20201031 Voluntariado Senior

O Concello da Baña executou o programa voluntariado sénior, financiado pola Consellería de Política Social, para coñecer a opinión das persoas do municipio maiores de 55 anos e a súa valoración sobre a calidade de vida, infraestruturas e recursos (actividades, servizos que reciben, etc.) dos que dispoñen, coa finalidade de mellorar o envellecemento activo e saudable da poboación do municipio. Este proxecto, denominado ‘Compartindo a calquera idade’, contou cunha achega de 2.400 euros da Dirección Xeral de Xuventude, Participación e Voluntariado da Consellería de Política Social.

1.- Denominación do proxecto

Compartindo a calquera idade

 

2.- Xustificación e situación de partida

O Concello da Baña é un concello rural de 3.431 habitantes dos cales 839 son homes con idades entre 55 e 104 anos e 1.044 son mulleres entre 55 e 104 anos.

O Concello ten 15 parroquias e a poboación está moi envellecida e illada. As comunicacións entre lugares ou coa capital do concello son nulas dependendo de taxis ou de vehículos de familiares, para acudir ao centro de saúde, concello, entidades bancarias, supermercado...

As actividades realizadas con esta poboación son basicamente as do Servizo de Axuda no Fogar, Comedor sobre rodas, Lavandería sobre rodas, de estimulación cognitiva e exercicio físico na capital e nalgunhas das parroquias. Todas as parroquias do concello dispoñen de local social.

Consideramos necesario analizar a situación desta poboación que supón unha porcentaxe tan alta do total de habitantes do Concello da Baña.

Para iso queremos que sexan eles mesmos os que reflictan e analicen as súas necesidades e as posibles formas de suplir ditas carencias.

 

3 Obxectivos

-Formar a persoas maiores de 55 anos no voluntariado e acción voluntaria.

-Analizar as necesidades comunitarias, en concreto dos nosos maiores.

-Recoller iniciativas de mellora dos servizos comunitarios.

-Crear e ampliar un grupo de voluntariado senior estable que faga un seguimento do proxecto, poida desenvolver algunha das respostas a esas necesidades (se se detecta persoas soas, facer acompañamentos...) e facer crítica construtiva de todo o que vai acontecendo.

-Eliminar estereotipos sobre as persoas maiores e valorar a súa experiencia para a modificación das actuacións e situación do concello relativo a esta poboación.

 

4.Desenvolvemento do proxecto. Fases

4.1- Campaña de difusión sobre o voluntariado sénior: a través tanto das novas tecnoloxías (facebook e páxina web do concello) como de cartas ás persoas destinatarias da campaña. O día 6 de agosto difundiuse a través das redes sociais do Concello un resumo do programa e a invitación a participar como persoas voluntarias. O día 12 de agosto publicouse nas redes sociais a mesma información pero destinada a persoas de 55 anos ou máis que se ofertaran a ser enquisadas.

4.2- Selección das 8 persoas voluntarias e persoal técnico, formación sobre o voluntariado, obxectivos do proxecto e as súas funcións. O grupo de voluntariado quedou constituído por 5 homes e 3 mulleres.

4.3- Debido á situación da Covid o contacto e a formación das persoas voluntarias fíxose de xeito individualizado. Logo noutra sesión conxunta (garantindo as medidas sanitarias) realizouse un debate entre as persoas voluntarias e o persoal técnico para a elaboración dunha enquisa con preguntas abertas, sobre aspectos que o colectivo de persoas maiores queren ou consideran que debe ser modificado ou ben conservar ou mellorar, reducida a un número de cuestións para a creación dunha análise de necesidades.

4.4- Ante a situación Covid ofertóuselles a posibilidade de facer as enquisas de xeito telefónico pero as persoas voluntarias decidiron utilizar o porta a porta. A súa función, nun principio, porque o proxecto é máis amplo, consistía en repartir as enquisas explicar a súa finalidade, entregalas nas casas (que voluntariamente aceptaron) e pasar a recollelas noutro día.

Todas as enquisas avaliadas cumpren coa normativa de protección de datos de carácter persoal (ver documento adxunto).

A técnica do concello recolleu todas as enquisas, desbotou as que non cumprían os requisitos esixidos (ben por non estar autorizada a cesión de datos ou por faltar algún dato como o sexo ou a idade que permitisen a súa avaliación) e elaborou o documento de resultados da enquisa (ver documento adxunto).

Informamos da posibilidade de cumprimentar a enquisa, por parte das persoas que non o fixeron anteriormente, e tamén se convida a todas as persoas de 55 anos ou máis a incorporarse como voluntarias ao proxecto que é moito máis amplo.

Tanto se queren ser enquisados como formar parte do voluntariado sénior poden informarse e comunicalo no teléfono 981 817 605 ou no correo electrónico Este enderezo de correo está a ser protexido dos robots de correo lixo. Precisa activar o JavaScript para velo. ou presencialmente na Casa da cultura de luns a venres en horario de 10 a 14 horas.

 

Enquisa e documentación

A esquisa que se elaborou para este proxecto, como o resultados da mesma e o tratamento de datos, pódense consultar nos documentos adxuntos.

 

            

  • Permítelle adquirir produtos básicos de alimentación, hixiene ou farmacia ás familias vulnerables economicamente

  • O importe por trimestre oscila entre os 450 euros para unha persoa e os 900 para familias de tres membros ou máis

A Xunta de Galicia amplía outros tres meses máis a vixencia da tarxeta básica, iniciativa destinada a paliar os efectos económicos provocados pola Covid-19 axudando a familias en situación de vulnerabilidade a adquirir produtos básicos de alimentación, hixiene ou farmacia.

Esta tarxeta, que é anónima e entrou en funcionamento o pasado mes de xullo, beneficiou xa unhas sete mil familias. Agora estas mesmas familias poden solicitar a ampliación da achega por tres meses máis, ata fin de ano, e tamén poden optar a ela novos solicitantes.

O importe das tarxetas por trimestre será de 450, 600 e 900 euros en función de que os membros que compoñen a unidade familiar sexan un, dous ou tres ou máis, respectivamente.

A tarxeta beneficia persoas ou familias residentes en Galicia que se atopan en situación de vulnerabilidade económica porque os seus ingresos ou prestacións están por debaixo dos ingresos mínimos marcados pola Risga. Para solicitala, as persoas interesadas deben acudir aos traballadores sociais dos seus concellos e da súa xestión encargarase a Cruz Vermella. O habitual é que reciban as tarxetas nun prazo de 72 horas.

Máis información premendo aquí

20200930 mascarillas webO Concello da Baña vén de recibir 18 caixas de mascarillas, cun total de 900 unidades, para distribuír entre os colectivos máis vulnerables á Covid-19, operarios municipais de limpeza, traballadores de Servizos Sociais e do Servizo de Axuda no Fogar, entre outros. Esta doazón forma parte da campaña promovida polo Goberno de España e a FEMP para avanzar na contención da pandemia e na concienciación da cultura da protección á cidadanía.

Neste sentido, estanse a entregar aos concellos de menos de 20.000 habitantes un total de 117.000 mescarillas a través da Deputación da Coruña. O reparto, fixado en proporción á poboación de cada concello, outorgoulle ao Concello da Baña un total de 900 unidades, que xa foron entregadas pola Deputación.

A prioridade establecida polo Goberno e a FEMP para o reparto deste material son os colectivos máis vulnerables de nosos pobos e cidades, xunto a operarios municipais de limpeza e residuos sólidos, empregados do transporte público urbano, traballadores sociais, policías locais, bombeiros, etc.

20201013 ximnasia mantementoA oferta de actividades culturais e deportivas do Concello da Baña para o curso 2020-2021 inclúe a estimulación cognitiva e a ximnasia de mantemento para maiores de 55 anos. Con respecto a anos anteriores, este curso haberá novidades no desenvolvemento destas actividades para evitar a transmisión da enfermidade do coronavirus.

Deste xeito, o curso de estimulación cognitiva seguirá un modelo semipresencial. Isto é, persoal do concello será o encargado de levar e recoller o material nos domicilios das persoas participantes.

No que respecta á ximnasia de mantemento, que viña celebrándose por parroquias en anos anteriores, desta volta realizarase unicamente en San Vicenzo. A configuración dos horarios realizarase en función dos grupos, unha vez que finalice a inscrición.

As persoas interesadas en participar en calquera destas actividades poden dirixirse ao Concello da Baña para anotarse ou solicitar máis información.

20200827 aviso cancelacion campamentoO Concello da Baña cancela o campamento urbano da primeira semana de setembro de 2020, que tiña programado para favorecer a conciliación familiar, debido aos casos de covid-19 detectados ultimamente no termo municipal. A pesar de que as persoas afectadas se atopan illadas e cumprindo cos protocolos establecidos, é necesario, máis que nunca, extremar as precaucións: uso obrigatorio da máscara,
lavar as mans con frecuencia, manter a distancia social e evitar as reunións multitudinarias.

Ante a aparición de varios casos positivos no municipio, o Concello xa decidira o pasado luns, 24 de agosto, suspender todas as actividades culturais programadas ata novo aviso.

Desde o Concello lémbrase unha vez máis que os principais síntomas da covid-19 son febre, tose seca, malestar xeral e dificultade para respirar. O teléfono de consulta é o 900 400 116. De tratarse dun caso grave, cómpre chamar o 061. Para máis información sobre o coronavirus pódese consultar a web coronavirus.sergas.es.