municipio a participar no certame culinario ABaña Tapas 2022.

Segundo as bases do concurso, cada local hostaleiro poderá presentar un máximo de dúas tapas, podendo aumentar a tres no caso de ofrecer unha tapa sen glute, vexetariana ou vegana. As tapas deben incluír na súa elaboración produtos galegos de calidade e de tempada (cogomelos, castañas, fariña de millo, cabazas, figos, acelgas, marmelo...). As propostas culinarias que se presenten ao concurso deberán figurar na oferta habitual do local nos horarios previamente consensuados coa organización.

En cada establecemento só se poderán votar as tapas consumidas nel e, en ningún caso, as tapas doutro local. E, cada comensal, emitirá un único voto por tapa consumida.

 Poñerase a disposición do público un Pasaporte de tapas, que deberá ser selado nos locais participantes unha vez consumida a tapa e emitido o voto. Todas aquelas persoas que completen o pasaporte participarán no sorteo dunha noite nunha casa de turismo rural do municipio. En concreto, serán dúas as persoas gañadoras deste sorteo, que poderán desfrutar dunha estadía dunha noite ben na casa rural O Folgo, en Ordoeste, ou ben na Carballeira do Tambre, en Troitosende.

Dous xurados

O concurso gastronómico ABaña Tapas 2022 constará dun tribunal formado por dúas categorías: por unha banda, un xurado profesional e pola outra, o público (usuarios e usuarias dos locais de hostalaría). A elección da mellores tapas será a resultante da ponderación da valoración do xurado profesional (nun 55%) e a puntuación media obtida dos votos do público (45%); sendo a tapa que máis puntuación acade a gañadora do certame. En caso de empate, gañarán aqueles pinchos que teñan maior número de votos populares absolutos.

O xurado profesional estará composto por persoas do ámbito da hostalería, do turismo, do xornalismo gastronómico e entidades relacionadas coa promoción gastronómica. Cada un dos integrantes puntuará individualmente as tapas en función dos criterios de valoración recollido nas bases do concurso (presentación, sabor e aroma, técnica empregada e temperatura do servizo), sendo a máxima puntuación 5 e a menor 1. A puntuación final de cada tapa será a media aritmética da suma das distintas puntuacións outorgadas polos membros do xurado.

O Concello da Baña subliña que a  entrega dos premios celebrarase a finais do mes de novembro.

As persoas interesas poden consultar as bases na páxina web do Concello ou premer nesta ligazón.

  • O obxectivo do certame é ofrecer unha imaxe da muller nun entorno natural e rural 
  • Só se poderán enviar fotografías relacionadas coa temática tomadas dentro dos límites do municipio
  • O prazo de presentación das obras remata o 3 de novembro
  • Seleccionaranse 12 fotografías para o calendario 2023 pero só haberá unha obra gañadora en cada unha das tres categorías establecidas

20221025 Concurso Fotos ABana ALI0935 Columpio Rio Albarina

O Concello da Baña promove o I Concurso fotográfico Elas no outono 2022 co obxectivo de reivindicar o papel da muller e ofrecer unha visión diferente da figura feminina durante o outono nunha contorna rural e natural como é o municipio bañense. O xurado seleccionará un máximo de 12 fotografías, que formarán parte do calendario 2023 do Concello e formarán parte dunha exposición que se inaugurará o 5 de novembro na casa da cultura.

O concurso está aberto a todas as persoas maiores de 6 anos que desexen participar, enviando unha fotografía coa muller como protagonista. As imaxes deberán ser tomadas dentro dos límites territoriais do municipio da Baña e ser orixinais; é dicir, que non se teñan presentado a outro certame. Cada participante só poderá presentar unha fotografía dixital cun tamaño máximo de 6.000 píxeles no lado longo e 5 Mb de peso. 

As persoas participantes deberán enviar a súa foto por correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.antes das 15.00 horas do 3 de novembro de 2022. No asunto deberá figurar ‘Concurso de fotografía elas no outono 2022’, e no corpo do correo o. Nome da imaxe, o lugar onde foi tomada a foto e o seudónimo co que participa o autor. Nun documento adxunto deberanse incluír todos os datos de contacto da persoa participante, como figuran nas bases, ademais dun teléfono e correo electrónico de contacto.

Neste concurso establécense tres categorías. Os participantes de 6 a 11 anos competirán na categoría 1, os de 12 a 17 na categoría 2 e os de 18 ou máis anos, na categoría 3. A persoa gañadora de cada categoría recibirá como premio un lote de libros acorde a súa idade.

O xurado estará formado por persoas relacionadas co ámbito da cultura, da educación e da fotografía. O tribunal valorará, en cada caso, a orixinalidade da fotografía presentada, a súa adecuación á temática, a técnica empregada e a composición da imaxe.

As bases do concurso de fotografía Elas no outono 2022 están dispoñibles na web municipal (neste enlace) e no arquivo adxunto

  • Volve o feirón e a romería da Re-Volta e a Festa dos Maiores
  • Haberá obradoiros de arranxos florais en Corneira, Lañas, Troitosende e San Vicenzo
  • O Concello organiza unha saída a Santiago para asistir á representación da obra ‘Recortes’, do Centro Dramático Galego
  • Todos os mércores pola tarde haberá no CPI San Vicente actividades para nenos e nenas de Primaria seguindo a metodoloxía Montessori

Bana Romeria Revolta 2018 ALI7300 copia

O mes de outubro ven cargadiño de propostas teatrais, gastronómicas, de narración oral, cine e obradoiros para a veciñanza da Baña. Todas elas enmárcanse no programa do Outono Cultural deseñado polo Concello para este último trimestre do ano. Regresan con forza ao municipio citas tan esperadas como o Feirón e romería da Re-Volta!, o magosto ou a Festa dos Maiores. Pero tamén saídas culturais, que neste mes de outubro levarán á veciñanza da Baña que así o desexe ata Compostela para asistir ao teatro.

No eido formativo, o Outono Cultural propón para este mes un obradoiro de Arranxos florais de outono que se impartirá ao longo dunha soa xornada, en horario de 16.00 a 19.00 horas, en distintos puntos do municipio. O primeiro dos catro obradoiros previstos terá lugar mañá, 5 de outubro, no local social de Corneira. O mércores 19 de outubro desenvolverase no local social de Lañas. O sábado 22 está programado no local social de Troitosende e, finalmente, o mércores 26 desenvolverase no local social de San Vicenzo. 

O programa do Outono Cultural para este mes de outubro contempla dúas sesións de narración oral. A primeira terá lugar o venres 14, ás 19.15 horas, no auditorio municipal. Trátase de De cea cos defuntiños, con Iseo a Moura. Raquel Queizás collerá o testemuño, o martes, 18 de outubro, con Nano vai a escola. A actuación desenvolverase no Punto de Atención á Infancia, ás 10.00 horas.

Ao longo deste mes de outubro, a Baña terá tres citas importantes co mundo das tradicións, a gastronomía, a cultura e o ocio. O domingo 9 de maio, a carballeira de Ceilán volve aos anos 50, cunha nova edición do Feirón e romaría da Re-Volta. Ademais do mercadiño, haberá diversas espectáculos e actuacións musicais. As 12.00 horas a cativada poderá gozar cos Xogos do Paporrubio. Despois da sobremesa, ás 16.00 horas, sería o turno das Regueifeiras de Galicia, e ás 17.30 horas comezarán os contos ilustrados Polo correo do vento.

O sábado, 15 de outubro, tócalle desfrutar ás persoas maiores da Baña. O Concello programou para ese día a Festa dos Maiores, con xantar popular no polideportivo municipal. 

Gastronomía e cultura daranse a man o sábado 29, nas Escolas Vellas co magosto e O Quitamedos, a partir das seis da tarde.

No apartado cinematográfico, o auditorio municipal acollerá o día 28, ás 21.00 horas, o pase da longametraxe Malencolía, de Alfonso Zarauza, para maiores de 12 anos. 

Todas as actividades son gratuítas, agás a saída prevista para o mércores 19 de outubro en autobús, ao Salón Teatro de Santiago para asistir á representación da obra Recortes, do Centro Dramático Galego. As persoas interesadas deberán aboar 6 euros.

Ademais, para facilitar a conciliación, todos os mércores, ata o 21 de decembro, o Concello da Baña pon en marcha unha nova iniciativa municipal para facilitar a conciliación. Trátase dunha serie de actividades que seguen a metodoloxía Montessori, dirixidas a nenos e nenas de Primaria. Este programa desenvolverase no CPI San Vicente, de 15.30 a 17.30 horas.

O  programa do Outono Cultural continuará ao longo dos meses de novembro e decembro. 

Outono Cultural Bana