- Detalles
- Escrito por Alicentis
- Categoría: Cultura e educación
- Visitas: 528
-
Poderán presentarse as persoas maiores de catorce anos con canle de Youtube e alomenos cinco vídeos publicados
-
Repartiranse en premios un total de 7.500 euros en doce categorías
-
Promove novas accións formativas cun obradoiro sobre posicionamento e outro sobre aspectos legais
Os Premios Youtubeiras abren ata o 22 de outubro o prazo de inscrición nunha quinta edición que ten como obxectivo consolidar a comunidade creadora que impulsou este certame dende o seu nacemento no 2017. Por iso, e pensando no mantemento das canles, por primeira vez non se van poder presentar vídeos illados. Poderán optar aos premios todas as persoas maiores de catorce anos con portal en Youtube e alomenos cinco vídeos publicados con data posterior ao 23 de outubro de 2020.
As categorías, ao igual que o ano pasado, volverán ser doce: canle, vídeo, youtubeira/o, calidade lingüística, impacto, calidade técnica, comunicación, creatividade, musical, didáctica, prioneira e premio do público. As tres primeiras están dotadas cun premio en metálico de mil euros e as nove restantes levarán 500 euros. En total, o concurso repartirá 7.500 euros en premios entre as persoas gañadoras.
De cara a axudar aos participantes a mellorar no proceso creativo, os Premios Youtubeiras promoverán varias accións formativas nas vindeiras semanas, que se suman ao obradoiro que tivo lugar ao comezo de verán para mellorar a calidade sonora dos vídeos. Neste mes de setembro, Adrián Suárez impartirá un curso sobre posicionamento na creación dixital e Bárbara Román, avogada especializada en empresas tecnolóxicas, desenvolverá en outubro outro obradoiro centrado nos aspectos legais do Youtube.
O servizo de normalización lingüística do Concello da Baña é un dos impulsores de Youtubeiras, xunto aos de Ames, O Grove, Moaña, Negreira, Pontevedra, Ribadeo, Rianxo, Santiago e Teo, así como as tres universidades galegas e a Deputacón da Coruña. A responsable do servizo bañense e coordinadora do Proxecto Youtubeiras, Carme Pereiro, foi a encargada de desvelar as novidades da quinta edición do certame nunha rolda de prensa celebrada hoxe en Santiago. Acompañárona na presentación Escarlata Pampín, concelleira de Normalización Lingüística e Mocidade de Ames; e Rubén Prol, concelleiro compostelán de Poíticas Lingüísticas.
Carme Pereiro explicou que se elixiu o lema de ‘Magnetismo en liña’ para remarcar a evolución do proxecto dende a súa posta en marcha. “O que se pretende con esta idea do magnetismo é incidir na atracción en canto á consolidación da figura da youtubeira, ao tempo que se subliña a influencia que o mundo youbeiro exerce xa na sociedade”, sinalou.
Neste sentido, incidiu no espectacular incremento de participación que foi experimentando o certame. “Dende a primeira edición destes premios, alá por 2017, até o día de hoxe, a comunidade de youtubeiros e youtubeiras que publican contidos na nosa lingua non deixou de medrar ao abeiro do concurso”, indicou Carme. Lembrou que “en 2017 concorreron 202 vídeos” e na última convocatoria de 2020 “a cifra ascendeu até os 536 vídeos”, unha marca que confían en superar este ano.
- Detalles
- Escrito por Alicentis
- Categoría: Cultura e educación
- Visitas: 509
-
As probas corresponden aos niveis 2, 3 e 4 e faranse en Santiago e en Ponferrada en datas aínda por determinar
Dende hoxe, martes 14 de setembro, e ata o 4 de outubro permanecerá aberto o prazo de inscrición nas probas para o obtención dos certificados de lingua galega (Celta) nos niveis 2, 3 e 4. Os exames realizaranse en Santiago e en Ponferrada nos meses de novembro e decembro. As datas exactas publicaranse no Diario Oficial de Galicia (DOG).
As persoas interesadas en facer as probas deberán cubrir o formulario de solicitude na sede electrónica da Xunta de Galicia (código de procedemento PL500C; accede dende esta ligazón) e pagar as taxas correspondentes aos dereitos de exame. Na solicitude, indicarán a que proba ou probas queren presentarse e en que localidade.
O anuncio da convocatoria publicouse no DOG do luns 13 de setembro. Pódese consultar picando nesta ligazón.
- Detalles
- Escrito por Alicentis
- Categoría: Cultura e educación
- Visitas: 1249
-
As clases comezarán a finais de mes no primeiro caso e o 5 de outubro na de música tradicional
-
Os formularios pódense descargar nos arquivos adxuntos
O Concello da Baña abre hoxe o prazo de matrícula para o curso 2021-2022 na Escola Municipal de Música, que comezará as clases a finais deste mes, e na Escola de Música Tradicional, que retomará as ensinanzas o 5 de outubro. As persoas interesadas poden cubrir os formularios que se atopan na páxina web e formalizar a inscrición no departamento de Educación e Cultura.
A Escola Municipal de Música da Baña ofrece a posibilidade de aprender ou mellorar coñecementos en once instrumentos, ademais de canto e solfexo. As clases están dirixidas para nenas e nenos a partir de 3 anos e tamén para persoas adultas.
As especialidades que poden cursarse son percusión, saxofón, frauta traveseira, clarinete, trompeta, tuba, trombón, bombardino, piano, guitarra e acordeón. Por cada instrumento pagarase unha mensualidade de vinte euros, cun desconto da metade do importe para o segundo e seguintes membros da mesma unidade familiar. As clases de solfexo están incluídas tamén na matrícula e, ao igual que o ano pasado, tamén se ofrece formación en canto.
Polo que respecta á Escola de Música Tradicional, que comezará as clases o 5 de outubro, as especialidades que se impartirán son as de gaita e percusión (tanto para infantil como para adultos) e pandeireta, neste caso só para maiores de idade. Ten que haber un grupo mínimo de cinco persoas para que poidan impartirse. O prezo será de 30 euros por todo o curso.
Os formularios de inscrición, así como a declaración responsable e a autorización de imaxe pódense descargar na páxina web. A formalización da matrícula debe facerse no departamento de Cultura e Educación do Concello.
 Autorizacion_Imaxe_Escolas_Musica | [ ] | 387 kB |
| Declaracion_responsable_Escolas_Musica_Baña | [ ] | 402 kB |
| Domiciliacion_Bancaria_Escolas_Musica | [ ] | 405 kB |
| Inscripción_Escola_MUNICIPAL_MUSICA_2021 | [ ] | 409 kB |
| Inscricion_escola_MUSICA_TRADICIONAL_2021 | [ ] | 273 kB |
- Detalles
- Escrito por Alicentis
- Categoría: Cultura e educación
- Visitas: 1141
-
A cantante receita “inculcar o respecto desde ben pequeniños” como fórmula para conseguir a igualdade de oportunidades entre homes e mulleres
-
Protagoniza o noveno vídeo da serie ‘A Baña en feminino’, que se publica no día das festas patronais de San Vicenzo
A cantante Rosa Rodríguez Álvarez é o 50% do Dúo Rosán e conta cunha longa traxectoria no eido das orquestras e da verbena en Galicia. Esta veciña da Baña radiografía o papel da muller na música coa súa participación no vídeo que se publica coincidindo coas festas patronais en San Vicenzo da Baña, dentro da serie audiovisual ‘A Baña en feminino. Visibilizando a muller rural’.
A xuízo de Rosa Rodríguez “mellorouse moito na música e agora hai varias mulleres que están levando a batuta”. A cantante sitúa os progresos na igualdade tamén noutros sectores: “antes non se vía unha muller camioneira cando agora si se ven”, afirma. E engade que “avanzamos moitísimo e seguiremos avanzando, pero paseniñamente, porque non é fácil”.
Neste sentido, Rosa Rodríguez receita “inculcar o respecto desde ben pequeniños” como medida para conseguir a igualdade de oportunidades entre homes e mulleres. “Non porque sexa papá ten que conducir e mamá ten que ir ao seu carón; mamá pode conducir e papá pode facer as camas ou fregar a louza”. Hai que “compartir e respectar”, sentencia a cantante.
Preguntada sobre o xeito de vestirse das mulleres nas actuacións, Rosa Rodríguez considera que non é nin unha forma de liberación feminina nin un símbolo de opresión das mulleres. “Creo que ningunha das dúas cousas”, asegura a intérprete, e engade que “levo moitos anos neste mundo e ninguén me obrigou a vestir dun xeito ou doutro”. En opinión de Rosa, “as cantantes vístense así porque teñen que dar unha imaxe e porque se senten ben, pero non porque o necesiten”. Do mesmo xeito, engade que “tamén os homes van agora máis musculados porque é parte do espectáculo. Non quere dicir que antes non o fora, pero quizais se baseaba máis en escoitar música e ir bailar, o que era a esencia da verbena”.
Por último, Rosa Rodríguez recomenda cancións que defenden a igualdade das mulleres e dos homes e mesmo canta algún fragmento no vídeo. Unha en galego, Son muller, do grupo Máis boas cás patacas, que di "mulleres é o que somos e mulleres seremos, desprezadas, maltratadas, iso non queremos". E outra en castelán, de Merche, titulada Abre tu puerta, “que creo que a xente non estaba concienciada de que era especialmente para nós”.
A Baña en feminino. Visibilizando a muller rural
O proxecto ‘A Baña en feminino. Visibilizando a muller rural’ consta de doce vídeos que o Concello está a publicar na súa canle de YouTube en 2021, a razón e un audiovisual por mes, nos que se lles dá voz a veciñas do municipio que se desempeñan en diversos eidos. Ten por obxectivos principais visibilizar as mulleres bañenses dentro dunha contorna aínda maioritariamente machista e axudar a reflexionar sobre a situación actual en canto a xénero, ao tempo que se promove a igualdade de xénero e se fomenta o uso do galego.
- Noelia Castro, graduada en Educación Infantil e monitora de ocio e tempo libre, convidou a reflexionar sobre o cambio de mentalidade necesario para a igualdade. Fíxoo nun vídeo publicado no Día Internacional da Mocidade, no que esta veciña de Lañas de 22 anos salientou a importancia dos campamentos como “espazos idóneos para promover a igualdade desde a primeira infancia”.
- Carme Liñares, avoa de cinco netos, protagonizou o vídeo publicado en xullo, con motivo do Día Internacional das Avoas e dos Avós. Esta veciña de Cabanas constataba o difícil que foi “chegar á liberdade de hoxe, porque antes a muller non tiña voto para nada” e convidaba a non dar pasos atrás.
- Verónica Liñares, enxeñeira de Montes e veciña de Ordoeste, incidiu no mes de xuño na necesidade de dotar á sociedade de “referentes femininos para que desapareza a fenda de xénero existente nas ciencias e nas enxeñarías”.
- A soldadora Nerea Vázquez protagonizou o vídeo que se publicou no Día do Traballo, no que falaba da presión que sentiu cando decidiu estudar para un oficio tradicionalmente masculino ou das dificultades laborais coas que se atopan as mulleres no sector do metal.
- Coincidindo co Día do Libro o 23 de abril, a gañadora do premio Álvaro Cunqueiro de teatro Carme Varela avogaba por liberar as mulleres da carga dos coidados. “É un lastre que levamos de sempre, o de coidar primeiro dos nenos e despois dos maiores”, subliñaba a filóloga e escritora de Duomes de Arriba.
- Xa en marzo, a ex perruqueira Isabel Giraut, promotora da Asociación de Mulleres na Baña, insistía na importancia de que dende pequenos rapaces e rapazas sexan educados para asumir idénticas responsabilidades no fogar.
- En febreiro, o protagonista foi Carlos Sande, un mozo filloeiro que reclamaba “condicións idóneas” para que as mulleres conten coas mesmas oportunidades ca os homes en todos os eidos vitais, ao tempo que censuraba a existencia de “micromachismos que temos tan interiorizados que nin os cuestionamos”.
- A mestra xubilada Dolores Allo inaugurou a serie ‘A Baña en feminino’ o pasado mes de xaneiro, co gallo do Día Internacional da Educación, falando das súas vivencias e dos avances que experimentou a sociedade nas últimas décadas de cara a acadar a igualdade.
- Detalles
- Escrito por Alicentis
- Categoría: Cultura e educación
- Visitas: 382
O Concello da Baña elabora unha enquisa entre as familias do CPI San Vicente para coñecer a demanda do servizo de madrugadores A Baña Madruga de cara ao vindeiro curso 2021-2022.
O obxectivo é coñecer as necesidades reais de conciliación das familias para valorar a conveniencia de seguir mantendo este servizo, tendo en conta o número de nenos e nenas que farían uso deste e en que condicións: con ou sen almorzo, horarios ou días de asistencia.
As persoas interesadas poden cubrir a enquisa neste enlace (preme aquí).
O programa de conciliación A Baña Madruga é un servizo de almorzo e ludoteca para a veciñanza máis cativa que está escolarizada e, coma nos dous cursos anteriores, levarase a cabo nas instalacións do mesmo centro educativo de luns a venres entre as 7.30 as 9.15 horas.