• O obxectivo é facilitar a conciliación das familias durante estas festas

  • Está dirixido ás crianzas escolarizadas ata os 13 anos

  • As persoas interesadas poderán inscribirse ata o mércores 7 de febreiro e reservar praza chamando ao 981 81 76 05 ou enviando unha mensaxe ao 629 15 40 51

20240130 Obradoiros de entroido A Banha

O Concello da Baña, a través da Concellería de Acción social, cultura e servizo sociais, organiza entre os días 12 a 14 de febreiro os Obradoiros de Entroido co obxectivo de facilitar a conciliación das familias durante estas festas.

As nenas e os nenos da Baña escolarizados ata os 13 anos poderán gozar de diferentes actividades de carácter gratuíto que se desenvolverán na Axencia de Lectura, situada na Casa da Cultura, en horario de 8.00 a 14.00 horas.

As manualidades coa temática do Entroido, a confeccións de máscaras e os diversos xogos, entre outras actividades, formarán parte da rutina durante estas tres xornadas.

As persoas interesadas en participar poderán inscribirse, de balde, ata o mércores 7 de febreiro. Poderase reservar praza chamando ao 981 81 76 05 ou enviando unha mensaxe ao 629 15 40 51.

  • As contas foron aprobadas cos votos do equipo de goberno e a abstención do PP

  • Rexeitada a RPT cos votos en contra de PP e BNG

 

 

O Concello da Baña contará en 2024 cun “presupostos austeros e realistas” de 3,9 millóns de euros que permitirán “pagar as débedas de máis dun millón de euros que nos deixou o anterior goberno”, segundo explicou o alcalde, José Antonio Pereira, no Pleno celebrado onte. As contas foron aprobadas cos votos a favor do equipo de goberno (PSdeG e BNG) e a abstención da oposición. A Corporación rexeitou a RPT cos votos en contra de PP e BNG.

Os presupostos aprobados onte son lixeiramente inferiores aos do presente exercicio. “Son un presupostos austeros e realistas, que nos permitirán pagar a débeda que herdamos do anterior goberno, que manteñen as axudas a colectivos sociais”, nos que se engade unha subvención de 12.000 euros para a Festa da Filloa e outra partida de 300.000 euros para a mellora da estrada entre Vilar da. Torre e Paramos, segundo explicou José Antonio Pereira.

Na mesma liña incidiu a tenente de alcalde, Mónica González, ao asegurar que estas contas “permitirán pagar servizos básicos e as facturas pendentes a pequenos provedores”.

Dende o PP, Andrés García Cardeso votou en falta a desagregación das inversións, pero dixo que o seu grupo “quería ser construtivo” e adiantou a abstención.

A maior partida de ingresos dos presupostos da Baña para 2024 proceden das transferencias correntes doutras administracións (2,52 millóns de euros). Os impostos directos (639.000 euros), as taxas e prezos públicos (334.000) e as transferencias de capital (307.000) son as outras partidas máis relevantes.

Polo que se refire aos gastos, a maior parte destínanse a pagar dos gastos correntes e servizos que recibe a veciñanza (1,74 millóns de euros) o para gastos de persoal (1,43 millóns). Para investimentos reais resérvanse 491.000 euros e outros 191.000 para transferencias correntes.

Rexeitada a RPT

Non houbo o mesmo consenso na aprobación da RPT (relación de postos de traballo). O alcalde dixo que despois de varios anos de traballo e negociación cos sindicatos e traballadores, presentábase presentaba un documento moi importante para organizar o traballo do persoal municipal, que busca a eficiencia da administración local, e a mellora as condicións dos traballadores, creando incluso novos postos de traballo. Para José Antonio Pereira este é un “documento vivo, que se pode mellorar, e que está consensuado cos representantes dos traballadores. Na última mesa de negociación aclaráronse moitas dúbidas”, dixo.

Dende o PP pediron retirar o punto da orde do día para seguir negociando e buscar o consenso con traballadores e sindicatos. Mónica González (BNG) dixo que a RPT non cumpre coa optimización dos recursos humanos dos que dispón o concello, que ten incongruencias e que non ten o respaldo da maioría dos traballadores municipais.

Ao sometela a votación, o PSdeG (5) votou a favor e o PP (5) e BNG (1) votaron en contra, polo que a RPT foi rexeitada.

 

20231222 Banha pleno presupostos e RPT 3

  • O pavillón de San Vicenzo acollerá entre as 12.00 e as 20.00 horas a oitava edición deste mercado

  • O talento local estará representado polas agrupacións da Escola de Música Tradicional e por un grupo musical do CPI San Vicente

  • A actuación do Mago Teto e unha exhibición de ximnasia rítmica e acrosport de AFA Avania completan a oferta lúdica da xornada

  • A xornada comezará na Escola de Música Emilio Andújar co concerto de Nadal de alumnado e profesorado

20231217 cartel nadal web completoO vindeiro domingo, 17 de decembro, o pavillón municipal de San Vicenzo acollerá a oitava edición do Mercadiño de Nadal da Baña. Dende as 12 do mediodía e ata as 8 da tarde, veciñanza e visitantes poderán desfrutar dunha variada oferta de artesanía, produtos de alimentación e doces típicos desta época, nun ambiente festivo con música, maxia e mesmo coa agardada visita de Papá Noel. A xornada festiva dominical comezará ás 11.00 horas co festival de Nadal na Escola de Música Emilio Andújar.

Este encontro estase a converter nunha cita imprescindible na comarca. Ademais de ofrecer a oportunidade de mercar agasallos únicos e deliciosos produtos propios do Nadal, tamén conta cun amplo programa de actividades e espectáculos que busca entreter a toda a familia ao tempo que pon en valor o talento local.

A primeira das actuacións chegará á unha do mediodía da man dos gaiteiros da Escola de Música Tradicional (EMT) da Baña. Ás catro da tarde será a agrupación de pandeireteiras da mesma escola quen anime o ambiente no mercado. Ademais, no transcurso do Mercadiño terá lugar a presentación dun novo proxecto da EMT da Baña: CantoEncanto.

Seguindo coa promoción do talento local, ás catro e media da tarde comezará a exhibición e ximnasia rítmica e acrosport do alumnado destas actividades extraescolares do CPI San Vicente, grazas á colaboración de AFA Avania, a asociación de familias do centro bañense. Tamén do CPI San Vicente procede o grupo musical Willi Wonka e as Umpalumpas, que de seguro sorprenderá coa súa actuación, a partir das cinco da tarde. O Concello da Baña agradece a implicación do colexio na organización do Mercadiño de Nadal, que contará tamén cunha decoración elaborada polo alumnado e profesorado do centro.

Ademais da música e das exhibicións deportivas, a maxia tamén estará presente. O Mago Teto ofrecerá un espectáculo de ilusionismo para todos os públicos ás 17.30 horas. Pequenas grandes maxias, o que en palabras do autor é o seu espectáculo máis persoal despois de 29 anos percorrendo os camiños do mundo, chegará á Baña grazas á colaboración da Rede Cultural da Deputación da Coruña.

E, como colofón á festa, Papá Noel atenderá os desexos de nenas e nenos. A súa chegada ao Mercadiño de Nadal da Baña tras unha longa viaxe dende o Polo Norte está prevista para as seis e media da tarde.

Empaquetado solidario

Ao igual que en edicións anteriores, no Mercadiño de Nadal da Baña haberá un posto de empaquetado solidario para que todas aquelas persoas que merquen nalgún dos postos poidan levar o seu agasallo ben preparado, ao tempo que colaboran cunha causa solidaria. Este ano, os cartos recadados destinaranse a colaborar coa Asociación Española contra o Cancro.

Festival de Nadal

Por outra banda, alumnado e profesorado da Escola de Música Emilio Andújar ofrecerá un concerto este domingo 17 de decembro, a partir das 11.00 horas. O festival de Nadal traerá sons propios destas datas á sede da escola municipal de música.

  • As obras consistiron na revisión da cuberta, a limpeza da fachada exterior e a instalación de luminarias LED

  • Confírmase a incorporación dunha enfermeira ao persoal do centro e o Concello subliña a necesidade de reforzar o servizo de pediatría

20231218 FOTOXUNTA Visita centro saude 3O delegado da Xunta na Coruña, Gonzalo Trenor, acompañado pola xerente da área sanitaria de Santiago de Compostela e Barbanza, Eloína Núñez, o alcalde da Baña, José Antonio Pereira Gil, e a tenente de alcalde, Mónica González, supervisaron as obras realizadas no centro de saúde. Estas melloras, cun orzamento superior a 48.000 €, foron posibles grazas a un convenio entre a Xunta e o Concello bañense.

O Concello da Baña encargouse da coordinación técnica e da execución das obras, que incluíron a substitución das luminarias por outras de tecnoloxía LED para aforrar enerxía, a limpeza da fachada exterior e unha revisión da cuberta.

Tamén participaron na visita a directora de Recursos Económicos da área sanitaria de Santiago, María José López Rebollo; o director de Atención Primaria, Felipe Calle; e o portavoz local do PP, Andrés García Cardeso.

Reforzar o servizo de pediatría 

Por outra banda, confirmouse a incorporación dunha nova enfermeira ao persoal do centro sanitario. Os representantes do goberno local insistiron tamén na necesidade de reforzar o servizo de pediatría, que só conta cun facultativo dous días á semana. Esta reivindicación xa fora expresada por parte do Concello na reunión mantida a comezos de setembro con Eloína Núñez e facultativos do centro de saúde da Baña.

 

brincanadal

 

O Concello da Baña volve poñer en marcha durante estas festas o programa Brincanadal co obxectivo de que a cativada aprenda e se divirta durante as vacacións escolares ao tempo que se facilita e promove a vida laboral e familiar.

O prazo de inscrición permanecerá aberto ata o venres 15.

A inscrición pode facerse de xeito telemático na web do Concello dende hoxe 7 de decembro e de xeito presencial no rexistro do Concello a partir do luns 11 de decembro.

Unha vez rematado o prazo de inscrición e publicada a lista de admitidos, as familias admitidas deben efectuar o pagamento e facer chegar o xustificante ao departamento de Cultura nas oficinas do Concello ou a través do email: Este enderezo de correo está a ser protexido dos robots de correo lixo. Precisa activar o JavaScript para velo..

Brincanadal 2023 está aberto aos nenos e nenas escolarizados ata os 13 anos e desenvolverase no Centro Social San Vicenzo do 22 de decembro ao 5 de xaneiro en horario de 8.00 a 14.00 horas.

O custe é de 25 euros para escolares empadroados. Haberá descontos a partir do segundo irmá.

A ficha de inscrición pode descargarse no arquivo adxunto ou premendo neste enlace.

Podes consultar as bases no BOP adxunto.