- Detalles
- Escrito por Alicentis
- Categoría: novas
- Visitas: 653
-
As persoas interesadas en participar deberán inscribirse previamente no teléfono 981 886 501
O Concello da Baña celebrará o Día do Libro, que se conmemora cada 23 de abril, cunha programación especial composta por dúas actividades culturais pensadas para fomentar a lectura e o contacto coa literatura desde diferentes perspectivas.
O venres 25 de abril, ás 17.00 horas, terá lugar na Axencia de Lectura da Baña o obradoiro creativo Debuxar letras II, unha actividade de iniciación ao lettering que regresa tras o éxito da súa primeira edición. A proposta está dirixida a todos os públicos e combina a creatividade co gusto pola palabra escrita, promovendo a expresión artística a través do deseño de letras.
A segunda das actividades será a andaina literaria Ruta ‘As rapazas de Xan’, que se celebrará o domingo 27 de abril a partir das 10.00 horas. Trátase dunha ruta de dificultade baixa pola parroquia de Cabanas, baseada na novela As rapazas de Xan do autor Manuel Iglesias Turnes. O percorrido permitirá descubrir os espazos naturais e culturais que inspiraron a obra, ofrecendo unha experiencia de lectura viva e contextualizada.
As persoas interesadas en participar nestas actividades deberán inscribirse previamente no teléfono do Concello: 981 886 501.
- Detalles
- Escrito por Alicentis
- Categoría: novas
- Visitas: 1455
-
José Antonio Pereira informou no pleno que os cinco terminais seguen sen aparecer e que tanto Concello como Fiscalía piden que se celebre o xuízo por malversación de caudais públicos
-
O ex alcalde asegura que no xuízo demostrarase a súa inocencia
-
Aprobada a ordenanza que regula as prestacións de emerxencia social e a modificación das ordenanzas de uso de áreas recreativas e de corta de madeira
-
Unanimidade para apoiar a declaración institucional contra o vertedoiro de residuos na canteira Pedra Facha de Val do Dubra
O alcalde da Baña e portavoz do grupo socialista, José Antonio Pereira, solicitou no pleno ordinario celebrado este 9 de abril a dimisión do exrexedor e portavoz do PP, José Andrés García Cardeso, que está acusado dun delito de malversación de caudais públicos e para o que fiscalía e Concello solicitaron a apertura de xuízo oral no xulgado do penal. García Cardeso respondeu que el non se apropiou dos 5 teléfonos e que no xulgado demostrará a súa inocencia. (Vídeo íntegro do pleno).
José Antonio Pereira deulle conta ao Pleno do auto do procedemento abreviado 60/2024 que se sigue no xulgado de Negreira pola desaparición de cinco teléfonos móbiles (o Concello pagou 6.585 euros por eles, entre os que se atopan un iPhone de última xeración), polo que se acusa a o exalcalde, Andrés García Cardeso, dun delito de apropiación indebida e malversación de caudais públicos. No auto, de data 27 de febreiro, o titular do Xulgado de Instrución número 1 de Negreira dalle 10 días ás partes para solicitar a apertura de xuízo oral. Como denunciantes neste proceso figuran o Concello da Baña, José Antonio Pereira e a propia Fiscalía.
José Antonio Pereira informou que tanto el como o Concello xa solicitaron a apertura de xuízo oral, “motivo polo que en calidade de alcalde e de portavoz do grupo socialista da Baña solicitou a dimisión de Andrés García Cardeso como concelleiro e como portavoz do PP, ao non ser acorde que vostede represente neste Concello a gran parte da poboación deste municipio”, asegurou no pleno o actual alcalde. Pereira Gil volveu recordar que despois das eleccións desapareceran 5 móbiles mercados polo Concello, cun valor de 6.585 euros, e que das investigación levadas a cabo pola Garda Civil e polo xulgado de Negreira, o xuíz atopa serios indicios dun delito de apropiación indebida e malversación de caudais públicos cometidos por Andrés García Cardeso e por outra persoa das que non se facilitou o nome.
Andrés García Cardeso volveu insistir no pleno de onte que os móbiles están no Concello, que foron utilizados por persoal municipal e que no xulgado se demostrará a súa inocencia. “Podedes pedir a dimisión e o que queirades. O que pon o auto non é certo. Hai que esperar acontecementos, dirimirase todo no xulgado”, asegurou.
Ordenanza de emerxencia social
Na sesión de onte, o Pleno da Baña aprobou inicialmente e por unanimidade a ordenanza que regula as prestacións de emerxencia social para atender urxencias puntuais e sobrevidas da veciñanza que se atope en situación de vulnerabilidade ou en risco de exclusión social. O obxectivo é regular as prestacións de emerxencia social no Concello da Baña, garantindo que as persoas en situación de vulnerabilidade ou risco de exclusión social poidan acceder a axudas económicas en casos de urxencia.
Estas prestacións estarán destinadas a cubrir necesidades básicas como a alimentación, os gastos sanitarios ou os custos de mantemento da vivenda. O pasado 10 de marzo, o Concello abriu no mes de marzo un proceso de participación cidadá para mellorar esta ordenanza, que foi aprobada agora inicialmente por unanimidade, pubicarase no BOP es estará a exposición pública durante 30 días para poder aportar suxestións.
Ordenanza de áreas recreativas e corte de madeira
Na sesión de onte tamén se acordou modificar o artigo 5 da ordenanza reguladora do uso das áreas recreativas da Baña. No caso concreto da área recreativa Agra de Chans mantense a fianza de 50 euros que deberán depositar todas as persoas que soliciten o seu uso. A partir de agora, as persoas non empadroadas na Baña deberán pagar un alugueiro de 50 euros por usar esta área recreativa. A liquidación da fianza e da taxa de alugamento deberá depositarse nunha das entidades bancarias nas que teña conta o Concello da Baña.
O Pleno tamén modificou a ordenanza que regula as plantacións e as cortas de árbores na Baña. Co cambio aprobado establécese a obrigatoriedade de comunicar ao Concello, cun mínimo de 15 días hábiles de antelación, a data prevista para o inicio da corta de plantacións forestais sempre que superen as 5 toneladas, co obxectivo de garantir a preservación do medio ambiente e a conservación dos camiños e das pistas rurais. A ordenanza tamén obriga, entre outros aspectos, identificar o nome do propietario a do madeireiro e tamén a parcela na que se cortará a madeira.
A ordenanza tamén establece fianzas en función da capacidade dos vehículos que transporten a madeira, fianzas que serán de 1.600 euros para camións de menos de 16 toneladas de carga, e de 3.100 euros para os vehículos que superen este peso máximo autorizado.
A modificación aprobada tamén prohibe o almacenamento de madeira nas vías públicas, entre outros aspectos. A ordenanza tamén recolle sancións de entre 300 e 1.500 euros no caso de infraccións.
Rexeitamento dun vertedoiro en Val do Dubra
No Pleno tamén houbo unanimidade para amosar o rexeitamento ao proxecto de instalación dun vertedoiro de residuos na canteira Pedra Facha, no municipio de Val do Dubra, propoñendo que a súa rexeneración se realice, no seu caso, mediante un proxecto alternativo baseado na rehabilitación natural que xa se está a dar e que non inclúa a creación de dito vertedoiro.
Dende o Concello da Baña apoiaranse aquelas iniciativas institucionais ou veciñais en contra deste vertedoiro, que xa recibiu máis de mil alegacións.
Cancelación do desfile de Entroido
Na sesión de rogos e preguntas, o punto que xerou maior debate foi a cancelación do desfile de Entroido. Andrés García Cardeso preguntou por que se cancelou sen falar cos portavoces dos tres grupos e non se pospuxo o desfile para outro día.
A tenente de alcalde e concelleira de Acción social, Mónica González, como responsable desta área, replicoulle ao portavoz popular dicindo que o día 7 de marzo se enviou un correo electrónico tanto ao alcalde como ao portavoz do PP a decisión de cancelar o desfile por motivos das inclemencias meteorolóxicas.
Mónica González dixo que dende MeteoGalicia informáronlle de que tanto para o día 8 de marzo (data prevista para o desfile) como para a seguinte semana non aconsellaban celebrar o desfile pola previsión de fortes refachos de vento. Ademais desta circunstancia, a tenente de alcalde recordou que ao estar de baixa a secretaria do Concello non se podían modificar as bases do Desfile, motivo polo que se decidiu cancelar o evento. Unha decisión que foi criticada tanto polo grupo popular como polo grupo socialista, segundo deixou patente a concelleira Vanessa Gil, ao considerar que se puido celebrar outro día. “O proceso de tramitación non facía posible este cambio de datas ou de lugar de celebración”, segundo dixo Mónica González.
- Detalles
- Escrito por Alicentis
- Categoría: novas
- Visitas: 1108
-
A iniciativa está dirixida a menores de 3 a 14 anos
-
Desenvolverase os días 14, 15, 16 e 21 de abril en horario de 8.00 a 14.00 horas nas instalacións deportivas municipais
-
A inscrición remata o mércores 9 de abril
-
O programa busca facilitar a conciliación familiar e ofrecer á cativada un espazo de aprendizaxe, xogo e socialización
O Concello da Baña organiza o Campamento Deportivo Cultural 2025, unha iniciativa dirixida a menores de 3 a 14 anos que se desenvolverá os días 14, 15, 16 e 21 de abril, coincidindo coas vacacións de Semana Santa. O obxectivo principal deste programa é facilitar a conciliación das familias ao tempo que se ofrece ás crianzas un espazo de aprendizaxe, xogo e socialización.
O campamento desenvolverase en horario de 8.00 a 14.00 horas nas instalacións deportivas municipais, onde os nenos e nenas participantes poderán gozar de actividades deportivas, culturais, educativas e lúdicas adaptadas ás distintas idades. A programación incluirá xogos de equipo, talleres creativos e actividades que fomenten valores como o respecto, a convivencia e a cooperación.
O campamento conta con 20 prazas dispoñibles e poderán inscribirse aqueles menores que estean escolarizados e cumpran os requisitos de admisión. A selección de participantes realizarase en base a criterios como o empadroamento no municipio e a necesidade de conciliación familiar.
O prazo de inscrición permanecerá aberto dende o 3 ata o 9 de abril, e os formularios poderán presentarse a través do rexistro municipal. A lista definitiva de admitidos publicarase unha vez finalizado o proceso de selección.
As persoas interesadas poden recibir máis información a través dos teléfonos 981 886 501 ou 669 368 413 ou do correo electrónico Este enderezo de correo está a ser protexido dos robots de correo lixo. Precisa activar o JavaScript para velo.
O Concello da Baña aposta por este tipo de iniciativas como unha ferramenta clave para apoiar as familias do municipio e ofrecerlles aos nenos e nenas unha alternativa de lecer saudable e enriquecedora durante os días non lectivos.
 Bases do Campamento Deportivo e Cultural 2025 | [ ] | 79 kB |
| Ficha de inscrición no Campamento Deportivo e Cultural 2025 | [ ] | 136 kB |
| Anexo 3: Autorización de imaxe | [ ] | 102 kB |
| Anexo 4: Autorización de uso do número de teléfono | [ ] | 94 kB |
- Detalles
- Escrito por Alicentis
- Categoría: novas
- Visitas: 644
Dende o 1 de abril ata o 30 de setembro, o Concello da Baña contará cun reforzo na súa brigada municipal de obras coa incorporación de tres novos traballadores. Esta ampliación do persoal é posible grazas ao programa PEL-Concellos 2025, financiado pola Deputación da Coruña, que ten como obxectivo apoiar os concellos na mellora dos servizos municipais e fomentar o emprego local.
- Detalles
- Escrito por Alicentis
- Categoría: novas
- Visitas: 1379
-
As inscricións permanecerán abertas ata o mércores 30 de abril ás 23:59 horas
-
A participación para as categorías escolares é de balde, mentres que para as categorías Sénior e Máster ten un custo de 7 euros
-
Poderán participar deportistas federados e non federados
-
O obxectivo é fomentar o deporte e a actividade física entre a veciñanza
O domingo 4 de maio celebrarase a primeira edición da Carreira Popular Concello da Baña, unha cita deportiva que inclúe un programa completo de probas para todas as idades e niveis. Coa colaboración e control técnico da Federación Galega de Atletismo, a carreira terá a liña de saída e de chegada na Praza do Concello, convertendo esta xornada nun punto de encontro para os amantes do deporte e da actividade física.
A Carreira Popular Concello da Baña está aberta á participación de todas as persoas, tanto federadas como non federadas, e inclúe categorías desde os máis pequenos (biberón, para os nados no ano 2020 e posteriores) ata os adultos e veteranos (categoría Máster para os nacidos en 1989 e anteriores). Deste xeito, o evento busca promover a actividade física e o deporte en toda a comunidade, sen importar a idade ou o nivel.
As inscricións poden realizarse na web oficial www.carreirasgalegas.com ata o mércores 30 de abril ás 23:59 horas. Mentres que a participación nas categorías escolares (de biberón a sub-18) será de balde, as inscricións nas categorías Sénior e Máster teñen un custo de 7 euros. As retiradas de dorsais realizaranse na Casa do Concello o sábado 3 de maio, entre as 17:00 e as 20:00 horas, ou ben no propio día da proba, ata media hora antes do inicio da carreira correspondente.
As probas comezarán ás 10:00 h coa categoría sub-18 e continuarán ao longo da mañá, cunha distancia que vai desde os 100 metros para os máis pequenos ata os 10 km para os adultos e veteranos. Os horarios e distancias de cada categoría son:
- Biberón (2020 e posteriores): 100 m con saída ás 13:10 h
- Prebenxamín (2018-2019): 200 m con saída ás 13:15 h
- Sub 10 (2016-2017): 800 m con saída ás 12:55 h
- Sub 12 (2014-2015): 1.200 m con saída ás 12:40 h
- Sub 14 (2012-2013): 1.200 m con saída ás 12:30 h
- Sub 16 (2010-2011): 2.400 m con saída ás 12:10 h
- Sub 18 (2008-2009): 5 km con saída ás 10:00 h
- Senior (1990-2007) e Máster (1989 e anteriores): a proba de 5 km comezará ás 10:00 h e a de 10 km ás 11:00 h
Premios aos deportistas locais
O Concello da Baña recoñecerá o esforzo dos participantes entregando trofeos aos tres primeiros clasificados de cada categoría, así como aos tres primeiros en cada unha das probas de 5K e 10K. Tamén se premiarán aos tres mellores clubs da proba de 10K.
Os participantes locais que ocupen os tres primeiros postos na proba de 10K recibirán tamén un trofeo.
Para garantir a comodidade de todas as persoas, a organización ofrecerá servizo de duchas no Pavillón Polideportivo de San Vicente e no Campo de Fútbol Antonio Martínez.
Este evento, que busca ser un referente no calendario deportivo local, amosa o compromiso do Concello da Baña coa promoción do deporte e a actividade física entre a súa veciñanza.