- Detalles
- Escrito por Alicentis
- Categoría: novas
- Visto: 981
-
Recoñeceranse os mellores disfraces nas categorías de carrzoas, comparsas, grupos e individual
-
O desfile percorrerá as rúas Castelao e Tedelle a partir das 16.30 horas e os participantes farán unha pequena actuación diante da escola de música
-
As inscricións poderán realizarse ata o 5 de marzo a través da sede electrónica ou presencialmente no Rexistro
O Concello da Baña celebrará o vindeiro sábado 8 de marzo o tradicional Concurso de Disfraces de Entroido, que terá lugar a partir das 16.30 horas cun desfile polas rúas Castelao e Tedelle. O certame repartirá un total de 3.350 euros en premios entre as diferentes categorías: carrozas, comparsas, grupos e disfraces individuais, tanto infantís como de persoas adultas.
As carrozas e comparsas gañadoras recibirán 900 euros, mentres que as segundas e terceiras clasificadas obterán 400 e 150 euros, respectivamente. Na categoría de grupos, o primeiro premio será de 150 euros e o segundo de 100. Ademais, tamén se concederán premios individuais, cunha dotación de 100 euros tanto para a categoría infantil como para a de persoas adultos.
Para participar, os grupos deberán contar cun mínimo de dúas persoas e cun máximo de seis, mentres que as comparsas deberán ter polo menos sete membros. As carrozas tamén precisarán dun mínimo de sete participantes, ademais dun vehículo móbil con tripulación.
Durante o desfile, cada participante disporá dun máximo de cinco minutos para exhibir o seu disfrace e a súa actuación diante da escola de música Emilio Andújar. O xurado, composto por persoas alleas á organización, valorará a orixinalidade, a posta en escena e o coidado no vestiario e maquillaxe, especialmente o traballo feito a man e o emprego de materiais de refugallo.
As persoas interesadas en concursar deberán inscribirse a partir de mañá, mércores 19 de febreiro, e antes do mércores 5 de marzo. Poden facelo a través da sede electrónica do Concello ou de forma presencial no Rexistro Xeral. No caso de menores de idade, será necesario achegar unha autorización.
As bases completas do concurso, así como o formulario de inscrición e a autorización para menores, están dispoñibles nos ficheiros adxuntos.
 Entroido 2025: Autorización a menores | [ ] | 189 kB |
| Entroido 2025: Bases do Concurso de Disfraces | [ ] | 112 kB |
| Entroido 2025: Ficha de inscrición no Concurso de Disfraces | [ ] | 126 kB |
- Detalles
- Escrito por Alicentis
- Categoría: novas
- Visto: 1047
-
“Lume á pedra, festa rachada, viva a Baña, filloa dourada” repite a letra da canción coa que Caxade apoia a declaración de Interese Turístico de Galicia para esta festa
-
Caxade lembrou os seus vínculos coa Baña, dende que comezara a súa carreira como mestre na escola unitaria de Lañas ata que en 2022 lle deron o premio Daniel García Barros
-
Voluntarias e voluntarios prepararon máis de dez mil filloas e atenderon durante todo o día as 30 pedras colocadas no pavillón de San Vicenzo
A Festa da Filloa da Pedra da Baña xa ten banda sonora. ‘Lume á pedra’ é o título da canción que Alonso Caxade estreou na primeira parte do pregón da vixésimo primeira edición. “Lume á pedra, festa rachada, viva A Baña, filloa dourada”, repite este tema que Caxade lle cede ao Concello, sumándose á iniciativa para solicitar a declaración de Festa de Interese Turístico para a Filloa da Pedra da Baña. Unha celebración que rematou este domingo cun multitudinario concerto de Fillas de Cassandra, o primeiro que ofrecen en Galicia este 2025.
Miles de persoas achegáronse durante toda a xornada deste domingo 16 de febreiro ata a Baña para participar nos numerosos actos organizados para celebrar a vixésimo primeira edición da Festa da Filloa da Pedra, que o Concello fai coincidir co comezo da tramitación do expediente para solicitar a declaración de Festa de Interese Turístico de Galicia para esta celebración tradicional.
Alonso Caxade sumouse a esta iniciativa compoñendo a canción na que fala de como se fai a filloa da pedra e da súa vinculación co municipio. Caxade, que comezou a súa carreira profesional como mestre na escola unitaria de Lañas e en 2022 recibiu o primeiro Premio Daniel García Barros que concede o Concello da Baña, relatou no seu pregón os moitos vínculos que o unen con este municipio. Caxade non dubidou en asegurar que lle cedía esta canción ao Concello para promocionar a Festa da Filloa da Pedra, como lle pedira a tenente de alcalde Mónica González Blanco. Ao rematar o pregón, Mónica González e o alcalde, José Antonio Pereira, regaláronlle a Caxade unha pedra de granito para que poida facer filloas na casa.
Foron miles de persoas as que durante todo o día se achegaron ata San Vicenzo para degustar as máis de 10.000 filloas que prepararon voluntarias e voluntarias durante a fin de semana, moitas delas elaboradas o domingo en directo nas 30 pedras colocadas no pavillón de San Vicenzo, e que estiveron traballando sen parar incluso durante o concerto de Fillas de Cassandra.
Moitas das persoas visitantes asinaron para solicitar que a Festa da Filloa da Pedra sexa declarada de interese turístico de Galicia, unha petición que tamén apoiou expresamente a portavoz do BNG do Parlamento galego, Ana Pontón, que se achegou ata a Baña e se animou a facer filloas e conversar coas voluntarias. Na festa tamén estiveron presentes os alcaldes de Val do Dubra, Diego Díaz; e o de Santa Comba, Alberto Romar, así como concelleiros dos tres grupos políticos da Corporación da Baña.
Os actos comezaron ás dez da mañá coa ruta ciclista da filloa, na que máis de medio cento de persoas percorreron dez quilómetros polo municipio bañense. Ao rematar puideron degustar uns petiscos de Ternera Gallega, elaborados polo chef José Manuel Mallón.
Integrantes da Escola de Música Tradicional da Baña iniciaron ao mediodía o apartado musical cunha concorrida e aplaudida actuación antes do pregón de Alonso Caxade. O trío Alborada encargouse da sesión vermú, mentres a Asociación de Familias do CPI San Vicente organizaba un taller de estampado de camisetas para a cativada. O mercado de artesanía e a demostración de artesanía en vivo animou toda a xornada dunha festa que contou coa presenza de medios de comunicación autonómicos e nacionais.
Durante o xantar, as persoas asistentes puideron degustar filloas da pedra, orrella e chourizo no pavillón, ou degustar polbo na carpa situada ao seu carón.
Xa pola tarde, os grupos 7 Ferrados e Os Carunchos animaron a sobremesa nun ateigado pavillón municipal non que non parou de entrar xente durante todo o día para degustar filloas da pedra. Tamén pola tarde, Xavier Castro Pérez presentaba o seu libro ‘Ben mantidos’.
O colofón a esta festa púxoo o multitudinario concerto de Fillas de Cassandra, o primeiro que o dúo galego de moda ofrece na nosa comunidade autónoma. Milleiros de persoas gozaron, cantaron e aplaudiron os temas que interpretaron María e Sara sobre o escenario.
- Detalles
- Escrito por Alicentis
- Categoría: novas
- Visto: 571
O Concello da Baña, en colaboración co tecido asociativo do municipio, continúa a campaña para conseguir que a Festa da Filloa da Pedra sexa recoñecida como Festa de Interese Turístico de Galicia. No marco desta iniciativa, o vindeiro domingo 16 de febreiro, coincidindo coa XXI edición da festa, levarase a cabo unha recollida de sinaturas para amosar o apoio da veciñanza a esta solicitude.
Tras máis de dúas décadas de celebración oficial, a Festa da Filloa da Pedra consolidouse como un referente gastronómico e cultural, atraendo cada ano a centos de persoas. Agora, o Concello quere que este recoñecemento institucional faga xustiza á súa importancia e tradición. Para logralo, é fundamental demostrar o arraigamento da festa na nosa terra.
Durante a celebración, habilitarase un espazo para que todas as persoas que queiran apoiar esta iniciativa poidan asinar. O Concello anima á veciñanza e a todas as persoas asistentes a sumarse e compartir esta acción, para que a nosa festa máis emblemática siga medrando e reciba o recoñecemento que merece.
- Detalles
- Escrito por Alicentis
- Categoría: novas
- Visto: 1002
-
A celebración será este domingo 16 de febreiro, dende as 9:30 horas, no pavillón de San Vicenzo
-
O pregón correrá a cargo de Alonso Caxade, mestre e músico
-
A programación tamén inclúe unha ruta ciclista, unha presentación literaria e un obradoiro de estampado de camisetas para a cativada
-
A xornada estará marcada pola presenza de 30 pedras en funcionamento
-
A actuación de Fillas de Cassandra poñerá o broche de ouro á festa a partir das 19:30 horas
Este domingo 16 de febreiro, A Baña acolle a tradicional Festa da Filloa da Pedra, unha celebración que combina gastronomía, cultura e tradición. O evento dará comezo ás 9:30 horas coa apertura das portas do pavillón, onde se poderá gozar ao longo do día dunha variada programación que inclúe o mercadiño de artesanía e a mostra de artesanía en vivo. A festa tamén contará cun amplo espazo gastronómico onde se ofrecerán degustacións de filloas da pedra, orella e chourizos, e a presenza dun polbeiro que sumará un toque único á xornada.
Este ano, 30 pedras estarán en funcionamento para garantir a elaboración continua de filloas ao longo de toda a xornada, ao prezo de 1€ por unidade. Ademais, o sábado 15 de febreiro, as filloas xa se estarán preparando a porta pechada para asegurar que todos os asistentes poidan degustar esta delicia tradicional.
Ás 10:00 h do domingo dará comezo a Ruta Ciclista da Filloa, unha actividade non competitiva que busca promover a práctica deportiva en familia, ao tempo que permite gozar da paisaxe bañense e da gastronomía local. Ás 12:00 h, a música tradicional galega será a protagonista coas actuacións da Escola de Música Tradicional da Baña, formada por músicos locais que traballan para preservar e difundir o legado sonoro galego.
Ao mesmo tempo, a Asociación de Familias de Alumnos e Alumnas (AFA) do CPI San Vicente ofrecerá un obradoiro de estampado de camisetas con collage fotográfico, no que poderán participar nenos e nenas a partir de 7 anos, previa inscrición.
O pregón deste ano será ás 13:00 h, e correrá a cargo de Alonso Caxade, mestre e músico coñecido polo seu traballo educativo na escola unitaria de Lañas e a súa traxectoria artística co seu proxecto de folk-pop Caxade.
A xornada continuará ás 13:30 h co ‘tardeo’ musical, que contará coas actuacións de Trío Alborada, 7 Ferrados e Os Carunchos, tres grupos recoñecidos pola súa contribución á música tradicional galega e a súa capacidade para animar calquera evento festivo. Ás 17:00 h, o historiador e investigador Xavier Castro Pérez presentará o seu libro Ben mantidos. Historia cultural da Gastronomía Galega, un estudo sobre a evolución da alimentación en Galicia e a súa influencia na nosa identidade cultural.
A festa rematará ás 19:30 h co esperado concerto das Fillas de Cassandra, que poñerán o broche de ouro ao evento.
Iniciativa para a declaración de Festa de Interese Turístico de Galicia
A Festa da Filloa da Pedra da Baña está organizada polo Concello da Baña, coa colaboración da Deputación da Coruña e Ternera Gallega e conta cunha longa tradición e mantén vivo un proceso de elaboración único, que atrae a miles de persoas cada ano.
Na pasada edición de 2024, participaron arredor de 10.000 persoas e repartíronse máis de 6.000 filloas.
O Pleno do Concello da Baña aprobou por unanimidade iniciar o expediente para solicitar a declaración de Festa de Interese Turístico de Galicia, e estase a traballar na recompilación de documentos históricos e fotografías antigas coa colaboración da veciñanza. Ademais, este domingo levarase a cabo durante a Festa unha recollida de sinaturas para apoias esta iniciativa.
A Festa da Filloa da Pedra é, sen dúbida, unha cita imprescindible no calendario festivo de A Baña, que mestura a tradición, a gastronomía e a cultura para crear unha xornada memorable para todos os asistentes.
- Detalles
- Escrito por Alicentis
- Categoría: novas
- Visto: 1810
Música en directo e mercado de artesanía acompañarán a degustación desta delicia bañense no pavillón de San Vicenzo
O pregón correrá a cargo de Alonso Caxade, mestre e músico, e a programación tamén inclúe unha ruta ciclista, unha presentación literaria e un obradoiro de estampado de camisetas para a cativada
A presentación da festa tivo lugar este xoves na Aula Gastronómica da Praza de Abastos de Santiago, coa elaboración de filloas en directo
A Aula Gastronómica da Praza de Abastos de Santiago acolleu este xoves a presentación da XXI Festa da Filloa da Pedra da Baña, que se celebrará o vindeiro domingo 16 de febreiro no pavillón de San Vicenzo. No acto interviñeron Mónica González, concelleira de Acción Social, Cultural e Servizos á Cidadanía do Concello da Baña; Emilio Lois, responsable da programación cultural da festa; e Elena López García, quen elaborou filloas da pedra en directo.
Asistiron á presentación o alcalde da Baña, José Antonio Pereira Gil; a concelleira de Festas de Santiago de Compostela, Pilar Lueiro; membros do equipo de goberno e da Corporación da Baña; e a xerente do GDR Terras de Compostela, Chefa Fernández.
A concelleira Mónica González destacou a importancia desta festa como parte do patrimonio gastronómico e cultural da comarca, lembrando que o Pleno do Concello da Baña aprobou por unanimidade iniciar o expediente para solicitar a declaración de Festa de Interese Turístico de Galicia. Neste sentido, sinalou que xa se está a traballar na documentación necesaria para poñer en valor a tradición e singularidade da Festa da Filloa da Pedra. Para iso, estase a elaborar un informe histórico e a recompilar fotografías antigas coa colaboración da veciñanza. Ademais, González quixo agradecer expresamente o traballo das persoas voluntarias que colaboran na elaboración das filloas, destacando o seu compromiso e dedicación para que a festa sexa un éxito.
Pola súa banda, Emilio Lois fixo fincapé na aposta pola música tradicional e pola cultura galega como elementos fundamentais do evento. "Este ano contaremos cun cartel de luxo, encabezado por Fillas de Cassandra, un grupo que está a revolucionar a escena musical galega cunha proposta innovadora que combina a tradición coas novas tendencias", explicou. Ademais, a programación incluirá actuacións de grupos como Trío Alborada, 7 Ferrados e Os Carunchos, así como da Escola de Música Tradicional da Baña, que abrirá as actuacións musicais ás 12.00 horas.
Unha xornada chea de tradición e cultura
A festa comezará ás 9.30 da mañá coa apertura das portas do pavillón, onde ao longo do día se poderá visitar o mercadiño de artesanía, ademais de gozar dunha mostra de artesanía en vivo. Paralelamente, ofreceranse degustacións de filloas da pedra, orella e chourizos, ademais de contar coa presenza dun polbeiro. Este ano haberá 30 pedras en funcionamento para garantir unha elaboración continua de filloas, cun prezo de 1€ por unidade. Ademais, o sábado traballarase a porta pechada para acumular unha boa cantidade de filloas e garantir que ningunha persoa quede sen probar esta delicia tradicional.
Ás 10.00 h dará comezo a Ruta Ciclista da Filloa, unha actividade non competitiva que busca fomentar a práctica deportiva en familia e desfrutar dunha mañá diferente ao redor da gastronomía e da paisaxe bañense. A partir das 12.00 h, a música encherá o recinto coa actuación da Escola de Música Tradicional da Baña, formada por músicos locais que están a preservar e difundir o legado sonoro galego. Á mesma hora, comezará o obradoiro de estampado de camisetas con collage fotográfico, organizado pola Asociación de Familias de Alumnos e Alumnas (AFA) do CPI San Vicente, no que poderán participar nenos e nenas a partir de 7 anos con inscrición previa.
O pregón deste ano será ás 13.00 h e correrá a cargo de Alonso Caxade, mestre e músico, coñecido tanto pola súa implicación educativa como pola súa traxectoria artística a través do proxecto de folk-pop que levou o seu nome, Caxade. O seu traballo na escola unitaria de Lañas deixou unha fonda pegada no ámbito educativo e cultural bañense.
Fin de festa con Fillas de Cassandra
Ás 13.30 h comezará o ‘tardeo’ con música en directo. O Trío Alborada abrirá o programa, seguido dos grupos 7 Ferrados e Os Carunchos, recoñecidos pola súa contribución á música tradicional galega e pola súa capacidade para animar calquera evento festivo.
Ás 17.00 h terá lugar a presentación do libro Ben mantidos. Historia cultural da Gastronomía Galega, de Xavier Castro Pérez. Este historiador e investigador analizará a evolución da alimentación en Galicia e a importancia da gastronomía na nosa identidade cultural.
A xornada pecharase cun concerto moi agardado: ás 19.30 h Fillas de Cassandra subirán ao escenario para poñerlle o broche de ouro á festa cun espectáculo cheo de enerxía e tradición reinterpretada.
Unha festa con arraigamento e proxección
A Festa da Filloa da Pedra da Baña está organizada polo Concello da Baña, coa colaboración da Deputación da Coruña e Ternera Gallega. Conta cunha longa tradición e mantén vivo un proceso de elaboración único. Durante a última edición, en 2024, participaron arredor de 10.000 persoas e repartíronse máis de 6.000 filloas.
Coa solicitude de declaración de Festa de Interese Turístico de Galicia, o Concello da Baña espera seguir impulsando e recoñecendo este evento como un dos referentes gastronómicos e culturais máis importantes da provincia.
