- Detalles
- Escrito por Alicentis
- Categoría: Cultura e educación
- Visitas: 627
-
Poderán anotarse todas as persoas maiores de 7 anos que o desexen
-
Impartiranse clases de gaita, pandeireta, percusión e canto
-
Cada instrumento ten un custo de 30 euros para todo o curso
O Concello da Baña abre o prazo de inscrición na Escola de Música Tradicional para o curso 2024-25. Poderán anotarse todas aquelas persoas maiores de 7 anos que o desexen, que terán a oportunidade de achegarse ás especialidades de gaita, pandeireta, percusión e canto.
O curso da Escola de Música Tradicional da Baña estenderase dende o mes de outubro ata xuño, coincidindo as datas de funcionamento e de vacacións coas do calendario escolar. As clases desenvolveranse pola tardes en horario que determinarán os docentes unha vez publicada a listaxe definitiva do admisións.
O prazo de inscrición estará aberto durante sete días naturais, a contar dende o día seguinte á publicación deste anuncio (martes 17 de setembro). As solicitudes presentadas fóra de prazo incluiranse nunha lista de agarda. No caso de que non se poida facer grupo nunha especialidade por non contar cun mínimo de cinco inscricións, as solicitudes fóra de prazo carecerán de validez.
As persoas usuarias deberán pagar as taxas do curso no momento de presentar a solicitude. O prezo para todo o curso é de 30 euros no caso de elixir instrumento, 60 euros no caso de dous instrumentos e 90 euros no caso de tres. O ingreso farase no número de conta do Concello da Baña ES26 0238 8191 8806 6000 1061.
Os formularios de inscrición poden descargarse nos arquivos adxuntos. Estes formularios deberán presentarse por rexistro, presencial ou electrónico, xunto ao xustificante de pagamento das taxas, a copia do documento de identidade da persoa usuaria e, de ser o caso, o informe médico que acredite calquera tipo de tratamento especial.
 Bases e formularios de inscrición na Escola de Música Tradicional curso 2024-25 | [ ] | 344 kB |
- Detalles
- Escrito por Alicentis
- Categoría: Cultura e educación
- Visitas: 567
-
As sesións desenvolveranse entre o 16 de setembro e o 5 de novembro
-
O horario é de 16:00 a 18:00 horas os luns e os venres
A rapazada a partir de 9 anos poderá adquirir novas destrezas dixitais nun campamento gratuíto organizado polo Concello da Baña que se desenvolverá dende o luns 16 de setembro ata o 5 de novembro. As clases serán os luns e venres de 16:00 a 18:00 horas.
O principal obxectivo é desenvolver competencias dixitais nunha contorna segura.
Neste campamento a rapazada aprenderá a buscar información de calidade, coñecer as ferramentas para crear contidos dixitais, crear contrasinais seguros ou protexer os datos persoais e previr o ciberacoso.
Campamento dixital é unha iniciativa impulsada pola Fundación Cibervolunarios, dentro de Programa de Competencias Dixitais para a Infancia (CODI) posto en marcha polo Ministerio de Juventud e Infancia e financiado pola Union Europea con fondos Next Generation.
- Detalles
- Escrito por Alicentis
- Categoría: Cultura e educación
- Visitas: 668
-
A participación está aberta a toda a cidadanía, a partir dos 3 anos
-
Ofértanse vento madeira, vento metal, batería e percusión, guitarra e canto, ademais de solfexo como complementario a todas as demais
-
O prazo para anotarse é de dez días hábiles e requírese un mínimo de cinco alumnos para impartir a maioría dos instrumentos
O Concello da Baña abre mañá , mércores 11 de setembro, o prazo de matrícula para todas aquelas persoas que desexen formarse na Escola Municipal de Música Emilio Andújar durante o curso 2024-2025. O servizo vai dirixido á poboación en xeral a partir dos 3 anos de idade, se ben hai prioridade para as persoas empadroadas na Baña. As clases desenvolveranse en horario de tarde, coincidindo co calendario escolar anual.
A Escola Municipal de Música Emilio Andújar oferta para o curso 2024-2025 as modalidades de vento madeira, vento metal, batería e percusión, guitarra e canto. A estas materias hai que sumarlle solfexo, especialidade que está incluída e que é complementaria a calquera das anteriores. As especialidades que se impartirán este curso, ademais de solfexo, son: percusión, saxofón, frauta traveseira, clarinete, trompeta, tuba, trombón, bombardino, piano, guitarra, acordeón e canto.
Nas bases reguladoras do servizo, publicadas na sede electrónica do Concello, establécese un número mínimo de cinco alumnos inscritos en cada especialidade para que esta poida ser impartida (agás en piano, acordeón e solfexo, que se darán con independencia do número de alumnos apuntados).
O prazo de inscrición é de 10 días hábiles a contar desde o 11 de setembro. No caso de quedar prazas vacantes, poderase solicitar a alta con posterioridade a estas datas nas especialidades abertas. Aquelas especialidades que no momento da aprobación da lista definitiva de admitidos non reúnan o número mínimo de 5 persoas inscritas non serán obxecto de admisión de solicitudes fóra de prazo. As solicitudes de menores de idade deben de ir asinadas polo pai, nai, titor ou representante legal.
Para inscribirse é preciso presentar a seguinte documentación:
- Ficha de inscrición
- Impreso cuberto da orde de domiciliación de recibos
- Autorización de captación de imaxe e son
- Autorización para usar o número de teléfono
- Copia do documento de identidade da persoa usuaria
- Copia do documento de identidade da persoa titular da conta
- De ser o caso, informe médico que acredite calquera tipo de tratamento especial
Unha vez rematado o prazo de inscrición, publicarase a lista provisional de persoas admitidas e darase un prazo de 10 días para presentar alegacións. Os horarios das distintas especialidades seranlles comunicados polos mestres das mesmas ás persoas usuarias e ás familias unha vez realizadas as inscricións e publicada a lista definitiva de admitidos. O formulario de inscrición, cos anexos, pode descargarse nos documentos adxuntos, así como as bases reguladoras da Escola Municipal de Música da Baña.
Podes facer a matrícula en liña dende a Sede Electrónica da Baña (neste enlace).
- Detalles
- Escrito por Alicentis
- Categoría: Cultura e educación
- Visitas: 467
Poderán participar persoas adultas e mozas a partir dos tres anos
As clases desenvolveranse polas tardes ao longo do curso escolar
O Concello da Baña abre o prazo de inscrición na Escola municipal de teatro para o curso 2024-2025. As clases desenvolveranse en horario de tarde coincidindo co calendario escolar e poderán participar tanto persoas mozas, a partir de 3 anos, como adultas.
A Escola municipal de teatro da Baña iniciará o curso 2024-25 neste mes de setembro coa finalidade de ofrecerlle á veciñanza a posibilidade de adquirir nocións básicas e medias de artes escénicas.
A formación está dirixida a toda a poboación, dende os 3 anos, e se fixarán grupos e horarios unha vez formalizadas as inscricións. O curso terá unha duración de dez meses, en paralelo ao calendario escolar no que atinxe a vacacións e festivos.
O prazo para anotarse é de dez días hábiles a partir do 12 de setembro. Aquelas solicitudes que se presenten fóra de prazo pasarán a unha listaxe de agarda, coa que se cubrirán as posibles vacantes por orde de presentación.
Os prezos determinaranse de forma exacta no momento da aprobación da listaxe provisional de solicitantes admitidos e os pagamentos faranse de xeito trimestral: un primeiro cargo realizarase transcorridos os primeiros tres meses de curso, outro cando pasen os tres meses seguintes e o último aboarase a final de curso e corresponderase cos catro últimos meses.
As bases e o formulario de solicitude, xunto á orde de domiciliación de recibos e ás autorizacións de imaxe, poden descargarse no arquivo adxunto. A matrícula tamén se pode cubrir en liña dende a sede electrónica do Concello da Baña (neste enlace)
| Formulario cesión de imaxes | [ ] | 91 kB |
| Formulario autorización de teléfono | [ ] | 84 kB |
| Formulario domiciliación de recibos | [ ] | 92 kB |
| 2024 Formulario inscrición Escola Municipal de Teatro da Baña | [ ] | 102 kB |
| Bases Escola Municipal de Teatro 2024-25 | [ ] | 375 kB |
- Detalles
- Escrito por Alicentis
- Categoría: Cultura e educación
- Visitas: 720
O acto celebrouse este sábado na ESMU Emilio Andújar e contou coa presenza de numerosos veciños e veciñas, autoridades locais e antigos membros da agrupación ||
“A Banda de Música Infantil da Baña foi unha escola de vida para moitos nenos e nenas”, dixo a autora Beatriz Cancela ||
“Neste proxecto amateur resultaron cruciais a implicación do colexio e do Concello da Baña e a dos seus directores, Emilio Andújar e Mario Martínez”, resaltou a autora ||
A concelleira Mónica González destacou a “disposición e implicación das familias e dos nenos e nenas que formaron parte da banda" ||
O eco das notas musicais que un día enchían as rúas da Baña volveu soar este sábado, 7 de setembro, coa presentación do libro A banda de música infantil da Baña 1982-2007 a cargo da súa autora, Beatriz Cancela. O acto, que tivo lugar na Escola Municipal de Música Emilio Andújar, congregou a numerosos veciños, veciñas e autoridades locais, entre elas o alcalde da Baña, José Antonio Pereira, e a concelleira de Acción social, cultural e servizos á cidadanía, Mónica González.
Escrita pola recoñecida musicóloga Beatriz Cancela Montes, a obra revive os 25 anos de traxectoria dunha agrupación que marcou unha época na vida cultural do municipio, sendo esencial na formación musical de moitos mozos e mozas entre 1982 e 2007. Durante a súa intervención, Cancela, quen tamén foi alumna da banda, fixo un percorrido polas etapas máis destacadas da agrupación, resaltando o legado que deixou na comunidade e a súa contribución á educación musical de ducias de nenos e nenas da Baña.
O alcalde da Baña, José Antonio Pereira, sinalou durante o acto que "a Banda Infantil non só foi un proxecto musical, senón un proxecto de futuro para moitos mozos e mozas do noso concello". Pola súa banda, a concelleira Mónica González, destacou "o papel esencial que tivo esta banda para manter viva a tradición musical na Baña e para ofrecerlles novas oportunidades educativas á mocidade". González Blanco resaltou que “ademais das institucións, na historia da Banda Infantil da Baña hai que loar a disposición e implicación das familias do alumnado da banda”.
Na presentación, organizada pola Concellería de Acción social, cultural e servizos a cidadanía, participaron, ademais da propia autora, Antonio Casal Andújar (neto no promotor da banda, Emilio Andújar); Mario Martínez, ex alumno e segundo director da Banda Infantil da Baña; o ex alcalde Francisco Villaverde, e a directora do CPI San Vicente, Mar Sueiro. A propia Mar Sueiro lanzoulles un reto as persoas asistentes que formaron parte da Banda Infantil da Baña: organizar unha xuntanza de ex integrantes da banda “que se podería celebrar o vindeiro 11 de maio no colexio da Baña, onde naceu a agrupación o 12 de maio de 1982”.
Beatriz Cancela, destacada musicóloga santiaguesa, que en 2009 recibiu o I Premio de Investigación Histórica Domingo Fontán, expresou o seu agradecemento por formar parte deste proxecto e destacou a figura de Emilio Andújar, fundador da banda e da escola de música, cuxo nome levan agora as escolas vellas desde 2022. Andújar foi lembrado con cariño durante a presentación como o home que, co seu esforzo, abriulles as portas do mundo da música a unha nova xeración de rapaces e rapazas.
Beatriz Cancela destacou que es libro é “unha homenaxe a unha agrupación amateur. A Banda Infantil da Baña foi unha proposta na que resultaron cruciais a intervención de varios actores: o colexio e o Concello da Baña, Emilio Andújar, fundador e director dende 1982 ata 1993, e Mario Martínez”, que dirixiu a banda dende 1994 ata 2007.
“Este libro recolle unha dobre motivación”, indicou a autora. Por unha banda, está a experiencia vital, xa que Beatriz Cancela foi integrante da banda dende pequena durante 15 anos e, por outra, a labor investigadora e estudosa da música. “Esta banda é popular e puiden acceder aos datos, xa que toda a actividade da banda quedou rexistrada: as saídas, as actuacións e a súa traxectoria”, sinala
A xornada foi tamén unha oportunidade para o reencontro de antigos músicos e músicas, que compartiron lembranzas e anécdotas sobre os seus anos na Banda Infantil da Baña. Moitos destacaron como a agrupación lles permitiu acceder á música, viaxar e vivir experiencias que marcaron as súas vidas, en especial para a mocidade do rural bañense dos anos 80 e 90. O acto serviu para poñer en valor o impacto desta banda na comunidade e o legado de Emilio Andújar, quen traballou para facer da música un patrimonio vivo da Baña. “Andújar nunca se desvinculou da Banda Infantil e os pais fixeron unha grande labor”, concluíu Beatriz Cancela.
Ao rematar a presentación, regalóuselle un libro a cada unha das persoas que formaron parte da Banda Infantil da Baña, xunto cunha tarxeta personalizada. Mónica González agradeceu a colaboración da Deputación da Coruña, que imprimiu o libro.
