- Detalles
- Escrito por Alicentis
- Categoría: novas
- Visitas: 897
-
O escrito foi presentado no rexistro esta mesma mañá, asinado polos sete concelleiros e concelleiras da oposición
-
A Lei electoral establece que o pleno para debater debe celebrarse o décimo día hábil seguinte á presentación
-
O portavoz do PP e ex alcalde José Andrés García Cardeso figura como candidato á alcaldía
Os cinco concelleiros do Partido Popular e os dous de Compromiso por Galicia presentaron esta mañá no rexistro do Concello da Baña unha moción de censura ao alcalde socialista José Antonio Pereira Gil. O candidato á alcaldía proposto na moción é o líder do PP e ex alcalde José Andrés García Cardeso.
Segundo recolle o artigo 197 da Lei orgánica 5/1985 do réxime electoral xeral, a moción de censura terá que debaterse nun pleno que se celebrará ás doce horas do décimo día hábil seguinte ao da súa presentación. Por este motivo, o pleno da Baña para tratar a moción de censura convocarase para o vindeiro 14 de decembro ás 12.00 horas.
A moción de censura, como recolle a Lei electoral, deberá estar firmada pola maioría absoluta dos concelleiros da Corporación. Neste caso ven asinada por 7 dos once concelleiros da Baña.
Está asinada, por parte do Partido Popular, por José Andrés García Cardeso, Alicia Blanco Sande, José Manuel Landeira Liñares, María Rosa Ramos Freita e Francisco Pérez Redondo. Por Compromiso por Galicia asinaron César Ramos Domínguez e Lorena Trillo López.
- Detalles
- Escrito por Alicentis
- Categoría: novas
- Visitas: 925
-
Lorena Trillo López tomou posesión como concelleira de Compromiso por Galicia
-
Aprobada a declaración institucional ‘Municipios contra o maltrato’
Lorena Trillo López incorporouse onte á Corporación da Baña despois de prometer o seu cargo como nova concelleira de Compromiso por Galicia. Na sesión ordinaria de onte tamén se aprobou a declaración institucional Municipios contra o maltrato.
Lorena Trillo substitúe a David Gontán, que presentou a súa renuncia no pleno do pasado mes de outubro. Tomou posesión onte como primeiro punto da orde do día e despois os portavoces dos tres grupos políticos na Corporación da Baña déronlle a benvida.
Na sesión tamén se aprobou a declaración institucional Municipios contra o maltrato, impulsada por Antena 3 Noticias e Fundación Mutua Madrileña, na que A Baña declara ser un municipio con tolerancia cero contra o maltrato ás mulleres. O Concello da Baña “protexerá as vítimas e colaborará coa Xustiza e a Policía a perseguir aos maltratadores. Realizará todos os esforzos que poida para evitar que neste municipio se produza ningún maltrato ás mulleres”.
Con esta declaración, e ademais da aprobación no pleno, o Concello da Baña comprométese a instalar un sinal co lema “Municipio contra o Maltrato Tolerancia Cero” nunha zona céntrica.
En caso de producirse unha vítima mortal de maltrato, o Concello declarará loito oficial e promoverá unha concentración popular de repulsa diante da casa consistorial. Ademais, A Baña realizará polo menos unha acción formativa dirixida á mocidade de forma anual colaborando cos centros educativos.
O Concello da Baña, na medida das súas posibilidades, realizará un programa de axuda laboral ás vítimas de maltrato.
No debate, o portavoz do PP propuxo incluír o maltrato dixital dentro da violencia de xénero. Unha medida que foi aprobada esta mesma semana por unanimidade no Parlamento de Galicia que inclúe a violencia dixital na modificación da Lei galega de violencia de xénero.
A declaración institucional aprobouse por unanimidade dos tres grupos políticos.
No capítulo de rogos e preguntas, tanto PP como Compromiso decidiron non formular ningunha. César Ramos recordou que dende CxG presentaron un escrito solicitando información sobre o control de aforo no salón de plenos, ao que respondeu o alcalde sinalando que o pasado 21 de outubro a Xunta declarou a finalización da situación de emerxencia sanitaria, polo que se anulaba a limitación do aforo. “Admitimos público ata completar o número de butacas do salón de plenos”, concluíu o alcalde, como fan outros concellos como Teo, Val do Dubra, Ordes ou Rois.
Vídeo íntegro do pleno neste enlace (preme aquí)
- Detalles
- Escrito por Alicentis
- Categoría: novas
- Visitas: 413
O Pleno da Corporación da Baña aprobou esta mañá, en sesión extraordinaria, a conta xeral correspondente ao exercicio 2020 cos votos a favor do equipo de goberno socialista (4) e a abstención de PP (5) e CxG (2).
- Detalles
- Escrito por Alicentis
- Categoría: novas
- Visitas: 649
O Concello da Baña celebrou onte pleno ordinario no que se aprobaron definitivamente as bases reguladoras das axudas a autónomos, comerciantes e pequenas empresas para paliar os danos da covid-19. Na sesión, o alcalde e os portavoces de PP e Compromiso por Galicia agradeceron o traballo realizado como concelleiro por David Gontán (CxG), que onte asistiu ao seu último pleno antes de presentar a súa renuncia como membro da Corporación.
Co voto a favor do equipo de goberno (PSdeG) e do PP, e a abstención de Compromiso por Galicia, aprobáronse definitivamente as bases reguladoras das axudas para contribuír a minimizar o impacto económico e social da covid-19 entre os autónomos, comerciantes e pequenas empresas. Estas axudas serán financiadas con 30.000 euros de fondos propios do Concello.
Estas axudas divídense en dúas liñas. A primeira está destinada a complementar o PEL-Reactiva entre aquelas empresas que cumprindo cos requisitos establecidos pola Deputación da Coruña non recibiron estas axudas por falta de fondos. A segunda liña está destinada a impulsar a actividade económica e complementar as axudas xa outorgadas con anterioridade polo Concello da Baña no ano 2020. As bases foron publicadas no Boletín Oficial da Provincia da Coruña o pasado 9 de setembro, e agora entrarán definitivamente en vigor. (Poden consultarse neste enlace)
O de onte foi o último pleno ao que asistiu o concelleiro de Compromiso David Gontán, que hoxe presentará formalmente a súa renuncia como membro da Corporación da Baña. Tanto o alcalde como os portavoces do PP, Andrés García Cardeso, como César Ramós (CxG) recoñeceron o traballo feito por Gontán durante estes dous anos como concelleiro na Baña e desexáronlle éxitos tanto na súa vida persoal como profesional.
No capítulo de rogos e preguntas, tanto PP como CxG solicitaron coñecer cantas persoas están matriculadas na Escola Municipal de Música e pola execución ou estado de diferentes obras.
O vídeo íntegro do pleno pódese ver neste enlace: https://youtu.be/cgp_tb_BmF0
- Detalles
- Escrito por Alicentis
- Categoría: novas
- Visitas: 662
A Corporación da Baña, en sesión ordinaria celebrada o 6 de outubro de 2021, aprobou a seguinte declaración institucional
Os Concelleiros da Corporación da Baña, Manifestamos:
1°) Que existe entre a cidadania dos nosos concellos unha fonda preocupación polo elevado
número de proxectos de parques eólicos previstos nos nosos territorios.
2°) Esta preocupación ten unha vertente relacionada co impacto medioambiental dos parques proxectados,varios deles nas proximidades de nucleos habitados e que ademais se veñen a sumar Aos xa existentes. Neste sentido é de especial preocupación a escasa distancia minima aos Núcleos de poboación que establece a lexislación (500 metros), asi como a fragmentación en tódolos proxectos de parques que, en realidade,amosan unha continuidade e que comparten Infraestruturas polo que deberian ser considerados un único parque,ou como pouco de tramitación estatal
3°) Por outra banda. Dende a perspectiva económica, a lexislación actual non posibilita que a poboación rural se beneficie dunha maneira xusta da presenza desta industria nos seus territorios. Ao contrario do que acontece noutros paises non existen mecanismos que compensen a asimetria existente no poder de negociación entre promotores eólicos e veciñanza, sobrevoando nas negociacións a ameaza de expropiación pola declaración de interese público por parte da propia Administración. É particularmente preocupante que só os propietarios dos terreos directamente afectados reciban algún tipo de compensación, en calquera caso insuficiente, mentres que o resto de veciños que soportan os custes ambientais non teñen ningún beneficio económico directo.Nese sentido, a compensación que recibimos os concellos polo Fondo de Compensación Ambiental, derivado do canon eólico, é totalmente insuficiente.
4°) A percepción maioritaria é que as poboacións rurais estamos a soportar en exclusiva os custos ambientais da produción de enerxia eólica, mentres que os beneficios que permanecen no territorio son minimos.
5°)A carencia dunha avaliación ambiental estratéxica, a non ampliación de rede Natura 2000,a non utilización de ferramentas ,como o catálogo de humedales,e a escasa catalogación do patrimonio natural,fai que turbeiras,brañas,brezales húmedos,bosques atlánticos…en resume hábitats que directivas europeas como a 92/43 da CEE ou a directiva marco da auga,consideran prioritarios,fai que estén en grave risco e se tramiten moreas de proxectos no noso territorio sobre eles.
Neste sentido solicitamos que:
- Se proceda a MODIFICAR o actual marco normativo referido ao sector eólico en Galicia, para que atenda aos intereses da poboación do rural. A enerxia eólica debe ser e pode ser fomentada sen atentar contra os intereses ambientais e socioeconómicos da contorna onde se produce, só desa maneira pode pasar de ser unha ameaza a ser unha oportunidade para o noso rural.
- En consecuencia, se proceda a PARALIZAR os actuais proxectos ata que dende as instancias pertinentes. En particular no Parlamento de Galicia, non se aprobe un marco normativo máis xusto e sustentable para os territorios rurais,conte cunha ampliación de rede Natura, unha avaliación ambiental estratéxica e sexa publicado no DOG cousa que non ocurre co plan actual.