- Detalles
- Escrito por Alicentis
- Categoría: novas
- Visitas: 910
-
O Concello repartiu entre a veciñanza 70 quilos de castañas asadas \\
-
‘Espantamendos’, de Fantoches Baj, abriu a festa escenificando un conxunto de contos e cancións para enfrontarse aos medos ancestrais \\
As Escolas Vellas foron este ano o escenario escollido polo Concello da Baña para celebrar o Samaín e o tradicional magosto. A celebración tivo lugar este sábado á tardiña e combinou a degustación de castañas con actividades lúdico-culturais aptas para todos os públicos. Ignacio Vilariño, de Fantoches Baj, foi o encargado de abrir a festa e de poñer en situación ao público, sobre todo ao infantil, co seu espectáculo de narración oral Espantamedos, no que propuxo unha serie de contos e de cancións para enfrontarnos aos medos ancestrais e fixo partícipe ao público, que non dubidou en acompañalo con algunha das letras e con palmas.
Tras esta actuación a veciñanza gozou do popular magosto, no que se asaron 70 quilos de castañas. A degustación estivo amenizada polo grupo Axio Mouro, de Santa Comba. O Concello tamén repartiu entre as crianzas lambetadas e doces.
Moitos dos nenos e das nenas que asistiron á festa do Samaín viñeron caracterizados. Así, polas Escolas Vellas pulularon bruxas, demos e algún que outro esqueleto.
Na celebración do Samaín estiveron presentes o alcalde da Baña, Andrés García Cardeso; o tenente de alcalde; César Ramos e a concelleira de Cultura, Lorena Trillo.
- Detalles
- Escrito por Alicentis
- Categoría: novas
- Visitas: 1017
-
O prazo para presentar reclamacións remata o 16 de novembro
-
O DOG publicou o anuncio o pasado 3 de outubro
O Concello da Baña publica hoxe un documento de alegación tipo á liña de alta tensión do parque eólico de Troitomil para que as persoas interesadas que o considren poidan presentar obxeccións antes do 16 de novembro. O documento de alegación pódese descargar no arquivo adxunto e neste enlace
O Diario Oficial de Galicia (DOG) publicou o pasado 3 de outubro o acordo da Xefatura Territorial da Coruña da Consellería de Vicepresidencia polo que se somete a exposición a solicitude de declaración de utilidade pública, coa conseguinte necesidade urxente de ocupación e expropiación forzosa, do proxecto LAT 132kv set parque eólico Troitomil-LAT 132kv SET parque eólico Banzas/SET colectora Lousame, que a empresa Green Capital Power ten previsto desenvolver nos concellos da Baña e de Negreira.
O DOG tamén publicaba o día 3 a listaxe de persoas e bens afectados e informa que o prazo para presentar alegacións é de 30 días, polo que remata o 16 de novembro. O proxecto, que conta cun orzamento de 1.982.000 euros, ten un prazo de execución de seis meses
Toda a documentación e os planos do proxecto pódense consultar na seguinte ligazón:
De xeito físico, as persoas interesadas poderán informarse tamén nas dependencias da Sección de Enerxía da Xefatura Territorial da Coruña da Vicepresidencia Primeira e Consellería de Economía, Industria e Innovación (rúa Vicente Ferrer 2 da Coruña), de 9.00 a 14.00 horas de luns a venres, así como nas casas do concello da Baña e de Negreira.
 Modelo_alegación_LAT_TROITOMIL | [ ] | 51 kB |
- Detalles
- Escrito por Alicentis
- Categoría: novas
- Visitas: 1056
-
Aprobada a modificación do contrato de mellora da estrada de Menlle de Arriba a Paradas cos votos a favor do equipo de goberno e da concelleira non adscrita e a abstención dos socialistas
O Pleno da Corporación da Baña aprobou hoxe por unanimidade a conta xeral correspondente ao exercicio 2021. No pleno extraordinario de esta tarde tamén se aprobou, con 8 votos a favor e 3 abstencións, a modificación do contrato de pavimentación da estrada que vai de Menlle de Arriba ata Paradas, financiado ao abeiro do POS+ 2021.
A modificación vai permitir botar unha capa de 5 centímetros de aglomerado en quente nuns 850 metros desta estrada que pasan máis preto das vivendas en Menlle, mantendo o rego asfáltico no resto do tramo, segundo explicou o alcalde. Andrés García Cardeso dixo que esta petición foi feita polos veciños hai máis dun ano e que despois de todos os trámites burocráticos pódese levar a cabo ao contar coa colaboración da empresa adxudicataria (Mantido) para modificar o proxecto sen cambiar o presuposto de adxudicación da obra, que supera lixeiramente os 95.870 euros.
Dende o grupo socialista, José Antonio Pereira criticou que se reducira a mellora nun tramo de quilómetro e medio desta estrada para poder botar aglomerado en Menlle, e reclamou que en toda a estrada se utilice aglomerado en quente, utilizando a parte do POS que o Concello deixou para gasto corrente.
O alcalde, Andrés García Cardeso replicoulle que a veciñanza fixera esa petición en setembro do ano pasado, cando os socialistas gobernaban na Baña, e que non foron quen de modificar o proxecto. “É fácil pedir aglomerado para o monte, pero primeiro son os veciños”, concluíu o alcalde.
Pola súa banda, Mónica González preguntou cando se vai executar a obra, e pediu que, se é posible, se utilice aglomerado en quente nunha costa con bastante pendente.
Na votación, a modificación do contrato aprobou se con 8 votos a favor (PP, Compromiso e Mónica González) e 3 abstencións (PSdeG).
- Detalles
- Escrito por Alicentis
- Categoría: novas
- Visitas: 950
- O DOG publicou o 27 de setembro o anuncio de exposición pública
- As persoas interesadas teñen de prazo ata o 10 de novembro para presentar obxeccións
- Hoxe celébrase a segunda charla informativa no local social de Barro, ás 19.30 horas
O Concello da Baña publica hoxe un documento de alegación ao parque eólico do Barrosino para que as persoas interesadas que o consideren poidan presentar obxeccións. Hoxe, 18 de outubro, celébrase a segunda charla na que técnicos municipais e da asesoría xurídica informarán á veciñanza de cales son os dereitos que teñen e de como se poden presentar alegacións, que poderán facer ata o 10 de novembro. Será no local social de Barro ás 19.30 horas. O pasado día 10 celebrouse outra charla informativa en Marcelle.
O Diario Oficial de Galicia publicou o 27 de setembro o acordo da Xunta polo que se somete a exposición a solicitude de declaración e utilidade pública do parque eólico de Barrosino, coa conseguinte necesidade de urxente ocupación dos terreos afectados e a súa expropiación forzosa. Por este motivo, o Concello da Baña anuncia que, logo de estudar o proxecto, informará a veciñanza nos próximos días e ofrecerá modelos para presentar alegacións.
O DOG publica a listaxe de persoas e bens afectados e informa que o prazo para presentar alegacións é de 30 días hábiles a contar desde este mércores 28 de setembro (o prazo remataría o 10 de novembro). O parque, promovido pola empresa Green Capital Power, afectaría exclusivamente ao Concello da Baña e contaría con 3 aeroxeneradores dunha potencia de 4,5 megawatios cada un deles.
Toda a documentación e os planos do proxecto pódense consultar na seguinte ligazón: https://economia.xunta.gal/transparencia/informacion-publica/en-tramitacion/instalacions-de-xeracion?content=expediente_0221.html.
De xeito físico, as persoas interesadas poderán informarse tamén nas dependencias da Sección de Enerxía da Xefatura Territorial da Coruña da Vicepresidencia Primeira e Consellería de Economía, Industria e Innovación (rúa Vicente Ferrer 2 da Coruña), de 9.00 a 14.00 horas de luns a venres, así como no Concello da Baña.
O modelo de alegación pódese descargar no arquivo adxunto.
| Modelo alegación parque eólico Barrosino | [ ] | 59 kB |
- Detalles
- Escrito por Alicentis
- Categoría: novas
- Visitas: 912
-
O mercadiño reuniu a máis de 35 postos de artesanía, oficios, conservas, xabóns artesáns e produtos da terra //
-
Os Gaiteiros da Baña, as Atrevidas de Monte, as Regueifeir@s e o dúo Ciclón foron os encargados de animar a xornada festiva //
-
Nenos, nenas e maiores desfrutaron cos Xogos do Paporrubio e cos contos ilustrados ‘Polo correo do Vento’ //
-
O Concello da Baña destaca o éxito desta edición e a boa acollida que tivo entre a veciñanza do municipio e da contorna //
A carballeira de Ceilán (A Baña) viaxou hoxe por unhas horas 70 anos atrás na historia, ata a década dos anos 50 do pasado século XX, para rememorar o espírito e as tradicións das antigas feiras e romarías co Feirón e romaría da Re-Volta. A cita está organizada polo Concello da Baña, en colaboración coa Asociación Veciñal Outeiro e a Deputación da Coruña. Mercadiño tradicional con postos de artesanía, oficios e produtos da terra; gastronomía, música e espectáculos aptos para todos os públicos foron os atractivos dunha cita festiva que reuniu a centos de persoas, moitas delas caracterizadas de época.
Segundo destaca o Concello da Baña, o mercadiño, que contou con máis de 35 postos, foi un dos máis concorridos das edicións da Re-Volta que ata a data se teñen celebrado. Entre os postos que se deron cita na carballeira de Ceilán destacaban os artesanais, como o do latoeiro Fernando, un dos últimos do gremio en Galicia; os San Cosmeiros, o do torneiro de Arzúa, José Manuel Pardo, ou o posto de pandeiretas artesanais de Mari Carmen Suárez e Rafael Regos, da empresa familiar Regos de Ordes.
Pero no mercadiño tradicional tamén se podía mercar xabóns artesáns, velas artesanais, bonecos e outros produtos feitos de lá, libros de segunda man, xoiería e bixutería artesanais... produtos da horta ecolóxicos de tempada, mel, plantas, postos de venda de doces típicos como as orellas, polbeira... e mesmo as famosas filloas da pedra da Baña, entre outros.
Os Gaiteiros da Baña e as Atrevidas de Monte foron os encargados de amenizar a xornada da mañá, despois da misa, e de animar a máis dunha parella a bailar. Mentres que as propostas musicais da tarde correron a cargo das Regueifeir@s, con Lupe Blanco ao fronte, e o dúo Ciclón, que pecharía a edición do Feirón e romaría da Re-Volta deste ano por cortesía da Asociación Veciñal Outeiro.
Grandes, pequenos e pequenas gozaron ao longo da mañá cos enredos e as historias dos Xogos do Paporrubio e cos contos ilustrados Polo correo do Vento, pola tarde. Tamén había diferentes paneis con fotografías antigas que causaron sensación entre a veciñanza e visitantes.
O Concello da Baña destaca o éxito acadado nesta edición do Feirón e romaría da Re-Volta, e a boa acollida que tivo a celebración non só entre a veciñanza do municipio, senón tamén entre os veciños e as veciñas da contorna, e agradece a colaboración da Asociación Veciñal Outeiro.