- Detalles
- Escrito por Alicentis
- Categoría: Emprego e Desenvolvemento INICIO
- Visitas: 1014
A ilusión e a maxia do Nadal foron máis fortes que a choiva matinal no Concello da Baña. Dende primeira hora, moitos nenos e nenas se achegaron ao Mercadiño de Nadal para confirmar que a visita de Papá Noel sería pola tarde. Foi un dos momentos máis emotivos da xornada, posto que toda a cativada lle quería trasladar as últimas peticións ao home de barba branca. Claro que houbo tamén que preferiu escribirlle a carta aos Reis Magos ou ao Apalpador, depositándoa na caixa do correo que estaba colocado na entrada da carpa onde se celebrou este particular mercado.
O trineo de Papá Noel tirado por dous renos de madeira foi o lugar máis demandado por nenos e nenas durante toda a mañá. Alí se facían fotografías e lle anticipan aos seus pais e nais algunhas da peticións que, logo pola tarde, lle facían ao home vestido de vermello (preme aquí para ver o album de fotos). Mestras tanto, os maiores visitaban os diferentes postos de artesanía para mercar mel, algúns doces típicos destas datas ou algo de artesanía ou xoiaría, nuns casos para uso propio e, noutros, para preparar os últimos regalos. Todas as persoas que facían unha compra recibían un boleto para participar no sorteo dunha cesta chea de produtos artesáns doados polos participantes neste Mercadiño de Nadal, que pola noite se levou para a súa casa Isabel Bermúdez Ríos, que non puido ocultar a súa ledicia polo premio.
Ramón Domínguez e Moncho Ces tocaban algunhas panxoliñas no primeiro concerto da xornada, que, pola tarde, completarían Os Campantes cunha actuación moi aplaudida polos presentes. Un chocolate quente con churros axudou a moitas das persoas asistentes a superar o frío, mentres agardaban que Lito Mambís acababa de preparar o polbo, o churrasco e a carne o caldeiro que moitos degustaron á hora de xantar.
O mercado de segunda man serviu para que moitos veciños e veciñas levaran roupa, cerámica e outros utensilios que xa non precisan e que, en algúns casos, foron mercados por outros veciños para darlle un segundo uso. Moi preto deste posto, había que mercaba plantas ou flores para adornar as súas casas nestas datas.
‘As aventuras do Quebranoces’ a primeira hora da tarde na casa de cultura xa deu unha pista de que a carpa do Mercadiño de Nadal íase quedar pequena para todos os que querían gozar coa maxia de Cayetano Lledó e, sobre todo, para falar con Papá Noel, unha das últimas oportunidades que a cativada da Baña vai ter este Nadal para trasladar persoalmente os xoguetes que agardan para á noite máis esperada do ano. Que, nuns casos será o 24 de decembro, aínda que hai quen segue sendo fiel aos Reis Magos e, tamén, a vella tradición galega do Apalpador.
Ruta do Románico
Como aperitivo dunha intensa xornada, o técnico de turismo Eutropio Rodríguez, guíaba a un grupo de persoas pola Ruta do Románico, contándolle as características máis salientables das igrexas de Portor (Negreira), Paramos (Val do Dubre) e a de Lañas (A Baña), como unha fórmula para poñer en valor o patrimonio histórico da comarca.
Podes ver os albumes de fotos no Facebook do Concello da Baña, neste enlaces:
Album de fotos da visita de Papá Noel (preme aquí).
Album dos Musicreques e do ambiente xeral do Mercadiño de Nadal (preme aquí).
Album dos postos de artesanía (preme aquí).
- Detalles
- Escrito por Alicentis
- Categoría: Emprego e Desenvolvemento INICIO
- Visitas: 1032
O Concello da Baña manterá mañá, domingo, pechadas ao tráfico as rúas da Praza do Concello pola celebración do Mercadiño de Nadal e de todas as actividades programadas para dar comezo ás festas.
En concreto, dende ás nove da maña ata as sete da tarde, permanecerá pechada ao tráfico a rúa Praza do Concello, no tramo que vai dende a rúa de Castelao ata a rúa de Rosalía de Castro, debido a que na praza que está diante da casa consistorial estará situada a carpa do Mercadiño de Nadal. Esta rúa é a que comunica A Baña con Santa Comba dende o centro de San Vicenzo.
Para facilitar a circulación estarán habilitadas rutas alternativas. Dende o Concello da Baña recomendan a todas as persoas que queiran ir en coche ata Santa Comba que utilicen o periférico.
As actividades programadas para mañá, domingo, comezan ás 10.00 horas coa saída do autobús para facer a Ruta do Románico e visitar as igrexas de Portor, Lañas e Paramos. O técnico de turismo Eutropio Rodríguez será o encargado de explicarlles aos asistentes as características de cada construcción.
As 12.30 horas, tamén na Praza do Concello, dará comezo o Concerto de Nadal a cargo dos profesores da Escola Municipal de Música Ramón Domínguez e Moncho Ces. Ás 16.30 horas na casa da cultura empeza o espectáculo dos musicreques titulado Os Quebranoces; e ás 17.00 Cayetano Lledó ofrecerá un espectáculo de maxia, antes de que Os Campantes da Baña inunden o recinto coa súa música, ás 18.00 horas. A visita de Papá Noel será o outro gran atractivo da tarde, sobre todo para os máis novos.
E ademais do Mercadiño de Nadal, no que se poderán ver e comprar produtos de artesanía, de gastronomía e agasallos para estas datas, o Concello da Baña tamén programou un mercado outlet e de segunda man na que todas as persoas interesadas poderán intercambiar e vender aquelas cousas que xa non precisen e que, tal vez, lles interesen a outras persoas.
- Detalles
- Escrito por Alicentis
- Categoría: Emprego e Desenvolvemento INICIO
- Visitas: 2113
29 outubro 2018
O grupo de traballo mixto do Obradoiro de emprego Xallas-Barcala-Dubra IV publicou o listado definitivo de alumnos seleccionados, que se pode consultar no documento adxunto.
24 outubro 2018
O grupo de traballo mixto do Obradoiro de emprego Xallas-Barcala-Dubra IV publicou hoxe o listado provisional de alumnos seleccionados, que se pode consultar no documento adxunto.
11 setembro 2018
A Consellería de Economía, Emprego e Industria ven de concederlle aos concellos da Baña, Negreira, Santa Comba e Val do Dubra o obradoiro dual de emprego ‘Xallas-Barcala-Dubra IV’ que permitirá a 20 persoas desempregadas maiores de 18 anos (5 de cada concello) formarse nas especialidades de Promoción turística local e información ao visitante e en Operacións auxiliares de revestimentos continuos en construción.
Esta modalidade de obradoiros duais de emprego combinan un contrato de formación e aprendizaxe durante 9 meses e, como principal novidade, a contratación en prácticas dun mínimo de tres meses máis nunha empresa emprazada no ámbito territorial onde teña lugar o taller de emprego, sempre que o traballo estea vinculado coas materias que se impartan no programa, segundo informa a Consellería.
Neste caso, o alumnado que resulte seleccionado do municipio da Baña recibirá durante 9 meses formación profesional para o emprego, alternándoa coa práctica profesional nas dúas especialidades deste obradoiro. Promoción turística local e información ao visitante, por unha banda, e Operacións auxiliares de revestimentos continuos en construción, pola outra.
Ademais, recibirá formación en materias de alfabetización informática, sensibilización ambiental, sensibilización en igualdade de oportunidades entre mulleres e homes e prevención de riscos laborais. E tamén orientación, asesoramento e información profesional e formación empresarial. Para o alumnado participante que non acadara os obxectivos da Educación Secundaria Obrigatoria organizaranse programas específicos para obter o certificado mediante as probas correspondentes.
Poderán ser beneficiarias do obradoiro dual de emprego Xallas-Barcala-Dubra IV persoas desempregadas que teñan 18 ou máis anos e estean inscritas no Servizo Público de Emprego de Galicia.
Todas as persoas que estean interesadas en participar no proceso selectivo que se desenvolverá proximamente deberán achegarse á Oficina de Emprego Santiago Norte, se non están inscritas nela como demandantes de emprego.
 20181024_Listado_Provisional_alumnos_seleccionados.pdf | [Listado provisional de alumnos admitidos] | 1791 kB |
| 20181029_Listado_Definitivo_alumnos_seleccionados.pdf | [Listado definitivo de alumnos admitidos] | 2011 kB |
- Detalles
- Escrito por Alicentis
- Categoría: Emprego e Desenvolvemento INICIO
- Visitas: 1429
O Concello da Baña daralle este domingo a benvida ao Nadal cun amplo programa de actividades que inclúen música, maxia, un mercado outlet e de segunda man e unha nova etapa da Ruta do Románico, todo isto acompaña o mercado de Nadal que se instalará na Praza do Concello dende o mediodía.
Ás 10.00 horas sairá o autobús para visitar as igrexas de Portor, Lañas e Paramos nunha nova etapa da Ruta do Románico, durante a cal o técnico de turismo Eutropio Rodríguez explicaralles aos asistentes as singularidades de cada un dos monumentos que se van visitar.
Pouco despois, ás 12.30 horas, os profesores da Escola de Música Ramón Domínguez e Moncho Ces ofrecerán o Concerto de Nadal, primeira das actividades englobadas dentro do Mercadiño de Nadal que permitirá ver e comprar produtos de artesanía e pratos típicos destas datas. A carpa que se instalará na Praza do Concello estará aberta ata as sete da tarde, para que veciños e visitantes poidan gozar cos xogos populares e un ambiente que enche de ilusión a pequenos e maiores.
Precisamente, para a cativada está programado o espectáculo Musicreques, que dende as catro da tarde na casa de Cultura ofrecerán a representación As aventuras do Quebranoces. Pouco despois, Cayetano Lledó, cuarto finalista de maxia cómica do Campionato do Mundo celebrado en Corea do Sur, ofrecerá un espectáculo de maxia que, sen dúbida, deixará coa boca aberta os espectadores.
O apartado musical rematará coa actuación dos Campantes da Baña, pero o Mercadiño de Nadal aínda garda unha sorpresa: a visita de Papá Noel, que escoitará atentamente as peticións que lle fagan os nenos e nenas que están agardando os regalos destas datas.
Ademais, todos aqueles que teñan cousas que xa non precisen poderán levalas ao mercado outlet e de segunda man, por se a alguén lle puidese interesar.
Aquelas persoas que desexen pasar o día na Baña que non se apuren e miren con calma os postos de artesanía, de gastronomía e de agasallos. E cando a fame aperte poderán achegarse ata o polbeiro para degustar un dos pratos máis típicos de Galicia. Un amplo programa de actividades co que A Baña quere dar comezo por todo o alto as festas de Nadal.
- Detalles
- Escrito por Alicentis
- Categoría: Emprego e Desenvolvemento INICIO
- Visitas: 1049
• A exposición de fotos antigas da Asociación de Veciños O Outeiro espertou a curiosidade de todos os asistentes
• Uns quince produtores presentaron as súas receitas para competir na cata de conservas
• O barbeiro tivo traballo dende primeira hora
Centos de persoas acudiron á carballeira de Ceilán para participar no feirón de Re-Volta e rememorar as grandes feiras que se organizaban nesta parroquia da Baña, que nos anos cincuenta do pasado século era das máis grandes da comarca. O ambiente e os atavíos cos que se vestiron moitos dos asistentes axudaron a cumprir co obxectivo do Concello da Baña cando puxo en marcha esta iniciativa: recordar as feiras e festas que se organizan no municipio hai máis de medio século.
A implicación dos veciños foi tamén unha das notas este ano, como recordaba o secretario da Asociación de Veciños O Outeiro de San Mamede do Monte, a parroquia duns 400 habitantes á que pertence a carballeira de Ceilán. A iniciativa para, aproveitando o Feirón de Re-Volta, organizar unha exposición de fotos antigas foi un éxito. “Participaron moitos veciños, e temos algunha foto de hai uns cen anos, como a imaxe na que se ve a tres mulleres facendo filloas arredor da lareira”, comentaba Fernando Forján.
Unhas imaxes que espertaron a curiosidade de todos os asistentes, que miraban as fotografías con agarimo, recordando ás persoas que aparecían retratadas. A Asociación de Veciños O Outeiro tamén foi a encargada de montar a cantina na que os asistentes á Re-Volta podían tomar viño ou probar uns callos recentemente feitos.
E mentres uns miraban as fotografías e outros tomaban uns viños, o barbeiro da Re-Volta vía medrar a cola de xente agardando para retocar o pelo. Sentado nunha cadeira que anda polos cen anos, o primeiro cliente solicitou o arranxo da súa barba dourada. Ao lado, outros degustaban as marmeladas artesanais, ou dispoñíanse a gozar cos xogos tradicionais preto do adro da igrexa.
Pegadas á carballeira había dúas carpas. Nunha delas, Lito Mambís estaba preparando o pulpo e o churrasco co que darlle de comer a tanta xente como esta mañá se achegou a Ceilán. Na outra, preparada pola organización, podíanse ver produtos artesáns de todo tipo: empanadas, bicas, mel, castañas, roupa, xoias, viño ou marmelos e cestos elaborados na Asociación Aspas. As flores e un taller de maquillaxe para os máis novos tamén se deron cita na Re-Volta este ano.
A cata de conservas artesanais xuntou a quince produtores, que presentaron receitas doces e salgadas para participar nun concurso no que o público foi o encargado de decidir cal de todas elas era a máis saborosa e se levaba como premio un ferrado cheo de produtos artesáns dos que se podían mercar na propia feira (un ferrado en cada categoría). Entre as marmeladas doces había castañas en caldo de azucre, marmelo de mazá e figo, marmelada de pementos. Nos pratos salgados presentáronse castañas con allo porro e cebola, agridoce de pementos, cabaza con ruibarbo e xenxibre, paté de porco con marmelada de bieiteiro ou tomates agridoces.
Os membros do grupo folclórico Faiscas da Pontraga foron os encargados de amenizar a mañá. Ao ritmo da súa música houbo que se animou a botar unhas bailas, mentres outros aplaudían con ganas. E entre tanto outros dedicábanse a tomar fotografías, tanto na feira como noutros lugares da Baña, para participar no maratón fotográfico que organizou o Concello e que tiña como premio, tamén, outro ferrado cheo de produtos artesáns da feira.
A diversión continuará durante toda a tarde do domingo.
Álbumes de fotografías no Facebook do Concello:
- Feirón e romería de Re-Volta 2018 (Primeira parte)
- Feirón e romería de Re-Volta 2018 (Segunda parte)
- Maratón Fotográfico da Feira da Re-Volta da Baña
