- Detalles
- Escrito por Alicentis
- Categoría: Deportes
- Visitas: 703
-
Unai Casares e Sergio Calvo quedaron quintos na categoría sub-8 e sub-10, respectivamente
-
Todos eles acoden ás escolas deportivas municipais da Baña a adestrar con Alberto Dios
O Concello da Baña conta con dous novos campións galegos de xadrez, que se están a formar nas Escolas Deportivas Municipais. Daniel Manrique foi o mellor xogador na categoría sub-8 no campionato que se celebrou recentemente en Padrón, mentres que Nico Amado impúxose a todos os demais rivais na categoría sub-12.
Ademais destes dous campións, os representantes das Escolas Deportivas Municipais da Baña que adestra Alberto Dios Queiruga conseguiron meritorios postos nestas mesmas categorías, nas que Unai Casares (sub-8) e Sergio Calvo (sub-10) quedaron en quinto lugar. Cómpre destacar así mesmo a boa clasificación que obtivo Noel Casares, que competiu nas categorías sub-12 e sub-14.
O xadrez está espertando un grande interese entre os nenos e nenas da Baña. Como recoñece Alberto Dios, esta disciplina das Escolas Deportivas Municipais conta cuns dezaseis nenos e nenas que van adestrar regularmente durante o curso escolar. Un interese que, despois, recolle importantes premios nos campionatos galegos.
- Detalles
- Escrito por Alicentis
- Categoría: Deportes
- Visitas: 1003
-
Ofrece clases gratuítas de ioga, baile, pilates e ximnasia de mantemento
-
As persoas usuarias terán á súa disposición vídeos coas sesións e poden consultar tamén un adestrador persoal por whatsapp
Dende hoxe, toda a veciñanza da Baña pode acceder de xeito gratuíto a Gimnasio TV, unha plataforma dixital que ofrece clases de ioga, baile, baile activo, pilates e ximnasia de mantemento grazas a unha serie de vídeos que poderán ver a calquera hora e calquera día da semana só con dispoñer dun dispositivo con conexión a internet.
O Concello da Baña convida así a todos os veciños e veciñas a facer deporte de xeito seguro, agora que a pandemia modificou a práctica deportiva e obrigou a suspender as actividades grupais. Gimnasio TV, plataforma desenvolvida pola empresa de xestión deportiva Sportmadness, pon a disposición das persoas usuarias sesións de vídeo para as distintas modalidades, ademáis dun adestrador persoal que pode ser consultado por whatsapp.
Cunha estrutura semellante á de plataformas de vídeo como Netflix, Gimnasio TV pretende ofrecer unha alternativa flexible e de calidade ao deporte presencial. “Desde o Concello da Baña buscamos fomentar a actividade deportiva priorizando a interacción entre alumnado e adestradores”, subliña Mónica González, concelleira de Deportes.
Para comezar a poñerse en forma con Gimnasio TV, o único que teñen que facer todas as persoas interesadas da Baña e os seus arredores é rexistrarse na web www.gimnasiotv.com.
- Detalles
- Escrito por Alicentis
- Categoría: Deportes
- Visitas: 2217
O Concello da Baña fai público o protocolo anti covid para as actividades das Escolas Deportivas Municipais, que ten como obxectivo limitar ao máximo posible a capacidade de transmisión da enfermidade. Este protocolo inclúe unha normativa a seguir por todos os axentes que participan directa ou indirectamente na práctica deportiva, así como os planos das instalacións (pavillón e sala CPI) que regulan os fluxos de circulación das persoas e a ubicación dos diferentes elementos.
Na normativa de protección establecida figura a condición de non compartir material con carácter xeral (ou desinfectalo se é preciso compartilo), deixar os efectos persoais nos espazos habilitados para tal finalidade, realizar unha medición de temperatura antes de comezar a actividade, limpar as mans con hidroxel tanto á entrada como á saída e garantir o mantemento da distancia interpersoal de seguridade e a utilización de máscara. O uso dos vestiarios non está permitido, como tampouco a asistencia de público aos adestramentos ou ás clases.
O protocolo anexo nesta nova detalla polo miúdo as disposicións a adoptar en cada momento tanto por parte do monitorado como das familias ou dos propios deportistas. Inclúe as medidas de desinfección e limpeza de superficies e do material. Tamén se refire á declaración responsable que hai que entregar asinada coa aceptación das condicións de participación, obriga de información e consentimento informado para participar na actividade e explica os pasos a seguir no caso de presentar sintomatoloxía do virus covid 19. Por último, remarca que no caso de xurdir algún gromo nalgunha das instalacións ou actividades, automaticamente se cesará o uso da mesma e contactarase coa autoridade competente para cumprir as súas indicacións.
Inscrición e comezo da actividade
O 5 de outubro ábrese o prazo de inscrición nas Escolas Deportivas do Concello da Baña para o presente curso 2020/2021. As modalidades que se ofrecen este ano son patinaxe artística, tenis de mesa, karate, pilates, baile moderno, zumba, expresión corporal e xadrez. O prezo de cada actividade (agás xadrez), con dúas clases á semana, é de 60 euros para todo o curso. Se se elixen dúas ou máis, o prezo será de 90 euros.
As clases darán comezo o martes 13 de outubro, trala festividade do Pilar. Nesa semana, entre os días 13 e 16, faranse xornadas de portas abertas para que todas as persoas que o desexen poidan asistir e ver como se desenvolven as distintas actividades.
A inscrición pode facerse a partir de hoxe de tres xeitos diferentes: na sede electrónica do Concello da Baña, na Concellaría de Deportes ou enviando un correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. Os formularios que hai que remitir son a ficha de inscrición, a domiciliación bancaria e unha declaración responsable por causa da covid-19. Cabe ter en conta que é preciso contar cun número mínimo de inscritos para a realización das actividades e tamén que as prazas son limitadas.
As actividades desenvolveranse polas tardes no pavillón de San Vicenzo e no ximnasio do colexio da Baña. Concretamente, o polideportivo acollerá patinaxe artística (luns e venres de 17:00 a 18:00 horas) e expresión corporal (martes e xoves de 15:45 a 16:45). Pola súa parte, no CEIP da Baña daranse as clases de baile moderno (martes e xoves de 17:00 a 18:00 horas), tenis de mesa (luns e venres de 17:00 a 18:00 horas), karate (martes e xoves de 18:00 a 19:00 horas), zumba (luns e mércores de 19:30 a 20:30 horas) e pilates (martes e xoves de 20:00 a 21:00 horas). Xadrez farase en liña en horarios aínda por determinar.
- Detalles
- Escrito por Alicentis
- Categoría: Deportes
- Visitas: 994
-
Quedan prazas en tenis de mesa, expresión corporal, patinaxe, karate, pilates e xadrez
-
Baile moderno ten completo o aforo e zumba non acadou o mínimo de participantes
-
As clases de patinaxe desenvolveranse finalmente martes e xoves
As Escolas Deportivas da Baña pecharán o prazo de inscrición para o curso 2020/2021 o día 30 de outubro. Agora mesmo xa non se pode solicitar baile moderno por ter completo o aforo e hai que subliñar tamén que non se oferta zumba porque non chegou ao mínimo de inscritos para facer grupo.
Ademais, cambian os días das clases de patinaxe artística se ben manteñen o horario. Así, faranse martes e xoves de 17:00 a 18:00 horas.
As actividades aínda con prazas son tenis de mesa, expresión corporal, patinaxe, karate, pilates e xadrez (esta última de forma online) e a inscrición pode facerse de tres xeitos diferentes: na sede electrónica do Concello da Baña, na Concellaría de Deportes ou enviando un correo electrónico ao enderezo Este enderezo de correo está a ser protexido dos robots de correo lixo. Precisa activar o JavaScript para velo.. Os formularios que hai que remitir son a ficha de inscrición, a domiciliación bancaria e unha declaración responsable por causa da covid-19.
O prezo de cada actividade (agás xadrez), con dúas clases á semana, é de 60 euros para todo o curso. Se se elixen dúas ou máis, o prezo será de 90 euros.
Os formularios de inscrición pódense descargar no seguinte enlace: https://cutt.ly/YglDTea
- Detalles
- Escrito por Alicentis
- Categoría: Deportes
- Visitas: 1065
O Concello da Baña abre mañá, 1 de xullo, a piscina municipal, que terá aforo limitado e todas as medidas fixadas polas autoridades sanitarias para evitar a propagación da covid-19. A instalación permanecerá aberta de 15.30 a 21.00 horas durante os meses de xullo e agosto, e de 15.30 a 20.30 entre os días 1 ao 15 de setembro.
A abono familiar por mes custa 45 euros (25 € o individual), e 2 euros o pase diario. O abono por quince días custa 15 euros e o curso de natación 30 euros. Os menores de 14 anos terán acceso gratuíto á piscina.
Na piscina é obrigatorio o uso de gorro e chancletas, así como asegurar o distanciamento social, para o que se dividiron os espazos. Durante toda a temporada, extremaranse as medidas de hixiene na instalación.