Detalles

Escrito por Alicentis

Categoría: novas

Published: 30 Xaneiro 2020

Visitas: 920

•  Na mesa de contratación para o proxecto do IDAE estarán representados o PSdeG e o PP

• A oposición critica o uso partidista da concentración diante do centro de saúde e o alcalde replica que foi un acto convocado polo Concello e aberto a todo o mundo

• O goberno pediu o informe que confirma concentracións de gas radon superiores ás recomendadas en dous despachos da casa consistorial dende setembro de 2018

O Pleno da Corporación da Baña aprobou onte por unanimidade solicitarlle a UNICEF o recoñecemento como Cidade Amiga da Infancia, unha iniciativa que ten como obxectivo xeral promover a aplicación da Convención dos Dereitos do Neno, ratificada por España en 1990. Na sesión, o PP pediu a reprobación do equipo de goberno e CxG criticou o uso partidista da concentración diante do centro de saúde para reclamar atención pediátrica, ao que o alcalde replicou que fora un acto aberto convocado polo Concello. José Antonio Pereira cualificou como grave que o anterior goberno non tomase medidas para solucionar a concentración excesiva de gas radon en dous despachos da casa consistorial como indicaba un informe de setembro de 2018 “que nin sequera estaba no Concello e tivemos que pedir esta mañá” (vídeo íntegro da sesión neste enlace).

A concelleira de Cultura, Mónica González, explicou que A Baña quere adherirse á iniciativa Cidades Amigas da Infancia, que promove UNICEF, para desenvolver políticas destinadas a traballar coa infancia dende distintos ámbitos e poder escoitar as inquedanzas dos nenos e nenas da Baña para mellorar o concello. A proposta foi aprobada por unanimidade dos tres grupos, ao igual que a designación do alcalde e do concelleiro popular Manuel Landeira para formar parte da mesa de contratación do proxecto do IDAE para a instalación de luminarias led no municipio, na que tamén deberán estar presentes catro traballadores municipais.

Antes de iniciar o apartado de rogos e preguntas, o alcalde, José Antonio Pereira, informou que en dous despachos da planta baixa da casa consistorial detectáronse xa en setembro de 2018 concentracións de gas radon superiores ás aconsellables. “A empresa de prevención de riscos laborais nos pediu o informe, que tivemos que pedir á empresa que fixera as medicións. Non tiñamos nin idea deste informe”, explicou Pereira Gil, quen cualificou o feito como “grave, porque dúas traballadoras levan un ano nesas dependencias descoñecendo a situación”.

A empresa que fixo as medicións recomenda instalar un sistema de ventilación e airear as dependencias. Este informe, de data 21-9-2018, era o segundo que se fixo. Segundo indicou o portavoz do PP e anterior alcalde, e tamén o portavoz de Compromiso por Galicia, o informe das primeiras medicións realizadas non deu cifras esaxeradas, pero aconsellaba facer unha segunda medición. Andrés García Cardeso dixo que no primeiro informe da empresa especializada non recomendaba medidas, e que despois entregou un pen drive. José Antonio Pereira criticou que o anterior goberno non mirase este informe dende setembro de 2018, e adiantou que van estudar como por en marcha as medidas que recomenda a empresa.

“Todo isto coñecémolo porque hoxe a empresa de prevención de riscos laborais nos pediu este informe, que non atopamos no Concello e lle tivemos que pedir a empresa que fixo as medicións”, indicou Mónica González. César Ramos, de CxG, pediu que se tomen as medidas que aconsellan os expertos e que se informe á veciñanza que se pode facer para evitar altas concentracións de radon, un gas radioactivo de orixe natural que adoita atoparse no interior de vivendas de pedra. “Segundo o mapa que elaborou a Xunta, a nosa comarca é unha das que ten maiores concentracións de radon”, dixo César Ramos

Reprobación pola concentración no centro de saúde

Tanto o PP como Compromiso por Galicia criticaron con dureza a “utilización partidista” por parte do equipo de goberno da concentración celebrada o pasado día 16 diante do centro de saúde para reclamar atención pediátrica na Baña.

Andrés García Cardeso reprobou o comportamento do equipo de goberno por confundir “a administración local cunha concentración partidista”, xa que na mesma estiveron representantes do Partido Socialista da comarca de Santiago. “Hai que desligar a acción do concello da do partido”, dixo o portavoz do PP.

No mesmo senso se manifestou César Ramos. “Non se poden politizar as reivindicacións por unha sanidade pública na Baña”, dixo o portavoz de CxG, que volveu esixir “neutralidade” no uso da web e das redes sociais municipais, criticando que na información do acto se mencionaran aos representantes do PSdeG dos diferentes municipios que acudiron á Baña.

O alcalde, José Antonio Pereira, replicoulles aos dous sinalando que a concentración fora convocada polo Concello e “era un acto aberto para defender aos veciños da Baña. Viñeron alcaldes socialistas, deputados provinciais e autonómicos, e grazas a esa presenza tivemos moita repercusión nos medios de comunicación”, indicou. O alcalde criticou que dende o Sergas non se respondera ás cartas enviadas polo Concello, e indicou que agora “tamén nos recortan o horario da matrona”.

Preguntado polo PP cando se vai cumprir a sentencia xudicial e pagarlle os atrasos aos traballadores, o alcalde respondeu que están á espera de coñecer en canto cuantifican os avogados do persoal estes atrasos para chegar a un acordo. “Levamos dende 2015 pendentes de pagar os atrasos. En canto saibamos canto reclaman e cheguemos a un acordo teremos que pedir un crédito de algo máis de 300.000 euros para resolver esta situación”, dixo José Antonio Pereira, que esta semana se reunirá cos avogados. “Hai vontade de solucionar o problema, de feito as nóminas xa están regularizadas”.

Entre outros temas, Compromiso por Galicia pediu que non se politizara a Festa da Filloa da Pedra, que se vai celebrar o día 15, e volveulle reclamar información ao equipo de goberno sobre os actos que se vaian organizar esa fin de semana.

O contido íntegro da sesión pódese ver no vídeo que se atopa no canal de Youtube do Concello, neste enlace

Detalles

Escrito por Alicentis

Categoría: novas

Published: 10 Xaneiro 2020

Visitas: 792

• Asociacións veciñais e comunidades de augas rurais teñen de prazo ata o 30 de xaneiro para presentar as solicitudes

O alcalde da Baña ven de remitirlles unha carta ás asociacións  e colectivos do concello informando da convocatoria de subvencións para o ano 2020, en réxime de concorrencia competitiva, que publicou a Vicepresidencia da Xunta de Galicia no DOG o pasado 30 de decembro dirixidas a asociacións veciñais, confederacións, federacións ou unións de asociacións de veciños, comunidades de augas rurais de Galicia debidamente inscritas no rexistro público correspondente. O prazo para presentarse remata o 30 de xaneiro.

Esta convocatoria ten por finalidade outorgar axudas específicas par investimentos destinadas ás entidades coa finalidade de contribuír a mellorar a calidade de vida local e fomentar e dinamizar o asociacionismo veciñal. As axudas pódense destinar a obras e equipamentos en inmobles titularidades dos colectivos solicitantes ou nos que lles corresponda o dereito de uso. Tamén se inclúen as traídas de auga veciñais.

 Son subvencionables os seguintes proxectos:

• Obras de acondicionamento, reforma e ampliación dos locais en que a entidade desenvolve a súa actividade.
• Adquisición de equipamentos:  mobiliario, equipos de oficina, equipamento informático e audiovisual.
• Obras de mellora, reforma e reparación das infraestruturas e instalacións das traídas de auga comunitarias.

O importe máximo da axuda  é de 12.000 euros para a realización de obras e de 5.000 euros para equipamentos e o prazo para ter rematadas as obras e xustificar o gasto será o 15 de outubro de 2020.

O prazo para solicitar estas axudas da Vicepresidencia remata o día 30 de xaneiro de 2020 e pódese solicitar información no Concello da Baña. A orde íntegra do DOG pódse consultar neste enlace (preme aquí).

Detalles

Escrito por Alicentis

Categoría: novas

Published: 24 Xaneiro 2020

Visitas: 531

A Oficina Técnica do Concello da Baña permancecerá pechada ao público os días 28, 30 e 31 de xaneiro e o 3 e 4 de febreiro. Porén, será posible a tramitación da documentación referida a calquera expediente no Rexistro Xeral do Concello da Baña.

Detalles

Escrito por Alicentis

Categoría: novas

Published: 09 Xaneiro 2020

Visitas: 1060

• O expediente será remitido á Xunta para que o solo industrial se poida poñer en marcha de forma inminente

• A mesa de contratación contará coa presencia de catro funcionarios e dous representantes dos grupos políticos

• O xoves 16 haberá unha concentración diante do centro de saúde para reclamar que se cubran as baixas e vacacións da pediatra

O Pleno da Corporación da Baña acordou hoxe por unanimidade aprobar provisionalmente o plan de sectorización do solo rústico apto para urbanizar SRAU-2, que permite desbloquear a tramitación do polígono industrial na Eiroa. O acordo plenario e todo o expediente remitirase á Xunta para que se de o visto bo ao solo industrial, e poder cerrar así un trámite que se solicitara en outubro de 2016. Se dende a Xunta non se solicita máis documentación, a Baña poderá contar cun polígono industrial, algo que os tres grupos políticos da Corporación agardan que ocorra en breve.

Na sesión de hoxe (ver vídeo íntegro neste enlace) tamén se aprobou a moción de Compromiso por Galicia para modificar a composición da mesa de contratación, na que pasarán a estar presentes dous representantes dos grupos políticos da Corporación (de forma rotatoria). Segundo o informe emitido pola secretaría do Concello, e dado que os representantes políticos non poden superar un terzo dos membros da mesa, neste órgano deberán estar presentes catro funcionarios municipais a partir de agora.

A idea inicial de CxG era que na mesa estiveran presentes un membro do PSdeG, outro do PP e outro de Compromiso, pero diante do informe de Secretaría propuxo que só fosen dous e de forma rotatoria. O alcalde propuxo que só estivese un representantes dos partidos políticos, que se fose rotando en cada mesa, para non ter que incrementar o número de traballadores municipais presentes neste órgano ata catro persoas. Na votación, a proposta foi aprobada co apoio de CxG e do PP (6 votos), mentres que o equipo de goberno do PSdeG votou en contra (4).

No apartado de rogos e preguntas, o alcalde anunciou que o xoves 16 de xaneiro, ás 12.00 horas, está convocada unha concentración diante do centro de saúde para reclamar que o Sergas cubra as baixas por enfermidade ou as vacacións da pediatra asignada á Baña, e que tan só atende aos nenos e nenas dous días a semana. Dende o Concello xa se enviou unha carta ao Sergas solicitando esta medida, xa que ao non cubrir estas ausencias, os nenos e nenas da Baña teñen que desprazarse ata Santiago para poder ser atendidas por un pediatra do Servizo Galego de Saúde. “Dado que o Sergas non respondeu á carta que lle remitimos a principios de decembro e polo que convocamos esta concentración”, indicou o alcalde.