- Detalles
- Escrito por Alicentis
- Categoría: Servizos sociais INICIO
- Visitas: 533
-
Regina Paradela, Carmen Allo, José Manteiga e Victoriano Uzal recolleron unha placa co ‘Árbol da vida’
-
Foron recibidos no salón de plenos polo alcalde, o tenente de alcalde e a concelleira de Cultura
O Concello da Baña rendeulle unha homenaxe ás catro persoas de máis idade que o pasado día 15 asistiron a Festa dos Maiores. Nun acto celebrado no salón de plenos da casa consistorial, o alcalde entregoulles unha placa de madeira co Arbol da vida a María Regina Paradela Cancela, de San Vicenzo e 94 anos, Carmen Allo Castro (Suevos, 94 anos), José Manteiga García (Ordoeste, 96 anos) e a Melchor Victoriano Uzal Mariño (Troitosende, 89 anos). No acto estiveron presentes o tenente de alcalde, César Ramos; a concelleira de Cultura, Lorena Trillo, e familiares dos homenaxeados.
Andrés García Cardeso e César Ramos louvaron o traballo realizado durante toda a súa vida polas persoas homenaxeadas, sobre todo o das mulleres que viven no rural. “É un orgullo para A Baña que xente coma vós continúe representando o noso Concello con esa vitalidade”, recordaron. Despois entregáronlles unha reprodución do Árbol da vida e unha planta a cada un. O regalo de Carmen Allo, que non se puido desprazar, recolleuno o seu fillo José Manuel Antelo. José Manteiga acudiu acompañado do seu fillo José Luis e Victoriano Uzal da súa filla Anuncia e da súa neta Natalia Nogueira.
O alcalde recordou que o acto, previsto para o remate da festa dos maiores celebrado o pasado día 15 no polideportivo de San Vicenzo, suspendeuse debido a que un dos asistentes tivo un problema de saúde e foi trasladado ao hospital polos servizos médicos presentes na festa.
- Detalles
- Escrito por Alicentis
- Categoría: Servizos sociais INICIO
- Visitas: 678
- Non faltaron as conversas e bailes ao ritmo que marcaron a Charanga Tíralle do Aire e o Dúo Rosán
- Recoñecemento do alcalde ás mulleres no Día da Muller Rural: “Grazas ao voso traballo as xeracións actuais poden construír un futuro mellor”
Tres anos despois da última edición eran moitas as conversas pendentes que hoxe recuperaron na Baña as máis de cincocentas persoas que asistiron á Festa do maiores, celebrada no polideportivo de San Vicenzo. Esperados reencontros, anécdotas e ganas de pasalo ben marcaron esta celebración que recupera unha tradición no municipio, que hoxe celebrou a súa vixésimo sétima edición. A agrupación Tíralle do Aire e o Dúo Rosán puxeron a música coa que moitos dos asistentes non dubidaron en saír a bailar na sobremesa dun xantar de confraternidade que a maioría xa botaba de menos.
“Coa festa de hoxe queremos volver a normalidade e fortalecer vínculos entre a veciñanza”, díxolles Andrés García Cardeso aos asistentes antes de comezar o xantar. O alcalde tivo un recoñecemento especial para a muller rural, a maioría das que viven na Baña, coincidindo coa celebración do Día da Muller Rural. “Grazas ao voso traballo, as xeracións actuais seguen gozando do noso rural e poden construír un futuro mellor”, afirmou o alcalde, que animou á veciñanza a seguir gozando dos actos programados con motivo do Outono Cultural. García Cardeso tamén lles recordou que a partir dos martes, os maiores de 50 anos poden gozar dos servizos de audioloxía, podoloxía e reforzo da memoria que ofrecer a unidade móbil de Coidados porta a porta.
O delegado territorial da Xunta na provincia da Coruña, Gonzalo Trenor, agradeceulle ás persoas maiores “os valores que nos transmitides e que axudaron a preservar a nosa identidade, cultura e tamén a nosa economía. Grazas polo voso esforzo, e pasádeo moi ben hoxe”, concluíu.
Entre as autoridades presentes na festa estaban os concelleiros da Corporación da Baña, a alcaldesa de Santa Comba e representantes dos concellos de Negreira e Val do Dubra.
O restaurante Casa Taboada, de Touro, encargouse de preparar o menú, a base de empanada, polbo con cachelos, carne ó caldeiro, tartas de améndoa e de queixo, e café.
- Detalles
- Escrito por Alicentis
- Categoría: Servizos sociais INICIO
- Visitas: 550
-
A veciñanza de 55 anos ou máis recibirá unha carta no seu domicilio que servirá como entrada ao evento
-
Deberá confirmar a súa asistencia no teléfono 981 886 501 ou no departamento de Servizos Sociais
-
O Concello poñerá un servizo de autobús para facilitar o desprazamento ao polideportivo
A Baña volverá celebrar o sábado 15 de outubro no pavillón de San Vicenzo a tradicional Festa dos Maiores, que dará comezo á unha da tarde. Durante os próximos días, a veciñanza de 55 anos ou máis recibirá na súa casa o convite para asistir a 27 edición dun evento que conta con gran aceptación e que se viu interrompido por causa da pandemia durante os dous últimos anos.
Os únicos requisitos para poder acudir á festa son os de ter 55 anos ou máis e estar empadroado no Concello da Baña. A propia carta do convite, asinada polo alcalde e que será enviada aos domicilios das veciñas e veciños servirá como entrada á festa, amosándoa xunto ao DNI. As persoas interesadas terán que confirmar á súa asistencia antes do 7 de outubro chamando ao número de teléfono 981 886 501 ou presencialmente no departamento de Servizos Sociais, aberto ao público de luns a venres en horario de 9.30 a 14.00 horas.
Coa fin de facilitar o traslado ao pavillón municipal, o Concello da Baña poñerá un servizo de autobús polas parroquias. Aquelas persoas que o vaian utilizar deberán dicilo no momento no que confirmen a súa asistencia.
O modelo da carta que recibirán os maiores pode consultarse no arquivo adxunto.
 convite_festa_maiores.pdf | [ ] | 1684 kB |
- Detalles
- Escrito por Alicentis
- Categoría: Servizos sociais INICIO
- Visitas: 493
-
Está destinado a persoas maiores de 60 anos ou de 55 no caso de ser pensionistas
-
Poderán gozar de dez días de estadía nun establecemento termal con pensión completa por un máximo de 377 euros
-
Para máis información poden dirixirse ao departamento de servizos sociais do Concello da Baña
O programa de termalismo Benestar en balnearios, impulsado pola Xunta de Galicia, oferta este ano un total de 637 prazas para persoas empadroadas en Galicia maiores de 60 anos (ou 55, sempre que sexan pensionistas). Tal e como recollen as bases da convocatoria, publicada este venres no Diario Oficial de Galicia, as estadías serán de dez días (nove noites) e desenvolveranse entre o 1 de novembro e o 17 de decembro do presente ano 2022. A Consellería de Política Social subvenciona entre un 36 e un 43% do custo dependendo do establecemento, polo que os prezos oscilan entre os 349,89 euros e os 377,89 euros.
Ademais de cumprir os requisitos do empadroamento en Galicia e da idade de máis de 60 anos, as persoas que queiran beneficiarse do programa de Benestar deberán valerse por si mesmas e non padecer alteracións de comportamento que poidan alterar a convivencia nin enfermidades contaxiosas. Poderán acudir ao balneario na compaña da parella, dun fillo ou dunha filla cun grao de discapacidade do 33 por cento ou máis pero que non precise apoio ou doutra persoa que tamén desexe solicitar praza.
As estadías, que comprenden dende o mediodía do día de chegada ata o mediodía do día de saída, realízanse en réxime de pensión completa en habitación dobre. Aquelas persoas que desexen aloxarse soas, terán que aboar a diferenza no caso de que haxa dispoñiblidade. Os servizos inclúen o recoñecemento médico e un tratamento termal básico, así como a participación nas actividades de animación.
As solicitudes poderán presentarse dende o luns 10 de outubro ata o luns 24 de outubro, preferiblemente na sede electrónica da Xunta. Opcionalmente, as persoas interesadas tamén teñen a opción de facelo nos lugares e rexistros habituais. Para obter máis información, poden dirixirse ao teléfono social 900 333 666 ou aos servizos sociais do Concello da Baña.
As bases do programa, os establecementos, as datas e os formularios pódense consultar neste enlace ao DOG.
- Detalles
- Escrito por Alicentis
- Categoría: Servizos sociais INICIO
- Visitas: 1292
24 de agosto de 2022
Publícase a lista definitiva de admitidos e excluídos, baremación das solicitudes de prazas, establecemento de período de matrícula e inicio docurso 2022/2023 no Punto de Atención á Infancia (PAI) do Concello da Baña.
A resolución da alcaldía pode consultarse neste enlace ou no arquivo adxunto
8 de agosto de 2022
Publícase a lista de admitidos e excluídos así como a baremación das solicitudes de praza no PAI da Baña para o curso 2022/2023, iniciándose un prazo de 10 días hábiles para as oportunas reclamacións. O decreto da Alcaldía pode consultarse neste enlace ou no arquivo adxunto.
1 de agosto de 2022
O Concello da Baña vén de facer público a través dun decreto o listado de persoas que deberán subsanar algún erro na solicitude de praza no Punto de Antención á Infancia para o curso 2022-2023. Os interesados teñen de prazo ata o venres 5 de agosto de 2022 para achegar a documentación requirida. O decreto de subsanación de erros pode consultarse nos documentos adxuntos e neste enlace.
22 de xullo de 2022
O Punto de Atención á Infancia do Concello da Baña (PAI) abre dende hoxe, e ata o 29 de xullo, o prazo de presentación de solicitudes de praza para o vindeiro curso escolar 2022-23, tanto para aquelas familias que xa teñen menores escolarizados no centro como para que desexen incorporarse por primeira vez. Poden solicitar praza no centro os nenos e as nenas de entre 3 meses e 3 anos. Cómpre subliñar que o número total de prazas coas que conta o PAI é de 20.
As familias interesadas deberán presentar o modelo de solicitude de reserva ben no rexistro municipal, ben na sede electrónica do Concello (neste enlace). O formulario para solicitar praza pódese descargar na web do Concello (neste enlace)
As familias con crianzas xa matriculadas no centro deberán aportar xunto coa solicitude, certificado de empadroamento da unidade familiar e, no seu caso, certificado de empresa ou contrato laboral. Este certificado de empadroamento poderá ser substituído por unha autorización expresa de consulta de datos padronais. Tamén deberán aportar copia certificada da declaración do IRPF ou, no seu defecto, certificado de imputación de rendas e certificación de ingresos; copia da última nómina ou informe da vida laboral.
No caso das familias que soliciten praza por primeira vez, ademais da documentación anteriormente sinalada, tamén deberán aportar copia do DNI dos proxenitores, titores/as e ou representantes legais; informe do equipo de valoración de minusvalías no caso de praza de integración; libro de familia numerosa, de ser o caso, ou resgado de ter presentado a súa solicitude; se é familia monoparental, a documentación acreditativa; e, no caso de violencia de xénero, certificado da orde de protección ou medida de cautela, informe dos servizos sociais ou certificación dos servizos autonómicos de acollida.
O Concello da Baña publicará o 1 de agosto o listado de solicitudes de praza no PAI. E, ese mesmo día e ata o 5 de agosto establecese o prazo para o requirimento e subsanación de documentación.
A lista provisional de admitidos e excluídos exporase nos taboleiros de anuncio do Concello, no PAI, na páxina web do Concello e na súa sede electrónica. Os solicitantes que o desexen poderán efectuar as reclamacións que consideren oportunas.
Unha vez resoltas todas as reclamacións, publicarase a listaxe definitiva de admitidos e excluídos e a listaxe de agarda coas puntuacións obtidas e establecerase o período de formalización de matrícula.
Os criterios de prioridade para a adxudicación de prazas e os criterios de baremación están recollidos na modificación da ordenanza do PAI, aprobada definitivamente no pleno deste xoves, 21 de agosto. No caso de renovación de praza, terán máxima preferencia (prioridade 1) os nenos e nenas matriculados no curso anterior cuxos proxenitores se atopen empadroados no municipio e as solicitudes efectuadas para crianzas matriculadas no curso anterior que sexan fillos/as do persoal que presta servizo no PAI ou noutros servizos do Concello da Baña.
Para as solicitudes de novo ingreso, terán prioridade os menores empadroados no municipio (tanto o neno ou a nena para a que se solicita a praza como os proxenitores ou titores legais); os fillos e fillas do persoal que presta servizo no PAI ou noutros servizos do Concello da Baña e aqueles menores que xa teñan un irmán ou irmá escolarizados no presente curso.
A ordenanza tamén recolle unha reserva de prazas de emerxencia social (menores tutelados pola administración autonómica, crianzas de mulleres vítimas de violencia de xénero ou aqueles outros nos cales concorren circunstancias familiares que requiran unha intervención inmediata, tras os informes pertinentes).
| Decreto do prazo de subsanación de solicitudes | [ ] | 174 kB |
| Lista de admitidos e excluídos e baremación no PAI. Curso 22/23 | [ ] | 174 kB |
| 20220823_Lista_definitiva_admitidos_PAI_BAÑA | [ ] | 214 kB |