- Detalles
- Escrito por Alicentis
- Categoría: Deportes
- Visitas: 615
-
Máis de 200 persoas tomaron a saída nas catro probas organizadas polo Concello nas diferentes idades e modalidades
-
Atletas participantes loubaron as fermosas paisaxes e o ben coidado e sinalizado que estaba o percorrido para os adultos, de 16 e 26 quilómetros
-
As atletas locais Alba Pérez, Rosalía Moraig e Aitana Capeáns amadriñaron a proba, xunto co adestrador do Club Atletismo Negreira, García Estévez, estiveron presentes na saída
O Trail da Baña é unha proba dura, pero ten paraxes moi bonitos, e o percorrido está moi limpo e ben sinalizado”. Foi a apreciación na que coincidiron todos os atletas que esta mañá subiron ao podio despois de percorrer os 26 quilómetros do trail ou os 16 do minitrail que organizou o Concello da Baña polos montes do municipio. Máis de 200 persoas tomaron a saída nas diferentes modalidades, xa que ademais das probas competitivas houbo unha andaina de 16 quilómetros e unha carreira para os menores de idade. Rubén Insua e Belén Riadigos foron os gañadores do trail (26 km) e Juan Bello e Cristina Carril no minitrail (16 km).
Rubén Insua, do CDM Vértice, foi o gañador absoluto do Trail da Baña, cun de 2:26:11, seguido de Alberto Carou, do C.A. O Pino, que precisou de dúas horas e media (2:30:51) e Jaime García González, do ADC Monte Breamo, con 2:32:26. Na categoría feminina só houbo dúas participantes, Belén Riadigos, do CTR Galaico Trail Run, que precisou de tres horas (3:07:35) para facer o percorrido, e Eva de la Fuente, do CD Brión, que rematou cun tempo de 3:27:12. No
O minitrail, de 16 km de percorrido, foi a proba máis concorrida hoxe, con 89 participantes. Na liña de meta, en categoría masculina, gañaron Juan José Bello, do C.C. O Cotón Negreira, cun tempo de 1:30:11; Manuel Canoura, do Pontetrail, con 1:30:11, e José Antonio Señarís, do Runners Carballo, con 1:37:02. Na categoría feminina, as gañadores foron Cristina Carril, do C.A. O Pino (2:03:35); Carmen García, no E. Tartarugas (2:08:29) e Ana Lorena Gonzáliez, con 2:18:08.
Na andaina non competitiva tomaron a saída 81 persoas e no pequetrail, que tiña un circuíto de un quilómetro, participaron 22 menores. Entre os participantes había
Ao rematar o percorrido oficial, todos os participantes levaron un agasallo ecolóxico, un pino de Quercus xentileza de Inés Castro Floristas, para “plantar ao chegar a casa e axudar a repoboar os montes”, como lles recordou o presentador da proba, Miguel Villaverde.
Tras cruzar a meta, todas as persoas participantes destacaron o mesmo que fixeron os gañadores da proba absoluta: as fermosas paisaxes das que puideron gozar, o ben coidado e ben sinalizado que estaba o percorrido, e os tres puntos de avituallamento, motivos polos que felicitaron a organización da proba. Un traballo que o concelleiro de Promoción da vida activa e Deporte, César Ramos, agradeceu tanto a cuadrilla municipal (que se encargou de limpar os montes e o percorrido e dos avituallamentos) como a Asociación Seixos “por ser os artífices de deseñar o percorrido, porque son os que mellor coñecen os montes da Baña”. O alcalde, Andrés García Cardeso, fixo extensivo tamén este agradecemento aos máis de 30 voluntarios que colaboraron coa organización deste trail. O gañador absoluto, Rubén Insúa asegurou tras recoller o premio que volverá facer o percorrido “para recoller algúns dos fermosos cogumelos que vin durante a carreira, porque en Fisterra non os hai”.
Clasificacións
As clasificacións nas diferentes categorías quedaron do seguinte xeito:
- Trail 26 km. Absoluta
Rubén Insua, Alberto Carou e Jaime García, en homes. Belén Riadigos e Eva de la Fuente en mulleres.
- Veteranos 1
Ramón Barreiro, Javier Blanco e Alejandro Méndez
- Veteranos 2
José M. Cernadas e Adolfo Omar Rios.
- Minitrail 16 km. Absoluta
Juan José Berrol, Manuel Canoura e José Antonio Señarís (masculina), e Cristina Carril, Carme nGarcía e Ana González (feminina)
- Veteranos 1
Andrés Domínguez, Óscar Fernández e Eduardo Figueiras (masculina), e Raquel Ramos, Beli Bermúdez e Ana Ramos (feminina).
- Veteranos 2
Juan Rivas, Antón Juntal e José Luis Rial (masculina) e Angeles Salmonte Varela e Chefa Cajuso (feminina).
Agradecementos
O alcalde, Andrés García Cardeso, o tenente de alcalde César Ramos e a concelleira non adscrita Mónica González foron os encargados de entregar os trofeos, donados por Lau Creaciones.
O Concello agradeceu a colaboración de Protección Civil de Ames, Negreira, Santa Comba e Val do Dubra para manter a seguridade dos participantes, e a implicación dos moitos patrocinadores que colaboraron co Trail da Baña 2022.
Galerías de fotos do Trail da Baña 2022 na páxina de Facebook do Concello da Baña (neste enlace)
- Detalles
- Escrito por Alicentis
- Categoría: Deportes
- Visitas: 392
-
A rúa Castelao e as inmediacións da casa consistorial permanecerán pechadas ao tráfico ao longo da mañá do domingo 2 de outubro
-
O Concello recomenda utilizar accesos alternativos á rúa Castelao para achegarse aos aparcadoiros habilitados no polideportivo e campo de fútbol
-
Prégase a colaboración da veciñanza para evitar aparcar os vehículos na Praza do Concello e na marxe dereita da rúa Castelao no transcurso do desenvolvemento da proba deportiva
Con motivo do Trail da Baña 2022, que se celebrará este domingo, 2 de outubro, en San Vicenzo, o Concello informa á veciñanza, a través dun bando, que a entrada principal á vila pola rúa Castelao sufrirá algunhas restricións na circulación e no aparcamento de vehículos. Así mesmo, e para facilitar o desenvolvemento da proba, o Concello habilitará tres zonas de estacionamento e dous puntos de aseo para os corredores e corredoras, no polideportivo e no campo de fútbol municipais.
A rúa Castelao e as inmediacións da casa consistorial da Baña, no cruce coa rúa Xacinto Rodríguez e coa Praza do Concello, onde está prevista á saída dos e das atletas, permanecerán cortadas ao tráfico ao longo de toda a mañá, dende ás 9.00 horas e ata ás 16.00 horas. O Concello da Baña tamén apela á colaboración da veciñanza para que, na medida do posible, evite deixar os seus vehículos aparcados na Praza do Concello e na marxe dereita da rúa Castelao en dirección a Negreira durante toda a mañá do domingo. Deste xeito, facilitarase o bo desenvolvemento do trail e evitaranse posibles obstáculos.
Para favorecer o estacionamento de toda a veciñanza e das persoas que este domingo se acheguen á capital da Baña, ben para participar no trail ou ben para ver a proba, o Concello informa que se habilitaron tres zonas de aparcamento. Dúas delas están situadas nas inmediacións do polideportivo municipal de San Vicenzo, fronte ao mesmo e na rúa Tedelle, e unha terceira xunto ao campo de fútbol de Agra de Cartas. Os e as atletas disporán de duchas para asearse tanto no polideportivo municipal coma no campo de fútbol.
Para chegar á vila recoméndanse dous accesos alternativos á rúa Castelao dende a estrada AC-444. O primeiro por Señor, utilizando o desvío que hai inmediatamente antes da piscina para dirixirse despois ao polideportivo municipal. E o segundo no seguinte desvío cara A Baña despois da rotonda, localizado no cruce da AC-444 coa rúa Rosalía de Castro, para dirixirse ao campo de fútbol de Agra de Cartas.
O Concello da Baña agradece a colaboración da veciñanza e lamenta as molestias que poidan ocasionar as restricións de cortes de circulación durante o desenvolvemento da proba deportiva.
- Detalles
- Escrito por Alicentis
- Categoría: Deportes
- Visitas: 844
-
Os menores de idade poderán tamén practicar fútbol sala, xadrez on line, baile moderno, expresión corporal, karate, tenis de mesa e patinaxe artística
-
Para as persoa maiores ofértase expresión corporal e pilates
-
As actividades comezan o día 12 para facilitar a conciliación
-
O 19 remata o prazo de matrícula e haberá xornadas de portas abertas ata finais deste mes
O Concello da Baña abre hoxe o prazo de inscrición nas escolas deportivas municipais, que este ano comezarán o 12 de setembro para facilitar a conciliación ás familias do municipio. Judo e tenis son as novidades que se ofertan para os menores de idade, coa particularidade de que as clases de tenis serán gratuítas debido ao acordo asinado entre o Concello a Xunta e a Federación dentro do Plan Corresponsables.
Este curso, os menores de idade poderán practicar fútbol sala, baile moderno expresión corporal e karate dúas días a semana. Un día a semana haberá xadrez en liña, judo, tenis, tenis de mesa e patinaxe artística. Os horarios propostos para as diferentes actividades pódense consultar no arquivo adxunto (neste enlace)
Para persoas maiores a oferta inclúe pilates dous días a semana e expresión corporal os luns.
Os formularios e a ficha de inscrición para facer a inscrición pódense descargar na páxina web do Concello (este enlace) e tamén obter nas oficinas municipais. Unha vez cubertos hai que entregalos no Concello ou a través da sede electrónica.
O prazo de inscrición é de 10 días hábiles, contados a partir do seguinte á publicación das bases na páxina web, polo que rematará o vindeiro 19 de setembro. Aínda que as clase comezan o día 12, durante todo este mes haberá xornadas de portas abertas, para que menores e maiores poidan acudir a coñecer e participar nas diferentes actividades para confirmar que desexan seguir practicándoa.
Os prezos son os que figuran na ordenanza do ano 2016. É dicir: 60 euros por temporada para unha actividade e 90 euros anuais cando unha persoa se inscriba en dúas ou máis actividades.
No caso de familias, establécense 99 €/temporada para dous membros nunha actividade e de 132 €/ano cando dous membros acudan a dúas ou máis actividades. No caso de ser tres membros da unidade familiar os prezos serán, respectivamente, de 120 e 150 euros por temporada.
As bases das escolas deportivas municipais pódense consultar no arquivo adxunto (neste enlace).
 Bases escolas deportivas municipal A Baña 2022 | [ ] | 173 kB |
| Proposta de horarios escolas deportivas A Baña 2022 | [ ] | 85 kB |
| Formulario Inscrición escolas deportivas A Baña 2022-23 | [ ] | 523 kB |
- Detalles
- Escrito por Alicentis
- Categoría: Deportes
- Visitas: 482
-
Contará con catro modalidades: dúas probas competitivas de 26 e 16 quilómetros respectivamente, unha andaina e un pequetrail
-
Haberá trofeos para os homes e mulleres mellor clasificados en tres categorías e camisetas e agasallos para todos os participantes
-
O prazo para inscribirse, en liña na páxina www.galitiming.com, remata o martes 27 de setembro
As atletas bañenses Rosalía Moraig e Aitana Capeáns presentaron hoxe, na compaña do seu adestrador no Club Atletismo Negreira, José Manuel García Estévez, unha nova edición do Trail da Baña, que se desenvolverá o domingo 2 de outubro. A presentación desenvolveuse na Praza do Concello, punto de saída e meta da proba, que contará con dous itinerarios competitivos, unha andaina e un trail para a cativada. O prazo de inscricións remata o vindeiro martes, 27 de setembro.
Organizado polo Concello da Baña en colaboración co club Seixos das sendas enxebres e a asociación A Baña Emprende, o Trail foi presentado a primeira hora da tarde en San Vicenzo coa asistencia do alcalde, Andrés García Cardeso, e o tenente de alcalde e concelleiro de Promoción de Vida Activa e Deporte, César Ramos. A marchadora Alba Pérez, campiona galega de 5.000 metros desculpou a súa ausencia por coincidirlle a presentación coas clases na facultade, pero si confirmou que tomará a saída no Trail, onde exercerá como madriña xunto ás súas compañeiras, a tamén marchadora Rosalía Moraig e a lanzadora de peso Aitana Capeáns, e o seu adestrador.
O Trail da Baña iniciarase ás 9.45 horas coas dúas probas competitivas: un trail de 26 quilómetros, cun desnivel aproximado de 780 metros, e un minitrail de 16 Km. e un desnivel de 500 metros. En cada unha das modalidades, haberá trofeos para as tres primeiras e os tres primeiros clasificados en tres categorías: maiores de 18 anos, de 40 anos en adiante e de 55 anos en adiante.
Quince minutos máis tarde da saída do trail, ás dez, comezarán a andaina e o pequetrail. A andaina terá un percorrido aproximado de 16 quilómetros, mentres que o pequetrail se correrá sobre un circuíto circular de ao redor de un quilómetro no que nenas e nenos cubrirán distintas distancias segundo a súa idade. Os máis pequenos poderán ir na compaña dunha persoa adulta.
As probas de trail e a andaina contará con tres puntos de avituallamento de sólidos e líquidos durante o percorrido. O pequetrail ofrecerá abastecemento na saída e na meta. As inscricións, que teñen que realizarse en liña na páxina www.galitiming.com, teñen un prezo de 15 euros para a modalidade de trail, 12€ para o minitrail, 10€ para a andaina e 5€ para o pequetrail. O prazo para anotarse remata este martes 27 de setembro.
Todas as persoas participantes no Trail da Baña, en calquera das súas catro modalidades, recibirán de agasallo unha camiseta técnica e serán obsequiadas na liña de meta cun detalliño natural e ecolóxico para promocionar a sustentabilidade e a conciencia ambiental por mor da colaboración entre o Concello da Baña e Inés Castro Floristas, de Santa Comba. As cativas e cativos que corran o Pequetrail levarán tamén cadansúa medalla.
Hábitos saudables e paraxes naturais
César Ramos, concelleiro de Promoción de Vida Activa e Deporte da Baña, agradeceulles ás atletas bañenses a súa implicación no Trail. “É un orgullo contar con estas deportistas que tan bos resultados están acadando grazas ao labor tamén encomiable do seu adestrador”, sinalou. Ademais de animalas “a seguir esforzándose para perseguir máis éxitos”, o tenente de alcalde recordou que dende o Concello da Baña estase apostando non só polo deporte senón tamén pola vida activa e, neste sentido, recordou que “estas probas deportivas serven para fomentar hábitos saudables e tamén para difundir o noso patrimonio paisaxístico e incentivar o turismo natural, polo que animamos á xente a participar”.
- Detalles
- Escrito por Alicentis
- Categoría: Deportes
- Visitas: 957
-
Está organizado polo Concello en colaboración co Clube Seixos e a Asociación A Baña Emprende
-
Haberá probas competitivas de 26 e 16 quilómetros e unha andaina non competitiva de 16
-
A saída será na praza do Concello a partir das 9.45 horas
-
O prazo de inscrición remata o 27 de setembro
O Concello da Baña organiza o vindeiro 2 de outubro, domingo, unha nova edición do Trail da Baña, que contará con dúas probas competitivas (26 e 16 quilómetros), unha andaina non competitiva de 16 km e un pequetrail con probas adaptadas as idades e número de persoas inscritas. O prazo para anotarse remata o 27 de setembro, e debe facerse a través da web de Galitiming (neste enlace) pagando unha cota de entre 5 e 15 euros, segundo a proba elixida.
O Trail da Baña está organizado polo Concello, en colaboración con Clube Seixos das sendas enxebres e a Asociación A Baña Emprende, e permitirá percorrer algúns dos paraxes máis espectaculares do municipio. A saída darase na praza do Concello ás 9.45 horas para o trail e ás 10.00 horas para a andaina. As persoas participantes no trail terán un máximo de 6 horas para completar o percorrido, que ten un desnivel positivo duns 780 metros (500 metros o minitrail).
A organización recoméndanlle aos participantes que leven impermeable, teléfono móbil cargado, vaso e sistema de hidratación propio e establece tres puntos de abastecemento con líquido e sólido, para que as persoas participantes poidan repoñer forzas. No caso do pequetrail, o abastecemento estará na meta. As persoas participantes na andaina estarán auxiliados por membros da organización e nunca poderán abandonar dita formación para evitar confusións ou accidentes.
No caso do trail, establécense premios para os tres primeiros homes e as tres primeiras mulleres na liña de meta en cada unha das tres categorías establecidas: absoluta (maiores de 18 anos), veteranos e veteranas 1 (maiores de 40 anos) e veteranos e veteranas 2 (maiores de 55). O regulamento completo do Trail da Baña pódese consultar neste enlace (preme aquí).
A inscrición na proba debe facerse a través da páxina web de Galitiming (preme aquí) ata o 27 de setembro pagando a corresponden cota, que será de 15 euros para a modalidade de trail, 12 para o minitrail, 10 para a andaina e 5 euros para o pequetrail. A inscrición inclúe: dorsal personalizado, obsequio de participación, cronometraxe/clasificacións (no trail e minitrail), seguro de accidentes/reponsabilidade civil, abastecementos, servizo médico, ambulancia e servizo de fisioterapia no final da proba. As persoas participantes poderán recoller o seu dorsal o domingo 2 de outubro, entre ás 8.00 e ás 9.30 horas, na praza do Concello.