20220817 Cartel Torneo Xadrez copiaO pavillón municipal de San Vicenzo acollerá o domingo 18 de setembro o I Torneo de Xadrez Concello da Baña, unha proba puntuable para o VI Circuíto Intercomarcal de Xadrez da Deputación da Coruña. Trátase dunha competición de xadrez rápido que repartirá un total de 700 euros en premios: para os 10 primeiros clasificados, por categorías e por idade e, por último, para os mellores deportistas locais.

O torneo disputarase ao longo de todo o día seguindo o sistema de xogo suízo, con 7 ou 8 rondas segundo o número de xogadores e xogadoras. A primeira rolda disputarase ás 11.30 h e a cerimonia de clausura está prevista para as 19.00 h. Entrementres, unha chea de partidas cun ritmo de xogo de 10 minutos e emparellamentos realizados mediante un programa informático decidirán os máis de 20 premiados en total.

Os tres primeiros clasificados recibirán un trofeo e un premio en metálico de 120€, o primeiro; 100€ o segundo e 80€ o terceiro. Tamén haberá premios en metálico da cuarta á décima posicións e diferentes galardóns atendendo ás categorías por idade dos participantes, así como un recoñecemento para os tres mellores xadrecistas da Baña. Ademais, sortearanse agasallos para os non premiados.

A inscrición no I Torneo de Xadrez Concello da Baña está aberta ata o sábado 17 de setembro, un día antes da competición. Ten un custo xeral de 8€, se ben os sub-16 e xogadores/as locais pagarán 5€, e pode realizarse por teléfono (617 234 393) ou por correo electrónico (Este enderezo de correo está a ser protexido dos robots de correo lixo. Precisa activar o JavaScript para velo.).

O torneo está organizado polo Club Xadrez Arteixo e conta co patrocinio do Concello da Baña e coa colaboración da Deputación da Coruña e da empresa Lau Creaciones. Ademais de ser puntuable para o VI Circuíto Intercomarcal de Xadrez da Deputación da Coruña, tamén é válido para ELO FIDE de xadrez rápido (sistema de cualificación da Federación Internacional de Xadrez), en cuxo caso cómpre estar federado/a. As bases da competición poden consultarse no arquivo adxunto.

  • A atleta natural da Baña gañou na Coruña a medalla de prata nos 5.000 metros marcha do Campionato galego absoluto ao aire libre

  • O seu obxectivo: mellorar a súa marca nos 10 quilómetros rebaixándoa en cinco minutos

20220723 Alba Perez Nieto subcampioa galega 5000 Marcha 00001

A atleta Alba Pérez Nieto, natural de Corneira (A Baña), vén de acadar a medalla de prata nos 5.000 metros marcha no Campionato galego absoluto ao aire libre celebrado na Coruña. Quedou no segundo posto cun tempo de 27:09:23 minutos. Para esta nova promesa do deporte da comarca de Barcala, que milita no Club de Atletismo de Negreira, o importe non é o premio en si mesmo, aínda que se sinte orgullosa de telo acadado. “O importe é chegar ata aquí”, di, subliñando que detrás de cada proba “hai moito traballo. Esforceime moito por chegar ata ese campionato e fixen todo o que puiden para acadar a mellor marca posible, aínda que me houbese gustado que o resultado fose outro”.

“Para mi o atletismo é un xeito de vida, unha práctica que che ensina a afrontar os problemas”, indica a deportista, engadindo que “é unha forma de desafogarte e ver as cousas dende outra perspectiva”. Ela leva o atletismo e a marcha tatuado a fondo. “Hai veces que o corpo di que hai que descansar, pero cando, por algunha razón, non podo ir aos adestramentos, fáltame algo”.

A atleta recalca que “aquí nada cho dan gratis. Todo depende de ti, da túa forza de vontade, do teu traballo, do teu esforzo”. E iso é precisamente a mensaxe que quere transmitir a todas aquelas persoas mozas que se queiran dedicar a esta práctica deportiva. “Non hai escusa que valga: chova, faga frío ou calor hai que adestrar, saír a correr. Todo é importante para sumar quilómetros aínda que un ou unha non estea ao cento por cento”. Ela adestra entre 4 e 5 días á semana durante dúas horas nun circuíto variable a cabalo dos municipios de Negreira e da Baña, segundo as probas ás que se presente.

Alba Pérez Nieto comezou no mundo do atletismo hai “5 ou 6 anos”. Antes xogaba ao fútbol, na Baña. Lembra que as primeiras carreiras ás que concorreu “foron as de cross, cando estaba no colexio, da man dun profesor que se chamaba Nacho”. Esas primeiras experiencias e que unha curmá facía atletismo levaron a esta bañense por un novo camiño alleo ao fútbol. Así foi como se mergullou  no atletismo e xa conta cun bo palmarés ás súas costas.

Alba Pérez ten claro cal é o seu obxectivo para os vindeiros meses. “Quero mellorar a miña marca nos 10 quilómetros, pasando dos algo máis de 55 minutos aos 50 minutos. Iso sería o desexable, aínda que me conformaría con rebaixar esa marca en 3 ou 4 minutos. Tamén ser capaz de facer os 20 quilómetros”.

Dende o Concello da Baña, o alcalde, Andrés García Cardeso, e o concelleiro de Promoción da Vida Activa e Deporte, César Ramos, felicitaron á deportista de Corneira por este magnífico resultado. O Campionato galego absoluto de 5 km marcha celebrouse o pasado día 23 na Coruña. A campioa feminina foi Oleksandra Kostenko, o club Atlética Lucense, cun tempo de 26:08:58. A segunda praza foi para Alba Pérez (27:09:23) e o terceiro posto para Salomé Segade Buide, co CA Santiago, cun tempo de 27:36:37.

O pasado mes de decembro, Alba Perez recibíu un recoñecemento do Concello da Baña durante a celebración da carreira San Silvestre

Alba perez nieto correndo San Silvestre Bana 2021 ALF2832

  • Sete clubs, ademais do anfitrión, disputaron os encontros de fútbol 8

  • A competición foi organizadas pola Sociedade Deportiva A Baña en colaboración con Concello

20220624 Bana torneo futbol alevin benxamin equipos 6

O campo municipal de Cartas da Baña acolle hoxe o VII Torneo de Fútbol Base, organizado pola Sociedade Deportiva A Baña, en colaboración co Concello da Baña. A cita nesta xornadafestiva de San Xoán congregou a un total de oito clubs da comarca, ademais do anfitrión.

Dende as nove da mañá, e ao longo de toda a xornada, disputáronse os encontros de fútbol 8 nas categorías benxamín e alevín. Polo campo de fútbol pasaron os equipos da Sociedade Deportiva A Baña, do C.F. Rois; C.F. Noia, Xallas C.F.; da Asociación Deportiva Nicrariense; da SD Negreira, do Bastavales UD e do Milladoiro Sociedade Deportiva.

Pese a que a choiva ameazase por momentos a competición, os equipos entregáronse por completo ao xogo demostrando gran deportividade. Deportividade e bo facer que se viron recompensados polos aplausos do público. Había moitas gañas de xogo, de festa e de celebración despois deste dous últimos anos de restricións.  

20220624 Bana torneo futbol alevin benxamin equipos 15

 

  • Celebraranse na piscina municipal en horario de mañá 

  • Os cursos terán un custo de 30 euros por persoa e mes 

Piscina Baa 1

O Concello da Baña oferta ao longo deste verán cursos de natación para a poboación en xeral. Estes cursos desenvolveranse nas instalacións da piscina municipal, de luns a venres, en horario de mañá. O prezo dos cursos de natación serán de 30 euros por mes e persoa.

As persoas interesadas en participar deberán anotarse chamando ao teléfono do Concello da Baña, 981 88 65 01.

A piscina municipal inaugurou a súa temporada de verán o pasado 25 de xuño e permanecerá aberta ata o 15 de setembro. Cómpre lembrar que a veciñanza pode acceder de xeito gratuíto ás instalacións ata o 4 de xullo, día no na que comeza o campamento de verán. A partir desa data, o acceso para maiores de 14 anos será de pago ou con abono.

A tal efecto, a Concellaría de Promoción da Vida Activa e Deporte estableceu un abono mensual de 25 euros (15 euros por dúas semanas), e 45 € para o abono familiar. A entrada individual por día e persoa terá un custo de 2 €. Para retirar os abonos ou solicitar máis información é necesario contactar coa Concellaría de Promoción da Vida Activa e Deporte nas dependencias municipais ou chamando ao 981 88 65 01.

O horario de apertura da piscina municipal será, ata o 31 de agosto de 10.00 a 14.00 horas e de 15.00 a 21.00 horas, de luns a venres (as fins de semana abrirá as súas portas ás 12.00 horas). No mes de setembro pechará ás 20.30 horas.

Lembrar que tanto para os cursos de natación como para o baño é obrigatorio o uso de gorro e de chancletas.

  • O horario ata o 31 de agosto será de 10.00 a 14.00 e de 15.00 a 21.00 de luns a venres; e as fins de semana abrirá ás 12.00

  • O abono mensual custa 25 euros e o abono familiar son 45 euros mensuais

  • A entrada dun día será de 2 euros, e gratuíta para menores de 14 ano

 

20220624 Bana Piscina 2022 webO Concello da Baña inaugura mañá a temporada de verán coa apertura da piscina municipal de Agra de Chans, na que poderán darse chapuzóns de forma gratuíta ata o vindeiro 4 de xullo, día que comeza o campamento de verán.

A piscina estará aberta ata o 15 de setembro. O horario ata o 31 de agosto será de 10.00 a 14.00 e de 15.00 a 21.00 horas de luns a venres (as fins de semana abrirá ás 12.00 horas). No mes de setembro pechará ás 20.30 horas.

Para acceder ao recinto, a Concellería de Promoción da Vida Activa e Deporte establece un abono mensual de 25 euros (15 euros por dúas semanas), e 45 euros para o abono mensual familiar, costando a entrada dun día solo 2 euros. A entrada será gratuíta para menores de 14 anos.

Ata o vindeiro 4 de xullo, día que comeza o campamento de verán, o acceso á piscina municipal da Baña será gratuíto. O uso de gorro e chanclas é obrigatorio para poder bañarse ou acceder ao recinto.

Para retirar os abonos ou solicitar máis información é necesario contactar coa Concellería de Promoción da Vida Activa e Deporte nas dependencias municipais ou chamando ao 981 88 65 01.